သန်းခေါင်စာရင်းကို မကျေနပ်၍ န.စ.က ပုံစံအတိုင်း လုပ်မည်ဟု ခြိမ်းခြောက်မှုများ ပြုလုပ်နေ
Rohingya Eye
RB News
4.5.2014
မောင်တော ။ ။ ရခိုင်ပြည်နယ်၊ မောင်တောမြို့နယ်တွင် သန်းခေါင်စာရင်းတွင် အစိုးရ စိတ်တိုင်းကျ ဖြေမပေးသည်ကို မကျေနပ်၍ ယခင် န.စ.က ကနှိပ်စက်သည့် ပုံစံအတိုင်းမျိုး ပြုလုပ်မည်ဟု အာဏာပိုင်များက ခြိ်မ်းခြောက် ပြောဆိုမှုများ များပြားလာကြောင်း သတင်း ရရှိပါသည်။
မေလ (၂) ရက်နေ့တွင် မောင်တောမြို့နယ်၊ အလယ်သံကျော် ကျေးရွာရှိ အမှတ် (၇) နယ်မြေရုံးတွင် ယင်းနယ်မြေ အပိုင်ရှိ ကျေးအုပ် အုပ်ချုပ်ရေးမှူး များကို နယ်မြေ တာဝန်ခံ ရဲမှူးက ဆင့်ခေါ်၍ အစည်းအဝေး တစ်ရပ် ပြုလုပ်ခဲ့ကြောင်း သိရှိရပါသည်။ အဆိုပါ အစည်းအဝေးတွင် နယ်မြေ တာဝန်ခံ ရဲမှူးက ခြိမ်းခြောက် ပြောဆိုမှုများ ပြုလုပ် ခဲ့ကြောင်း ဒေသခံ တစ်ဦးက RB News သို့ပြောပါသည်။
“အစည်းအဝေးမှာ ရဲမှူးက မင်းတို့က တဖက်နိုင်ငံက ခိုးဝင်လာတဲ့ ဘင်္ဂါလီတွေ၊ မင်းတို့ကို ငါတို့ နိုင်ငံက သနားလို့ ကျွေးမွေး စောင့်ရှောက် ထားတာ၊ ငါတို့ ခွင့်ပြုချက် မပါဘဲ အိမ်ဆောက်ရင် အိမ်တွေကို ဖြိုပစ်မယ်၊ မင်းတို့ လက်ထပ်မယ် ဆိုရင်လည်း ခွင့်ပြုချက် ယူရမယ်၊ ဧည့်သည်တွေ အတွက် ဧည့်စာရင်း တိုင်ရမယ်၊ ငါတို့ ရှောင်တခင် ၀င်စစ်မယ်၊ အရင် န.စ.က က လုပ်တဲ့ ပုံစံ အတိုင်း ငါတို့ လုပ်သွားမယ် - လို့ ပြောပြီး အရင် န.စ.က လို ညှဉ်းပန်း နှိပ်စက်မှု တွေလုပ်မယ် ဆိုတဲ့ ပုံစံမျိုးနဲ့ ပြောသွားတယ်” ဟု ဒေသခံ တစ်ဦးက RB News သို့ပြောသည်။
ဒေသဆိုင်ရာ အာဏာပိုင်များသည် သန်းခေါင်စာရင်း ကာလ ပြီးမြောက်သည့် အချိန်မှ စ၍ ဒေသခံ ရိုဟင်ဂျာများက သန်းခေါင်စာရင်း ကောက်ခံရာတွင် အစိုးရ စိတ်တိုင်းကျ လူမျိုး အမည်ကို မပြောသဖြင့် ညှဉ်းပန်း နှိပ်စက်မှု များကို ပိုမို ပြုလုပ်လျက် ရှိသည်။ စစ်ဆေးရေး ဂိတ်များတွင် ရိုင်းပျစွာ ဆက်ဆံမှုများ ပိုမို များပြားလာပြီး၊ ငွေညှစ်မှု၊ ရိုက်နှက်မှုများ ပိုမို များပြား လာကြောင်း ဒေသခံများက ပြောပါသည်။
