နောက်ဆုံးသတင်း/ဆောင်းပါးများ

လှေစီးပြေး သတင်းရေးသူ သတင်းထောက် တွေကို စွဲချက်ရုပ်ဖို့ ကုလတိုက်တွန်း

ထိုင်းတော်ဝင် ရေတပ်မတော်က ဖမ်းဆီးရမိထားတဲ့ ရိုဟင်ဂျာ လှေစီးပြေး တွေကို ကျွန်းတခု ပေါ်မှာ တွေ့ရစဉ်။ (ဒီဇင်ဘာ ၁၂၊ ၂၀၀၈။)
27.12.2013

လှေစီးပြေး ရိုဟင်ဂျာ တွေကို လူမှောင်ခို ကူးမှုမှာ ထိုင်းရေတပ်က ပါဝင် ပတ်သက် နေတယ်လို့ ရေးသား ခဲ့တဲ့ သတင်းထောက် နှစ်ဦး အပေါ် တရားစွဲ ဆိုထား တာကို ပြန်လည် ရုပ်သိမ်းဖို့ ကုလ သမဂ္ဂ လူ့အခွင့် အရေး အကြီး အကဲက ထိုင်းအာဏာပိုင် တွေကို တိုက်တွန်း လိုက်ပါတယ်။

ထိုင်းနိုင်ငံ ဖူးကတ် အခြေစိုက် အဲဒီ သတင်းထောက် နှစ်ဦးကို ထိုင်းအာဏာပိုင် တွေကနေ အသရေ ဖျက် မှုနဲ့ တရားစွဲ ဆိုခဲ့တာ ဖြစ်ပြီး ဒီအပေါ်မှာ စိုးရိမ် ပူပင်မှု ဖြစ်ရတယ်လို့ လူ့အခွင့် အရေး ဆိုင်ရာ ကုလ သမဂ္ဂ မဟာမင်းကြီး Navi Pillay က ပြောဆို လိုက်တာပါ။ ထိုင်းနိုင်ငံတွင်း သတင်း လွတ်လပ်ခွင့် ဖြစ်စေဖို့ အတွက် သတင်းထောက် နှစ်ဦး ဖြစ်ကြတဲ့ Mr. Morison နဲ့ Ms. Sidasathian တို့ကို စွဲဆိုထားတဲ့ အမှုတွေ ပြန် ရုပ်သိမ်း ပေးဖို့ ထိုင်းအစိုးရကို တိုက်တွန်း တောင်းဆို ထားတယ်လို့ Ms.Pillay ရဲ့ ပြောရေး ဆိုခွင့် ရှိသူ Ravina Shamdasni က ဂျနီဗာမှာ ကြေညာချက် ထုတ်ခဲ့ ပါတယ်။

ဒီအမှုနဲ့ ပတ်သက်လို့ ထိုင်းအစိုးရကို ဘန်ကောက်မှာ ရှိတဲ့ လူ့အခွင့် အရေး ဆိုင်ရာ မဟာ မင်းကြီး ရုံး ကနေ ဆက်သွယ် ဆောင်ရွက် နေတယ် လို့လည်း ပြောပါတယ်။ စွဲဆို ထားတဲ့ အမှုနှစ်ခု အနက် တ မှုဖြစ်တဲ့ အသရေ ဖျက်မှုနဲ့ ပြစ်မှု ထင်ရှားရင် သတင်းထောက် နှစ်ဦးဟာ ထောင်ဒဏ် နှစ်နှစ် အထက် ကျခံ ရနိုင်သလိုကျန်အမှု ဖြစ်တဲ့ ကွန်ပြူတာ ရာဇ၀တ်မှုနဲ့ ပြစ်မှု ထင်ရှား ရင်လည်း ထောင်ဒဏ် ငါးနှစ်နဲ့ ဒဏ်ငွေ ကျခံ ရနိုင် ပါတယ်။

ထိုင်းနိုင်ငံ၊ ဖူးခက် အခြေစိုက် Phuketwan အွန်လိုင်း သတင်း ဌာနက သတင်းထောက် နှစ်ဦး ဖြစ်တဲ့ Alan Morison နဲ့ Chutima Sidasathian တို့ နှစ်ဦးကို သူတို့ ရေးသား ခဲ့တဲ့ သတင်း တပုဒ် အတွက် ထိုင်းတော်ဝင် ရေတပ်မတော်က ဒီဇင်ဘာလ ၁၈ ရက်နေ့က တရား စွဲဆို ခဲ့တာ ဖြစ်ပါတယ်။

မြန်မာ နိုင်ငံ ကနေ လှေစီးပြီး ထွက်ပြေး ကြတဲ့ ရိုဟင်ဂျာတွေ အပေါ် ထိုင်းစစ်တပ်က အကျိုး အမြတ်တွေ ရယူ နေတယ် ဆိုတဲ့ ခေါင်းစဉ်နဲ့ သတင်း တပုဒ်ကို ဒီသတင်းထောက် နှစ်ဦးက ဇူလိုင်လ ၁၇ ရက်နေ့ က ရေးသားဖော်ပြခဲ့ကြတာပါ။ ဒီလိုတရားစွဲဆိုမှုကို CPJ သတင်းထောက် ကာကွယ်ရေး အဖွဲ့က လည်း ပြင်းပြင်း ထန်ထန် ဝေဖန် ခဲ့ပါတယ်။

ထိုင်းတော်ဝင် ရေတပ်မတော် အနေနဲ့ ဒီသတင်း ရေးသားသူ တွေကို တရား စွဲဆိုမှု လုပ်မယ့် အစား ဒီသတင်း အချက် အလက်တွေ မှန်ကန် နေသလား ဆိုတာကို ရေတပ်မတော် အတွင်း စုံစမ်း စစ်ဆေးမှု လုပ်သင့် ပါတယ်လို့ အမေရိကန် အခြေစိုက် သတင်းထောက် ကာကွယ်ရေး ကော်မတီ CPJ ရဲ့ အရှေ့တောင် အာရှ ဆိုင်ရာ အကြီးတန်း တာဝန်ခံ Shawn Crispin က ဆိုပါတယ်။

Comment ရေးရန်

Rohingya Exodus