ကြိမ်ချောင်းတွင် အာဏာပိုင်နှင့် ပြည်သူ့စစ်က ငွေညှစ်၊ ကလေးငယ် တစ်ဦးကို ရဲမိသားစုက ရိုက်နှက်
MYARF
RB News
23.4.2014
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကြိမ်ချောင်း ကျေးရွာ အုပ်စုတွင် အုပ်ချုပ်ရေး ၀န်ထမ်းက ငွေညှစ်ခြင်း၊ ပြည်သူ့စစ် ခေါင်းဆောင်က အကြောင်းမဲ့ ဖမ်းဆီး၍ ငွေညှစ်ခြင်းနှင့် ကလေးငယ် တစ်ဦးက ရဲမိသားစုက ရိုက်နှက်ခြင်းများ ဖြစ်ပေါ်ခဲ့ကြောင်း သတင်း ရရှိပါသည်။
ဧပြီလ (၂၁) ရက်နေ့တွင် မောင်တောမြို့နယ် မြောက်ပိုင်း ကြိမ်ချောင်း ကျေးရွာအုပ်စု အုပ်ချုပ်ရေးမှူးရုံးမှ ရုံးစာရေး ဖြစ်သူ ဦးထွန်းဝင်းက ကြိမ်ချောင်း ကျေးရွာ အုပ်စု မြောက်ရွာမှ ဒေါ်ဒေါက်ယျားခါတူ (ဘ) ဦးအီလီယာစ် (အသက် ၃၆ နှစ်) ထံမှ ငွေကျပ် ၅ သောင်း ညှစ်ခဲ့ကြောင်း ဒေသခံ တစ်ဦးက RB News သို့ပြောပါသည်။ ဦးထွန်းဝင်းက ဒေါ်ဒေါက်ယျားခါတူကို နေအိမ်၏ ဟောင်းနွမ်း ပျက်စီး နေသည့် ၀ါးထရံ များကို ပြုပြင် နေသည်ဟု အကြောင်းပြ၍ အုပ်ချုပ်ရေးမှူးရုံးသို့ ဆင့်ခေါ်ပြီး ငွေကျပ် ၅ သောင်း မပေးပါက မြို့နယ် အုပ်ချုပ်ရေးမှူး ရုံးမှတဆင့် အရေးယူရန် ပြုလုပ်မည်ဟု ခြိမ်းခြောက်ပြီး ငွေညှစ်ခဲ့ခြင်း ဖြစ်ကြောင်း သိရှိရပါသည်။
ယနေ့ ဧပြီလ (၂၃) ရက်နေ့ နံနက် ၁၁ နာရီ အချိန်တွင် ကြိမ်ချောင်း ကျေးရွာ အုပ်စု မြောက်ရွာမှ နနွင်း၊ ပဲနှင့် ဟင်းသီးဟင်းရွက် ရောင်းဝယ်သော ဦးအာမီရ်ဂျာ (ဘ) ဦးကာလာမျာကို ရေနက်ငါးသား ကျေးရွာ အုပ်စု၊ ဒိုင်းနက်ရွာမှ ပြည်သူ့စစ် ခေါင်းဆောင် ဦးမောင်သာက နနွင်းရောင်းရန် ခေါ်သဖြင့် ဦးမောင်သာအိမ်သို့ လိုက်သွားရာ၊ အိမ်သို့အရောက်တွင် ကြိုးချည်၍ ရိုက်နှက် ညှဉ်းပန်း နှိပ်စက်ခဲ့သည်။ ထိုကဲ့သို့ ရိုက်နှက် ညှဉ်းပန်း နှိပ်စက် နေခြင်းကို ဦးအာမီရ်ဂျာ၏ ဆွေမျိုးများက သိရှိသွားပြီးနောက် ဦးမောင်သာကို ငွေကျပ် တစ်သိန်း ပေး၍ ပြန်လည် ခေါ်လာခဲ့ရကြောင်း ဒေသခံ တစ်ဦးက RB News သို့ပြောပါသည်။
ကြိမ်ချောင်း ကျေးရွာ အုပ်စု အလယ်ရွာရှိ ဗလီပိုင်မြေကို ကျူးကျော်၍ အိမ်ဆောက် နေသည့် ရဲအရာရှိ ဦးစိုးချေ၏ ဇနီး ဒေါ်သန်းသန်း (အသက် ၃၀ နှစ်) သည် အသက် (၈) နှစ် အရွယ် မောင်ရော်ဖိတ် (ဘ) ဦးကမာလ်ကို ဧပြီလ (၂၁) ရက်နေ့က လူမဆန်စွာ ခေါင်းကွဲသည့် အထိ တုတ်ဖြင့် ရိုက်နှက်ခဲ့သည်။ ဒေါ်သန်းသန်းသည် ဗလီပိုင်မြေကို ကျူးကျော်ရုံ သာမက ဗလီခြံဝင်း အတွင်းရှိ အိမ်သာကိုပါ ဖျက်၍ အိမ်ဆောက်ရန် စီစဉ်လျက် ရှိပြီး၊ မောင်ရော်ဖိတ် အိမ်သာ တက်နေစဉ်တွင် အကြောင်းမဲ့ ရိုက်နှက်ခဲ့ခြင်း ဖြစ်ကြောင်း ဒေသခံ တစ်ဦးက RB News သို့ပြောပါသည်။
ဗလီမြေပေါ်တွင် ကျူးကျော်၍ အိမ်ဆောက်နေခြင်းနှင့် ပတ်သက်၍ ဗလီ ဂေါပကများနှင့် ဒေသခံများက အာဏာပိုင်များကို အကြိမ်ကြိမ် တိုင်ကြားခဲ့သော်လည်း အရေးယူ ဆောင်ရွက် ပေးခြင်း မရှိသည့်အပြင် ကျေးရွာ အာဏာပိုင် များက ၀ိုင်းဝန်း အားပေးလျက် ရှိကြောင်း ဒေသခံများက ပြောပါသည်။
