တပ်ရင်း ၅၃၅ မှ ဗိုလ်ကြီးမျိုးမြင့်ကို၏ ရိုက်နှက်မှုကြောင့် လူငယ်တစ်ဦး ဆေးရုံတင်ထားရ
RB News
21.6.2014
တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင်၊ တောင်ပြိုလက်ဝဲ မြို့နယ်ခွဲ အခြေစိုက် တပ်ရင်း ၅၃၅ မှ ဗိုလ်ကြီးမျိုးမြင့်ကို၏ လူမဆန်စွာ ရိုက်နှက်မှုကြောင့် ဒေသခံ ရိုဟင်ဂျာ လူငယ် တစ်ဦးကို ဆေးရုံတင် ထားရကြောင်း သတင်း ရရှိပါသည်။
ဇွန်လ (၂၀) ရက်နေ့ ည ၉း၃၀ နာရီ အချိန်တွင် တောင်ပြိုလက်ဝဲ မြို့နယ်ခွဲ၊ ဇီးပင်ချောင်း ကျေးရွာ အုပ်စုတွင် လုံခြုံရေး တာဝန်ယူထားသည့် တပ်ရင်း ၅၃၅ မှ ဗိုလ်ကြီး မျိုးမြင့်ကိုနှင့် တပ်ဖွဲ့ဝင် ၁၀ ဦးခန့်တို့သည် ရွာအတွင်း ကင်းလှည့်ပြီး၊ ဦးဇာဟိတ်ဟူစိန်း (ဘ) ဦးအဒူရာမန်၏ နေအိမ်သို့ ဖုန်းရှာဖွေရန်ဟု အကြောင်းပြပြီး ၀င်ရောက် ရှာဖွေခဲ့သည်။ ဦးဇာဟိတ်ဟူစိန်း၏ နေအိမ်တွင် မည်သည့် ဖုန်းမှ ရှာဖွေမတွေ့ရှိခဲ့ဘဲ ပြန်ထွက်လာခဲ့ပြီးနောက် အဆိုပါ နေအိမ်၏ မနီးမဝေးတွင် ရွာ၏ ကင်းစောင့် တာဝန်ယူထားသည့် ဒေသခံ ရွာသား ကင်းသမား (၄) ဦးကို အကြောင်းမဲ့ လူမဆန်စွာ ရိုက်နှက် ခဲ့ကြောင်း ဒေသခံ တစ်ဦးက RB News သို့ပြောပါသည်။
ဗိုလ်ကြီးမျိုးမြင့်ကိုနှင့် အဖွဲ့၏ လူမဆန်စွာ ရိုက်နှက်မှုကြောင့် မိုဟာမတ်ရော်ဖိခ် (ဘ) မော်လ၀ီ ဦးမိုဟာမတ် (အသက် ၁၉ နှစ်) မှာ ပြင်းထန်စွာ ဒဏ်ရာ ရရှိခဲ့သည်။ ဖြစ်စဉ် အသေးစိတ်နှင့် ပတ်သက်၍ အမှတ် (၄) နယ်မြေ နယ်ခြားစောင့် ရဲတပ်ဖွဲ့ တာဝန်ခံ ရဲမှူး ဝေလင်းကိုထံ ဒေသခံများက သတင်းပေးပို့ခဲ့ပြီး၊ ရဲမှူး ဝေလင်းကိုက ပြင်းထန်စွာ ဒဏ်ရာရရှိခဲ့သည့် မိုဟာမတ် ရော်ဖိခ်ကို ကြိမ်ချောင်း တိုက်နက် ဆေးရုံသို့ ဆေးကုသရန် ဇွန်လ ၂၁ ရက်နေ့ နံနက် ၁ နာရီ အချိန်တွင် ပို့ဆောင် ပေးခဲ့ကြောင်း သိရှိရပါသည်။ ပြင်းထန်စွာ ဒဏ်ရာရရှိသွားသည့် မိုဟာမတ် ရော်ဖိခ်မှာ ဆင်းရဲနွမ်းပါးသူ တစ်ဦး ဖြစ်ပြီး ဆေးရုံတွင် ဆေးကုသမှု ခံယူလျက် ရှိသော်လည်း ဆေးဝါးခပင် တတ်နိုင်သည့် အခြေအနေ ရှိသူမဟုတ်ကြောင်း အဆိုပါ ဒေသခံမှ ပြောပါသည်။
“စစ်တပ်ရဲ့ တာဝန်က လုံခြုံရေး ယူပေးရုံ သက်သက်ပါ။ သူတို့ အနေနဲ့ ကင်းလှည့်ခွင့်သာ ရှိပြီး၊ ၀င်ရောက် ရှာဖွေတာတွေ၊ ကင်းသမားတွေရဲ့ တာဝန်ကို နှောက်ယှက်တာတွေ လုပ်ခွင့် မရှိဘူး။ လက်နက် အားကိုး လူမိုက်လုပ်သွားတာပါ” ဟု အဆိုပါ ဒေသခံမှ RB News သို့ပြောပါသည်။
