နောက်ဆုံးသတင်း/ဆောင်းပါးများ

ဘူးသီးတောင်တွင် သန်းခေါင်စာရင်း ကောက်ရာ၌ ရဲများ ရိုင်းပျစွာ ဆက်ဆံ



RB News
31.3.2014

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်တွင် သန်းခေါင်စာရင်း ကောက်ယူရာတွင် လုံခြုံရေး တာဝန်ယူသည့် ရဲများက အလွန် ရိုင်းပျစွာ ဆက်ဆံခဲ့ကြောင်း သတင်း ရရှိပါသည်။

ဘူးသီးတောင်မြို့နယ်တွင် သန်းခေါင်စာရင်း ကောက်ယူမှုကို ၀က်မကြ၊ ပေါင်တောပြင်၊ ဆေးအိုးကျ ကျေးရွာ၊ ၀ရကျွန်း၊ ငကျဉ်တောက်၊ ဂူဖိ၊ ဂူဒါပြင်၊ ကြာညိုပြင်၊ သိမ်တောင်ပြင် ကျေးရွာ အုပ်စု များနှင့် အမှတ် (၄) ရပ်ကွက်တို့တွင် ယနေ့ ဆက်လက်၍ ပြုလုပ်ခဲ့သည်။

သန်းခေါင်စာရင်း ကောက်ယူရာတွင် စာရင်းကောက်များက ဒေသခံ ၅၀ ဦးခန့်ကို အိမ်တစ်အိမ် စုပြီး အမည်များကို မေး၍၊ လူမျိုးအမည်ကို ဆက်လက် မေးမြန်းရာတွင် ရိုဟင်ဂျာ လူမျိုးဟု ဖြေသဖြင့် စာရင်းမယူကြောင်း၊ ရေးမှတ်သည့် စာရွက်များမှာလည်း သာမာန် ကျောင်းသုံး ဗလာစာအုပ်မှ စာရွက်ပေါ်တွင်သာ ဖြစ်သည်ဟု ဒေသခံများက RB News သို့ပြောပါသည်။ အချို့ စာရင်းကောက်များက နေအိမ်ရှေ့မှ လူမျိုးအမည်ကို မေးပြီး ရိုဟင်ဂျာဟု ပြောလိုက်ပါက မမေးမြန်းတော့ဟု သိရှိရသည်။

စာရင်းကောက်များနှင့် အတူ လိုက်ပါလာသည့် လုံခြုံရေး ရဲများသည် ဒေသခံ ရိုဟင်ဂျာများကို အလွန် ရိုင်းပျစွာ ဆက်ဆံကြောင်း သိရှိရသည်။

“ရဲတွေက ကျွန်တော်တို့ ရိုဟင်ဂျာ လူမျိုးလို့ ပြောလိုက်ရင် -ီးရိုဟင်ဂျာလား၊ မင်းတို့ ရိုဟင်ဂျာ ရေးလို့ မရဘူးဆိုတာ နားမလည်ဘူးလား၊ ရိုဟင်ဂျာ မရှိဘူးကွလို့ ပြောပြီး အိမ်ရဲ့ တံခါးတွေကို ခြေထောက်နဲ့ ကန်တယ်။ ပြီးတော့ သေနတ်ပြတယ်။ အမျိုးမျိုး ညစ်ညမ်းတာတွေ သုံးပြီး ဆဲဆိုတယ်။ ရိုဟင်ဂျာလို့ ပြောတာနဲ့ ပြောတဲ့လူကို ဓါတ်ပုံ ရိုက်ယူတယ်။ ကျွန်တော်တို့က သည်းခံလို့သာ ပြဿနာ မတက်တာ။ ပြဿနာ ဖြစ်အောင် အမျိုးမျိုး ဖန်တီးတယ်” ဟု ဒေသခံ တစ်ဦးက RB News သို့ပြောပါသည်။

စာရင်းကောက်များသည် ရိုဟင်ဂျာ လူမျိုး မရှိဟု ဆိုကာ စာရင်းမှတ်ယူ သွားခြင်း မရှိသော်လည်း ရိုဟင်ဂျာ များ၏ နေအိမ်များတွင် နေ့လည်စာ သုံးဆောင် သွားသည့် အပြင် ၎င်းတို့၏ အသုံးစရိတ် ဆိုကာ အာဏာပိုင်များက ဓါးပြ သဖွယ် တောင်းခံသောကြောင့် အိမ်ထောင်စု တစ်စုလျှင် ငွေကျပ် ၂၀၀၀ စီပေးခဲ့ရကြောင်း ဒေသခံများက ပြောပါသည်။

Comment ရေးရန်

Rohingya Exodus