တောင်ပြိုလက်ဝဲမှ ခရိုနီ (၃) ဦးကြောင့် ဒေသခံများ နစ်နာလျက်ရှိ
RB News
26.4.2014
တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင်၊ တောင်ပြိုလက်ဝဲ မြို့နယ်ခွဲ အတွင်းရှိ အာဏာပိုင် များ၏ ခရိုနီ (၃) ဦးကြောင့် ဒေသခံများ နစ်နာလျက်ရှိကြောင်း သတင်း ရရှိပါသည်။
တောင်ပြိုလက်ဝဲ မြို့နယ်ခွဲ၊ ကျွန်းပေါက်ပြုစု ကျေးရွာ အုပ်စု၊ ဖက်လိပြင် ကျေးရွာမှ ဦးမာမတ်အာမိန် (ဘ) ဦးနာဇိရ်ဟူစိန်းနှင့် ဦးအီဗြာဟိမ်း (ဘ) ဦးဘာသာမျာ တို့သည် ဒေသဆိုင်ရာ အာဏာပိုင်များ၏ လခစား တပည့်များ ဖြစ်ပြီး၊ အာဏာပိုင်များထံ သတင်းပေးလုပ်သူ များဖြစ်သည်။ ထိုသူနှစ်ဦးသည် ဆင်းရဲ နွမ်းပါးသည့် ဒေသခံများကို “မင်းတို့ကို လုပ်ချင်သလို လုပ်လို့ရတယ်၊ ငါတို့က ဒီဒေသမှာ ရှင်ဘုရင်တွေ ဖြစ်တယ်” ဟု ပြောဆိုလေ့ရှိပြီး၊ စော်ကားမှုများလည်း မကြာခဏ ပြုလုပ်ကြောင်း ဒေသခံ တစ်ဦးက RB News သို့ပြောသည်။
ဦးမာမတ်အာမိန်ကို တရားမ၀င် ဖုန်းကိုင်ဆောင်မှုဖြင့် ဖမ်းဆီးခဲ့သော်လည်း အမှတ် (၂) ရဲတပ်ရင်း တာဝန်ခံ ဒုရဲမှူးကြီး ရဲထူးလှိုင်က ငွေယူ၍ ပြန်လည် လွှတ်ပေးခဲ့ပြီး နောက်ပိုင်းတွင် ပိုမို အတင့်ရဲလာပြီး ယခုအခါ တစ်ရွာလုံး ပိုင်ဆိုင်သည့် ပုဇွန်ကန်ကို စစ်တပ် အတွက်ဟု ဆိုကာ တစ်ဦးတည်း ပိုင်ဆိုင်နိုင်ရန် ကြိုးစားလျက် ရှိကြောင်း ဒေသခံများက ပြောပါသည်။ ထိုကဲ့သို့ ကြိုးပမ်း နေမှုကြောင့် ဒေသခံ ရွာသားများက ၎င်းတို့၏ ပိုင်ဆိုင်မှုများ ဆုံးရှုံးရမည်ကို စိုးရိမ်လျက် ရှိကြသည်။
တောင်ပြိုလက်ဝဲ မြို့နယ်ခွဲ၊ လိပ်ရ ကျေးရွာ အုပ်စု မြောက်ရွာမှ ဦးအဘုလ်ကာဆိမ်း (ဘ) ဦးဖော်ကိရ်အာမတ်သည် ၂၀၁၄ ခုနှစ် ဇန်န၀ါရီလတွင် ဘူးသီးတောင်မြို့နယ် အကျဉ်းထောင်မှ လွတ်ငြိမ်းချမ်းသာခွင့်ဖြင့် လွတ်မြောက် လာခဲ့ပြီး၊ မြို့နယ်ခွဲ အုပ်ချုပ်ရေးနှင့် ဌာနဆိုင်ရာ အမည်တပ်၍ ကျွန်းပေါက် ဆင်အိုး ကျေးရွာမှ အုတ်ဖိုလုပ်ငန်း လုပ်ကိုင်သည့် ရွာသားများကို အုတ်လုပ်ငန်းများ၊ ထင်းခုတ်ခြင်းများ လုပ်ကိုင်ခိုင်းပြီး လုပ်အားခငွေ သိန်းပေါင်းများစွာကို မပေးသည့် အပြင် ခြိမ်းခြောက်လျက် ရှိကြောင်း ဒေသခံများက RB News သို့ပြောပါသည်။
ထို့အပြင် မြို့နယ်ခွဲ အုပ်ချုပ်ရေး၊ စ.ရ.ဖ၊ ရဲစခန်းနှင့် သတင်းတပ်ဖွဲ့ တို့က ၎င်းကို ကိုယ်စားလှယ် ခန့်အပ် ထားသည့်ဟု ဆိုကာ ပုဇွန်ကန် လုပ်ကိုင်သူ များထံမှ လစဉ် တာကာငွေ ၂၀၀၀ စီကောက်ခံလျက် ရှိသည်။ ၎င်းသည် ယခင် အစိုးရ လက်ထက်ကလည်း ယခုကဲ့သို့ အာဏာပိုင်များ၏ ကိုယ်စားလှယ် အဖြစ် လုပ်ကိုင်ခဲ့ရာ ၂၀၀၄ ခုနှစ်တွင် ဖမ်းဆီးခံခဲ့ရပြီး ထောင်ဒဏ် (၂၈) နှစ်ကျခဲ့ရာ ယခုနှစ်တွင် လွတ်ငြိမ်းချမ်းသာခွင့်ဖြင့် ပြန်လည် လွတ်မြောက် လာခဲ့သည်။ ယခုကဲ့သို့ အာဏာပိုင်များ၏ ကိုယ်စားလှယ်ဟု ဆိုကာ ငွေကြေးများ ကောက်ခံခြင်း၊ အလုပ်သမား များကို အလုပ်ခိုင်း၍ လုပ်အားခ မပေးခြင်း တို့ကြောင့် ဒေသခံများ နစ်နာလျက် ရှိသည့် အတွက် အထက် အာဏာပိုင်များက ပြင်းထန်စွာ အရေးယူ ပေးပါရန် တောင်းဆိုကြောင်း ဒေသခံများက ပြောပါသည်။
