ချဲထိုးသည်ဟု နယ်ထိန်းရဲက မဟုတ်မမှန် စွပ်စွဲ၍ ငွေညှစ်
Rohingya Eye
RB News
28.6.2014
မောင်တော ။ ။ ရခိုင်ပြည်နယ်၊ မောင်တောမြို့နယ် ညောင်ချောင်း ကျေးရွာမှ ဒေသခံ ရိုဟင်ဂျာ တစ်ဦးကို နယ်ထိန်းရဲများက ချဲထိုးသည်ဟု မဟုတ်မမှန် စွပ်စွဲ၍ ငွေညှစ်ခဲ့ကြောင်း သတင်း ရရှိပါသည်။
ဇွန်လ (၂၄ ) ရက်နေ့တွင် မောင်တောမြို့နယ် တောင်ပိုင်း ညောင်ချောင်း ကျေးရွာမှ ဦးရှာကဲရ် (ဘ) ဦးအလီမော်ဒိန်း (အသက် ၃၅ နှစ်) သည် မောင်တောမြို့ပေါ်တွင် ဈေးဝယ်ရန် လာနေစဉ် နေ့လည် (၂) နာရီခန့်တွင် နယ်ထိန်းရဲများက ဖမ်းဆီး၍ ရဲစခန်း ရှေ့ဆိုင်တန်းများရှိ လဘက်ရည်ဆိုင်သို့ ခေါ်ဆောင် သွားခဲ့သည်။ ထို့နောက် နယ်ထိန်းရဲများက ဦးရှာကဲရ် ချဲထိုးသည်ဟု မဟုတ်မမှန် စွပ်စွဲ၍ ငွေကျပ် နှစ်သိန်း တိတိ ညှစ်ယူခဲ့ကြောင်း ဒေသခံ တစ်ဦးက RB News သို့ပြောပါသည်။
ဦးရှာကဲရ်သည် မည်သည့် အခါကမှ ချဲထိုးခြင်း၊ လောင်းကစားခြင်း မရှိခဲ့ဘဲ အကျင့် စာရိတ္တ ကောင်းမွန်သူ တစ်ဦး ဖြစ်သည်။ ၎င်းထံမှ ချဲထိုးထားသည့် ဖြတ်ပိုင်း၊ ချဲနှင့် သက်ဆိုင်သည့် အရာ တစ်စုံတစ်ခု မရရှိခဲ့ဘဲ၊ ရဲများဟူသည့် အာဏာ အရှိန်အ၀ါကို အသုံးချ၍ ငွေညှစ်ခဲ့ခြင်း ဖြစ်သည်။
မောင်တောမြို့နယ်ရှိ ဆန်းကြည်ဝင်း ဓါတ်ပုံဆိုင်တွင် ချဲဒိုင် လုပ်ငန်း လုပ်ကိုင်လျက် ရှိသော်လည်း ဖမ်းဆီး အရေးယူခြင်း မရှိသည့် အပြင် ရဲများကိုယ်တိုင် နေ့စဉ် သွားရောက်၍ ချဲထိုးနေကြောင်း အဆိုပါ ဒေသခံမှ ပြောပါသည်။ ဆိုင်ရှင် ဖြစ်သူမှာ အမှတ် (၂) ရပ်ကွက်တွင် နေထိုင်ပြီး၊ ရခိုင် လူမျိုး တစ်ဦး ဖြစ်သည်။ နယ်ထိန်း ရဲများသည် ဒေသခံ ရိုဟင်ဂျာ များကို မဟုတ်မမှန် လုပ်ကြံ စွပ်စွဲ၍ ငွေညှစ်လျက် ရှိသော်လည်း၊ ရခိုင်လူမျိုးများ ဥပဒေ ချိုးဖောက်ပါက ဥပဒေ မရှိသည့်ဟန်ဖြင့် အရေးယူခြင်း မရှိသည့် အပြင် အားပေး အားမြှောက်ပင် ပြုလုပ်လျက် ရှိသည်။
နယ်ထိန်းရဲများ၏ ခေါင်းဆောင်မှာ ဒုရဲအုပ် တိုးတိုး ဖြစ်ပြီး၊ မောင်တောမြို့ပေါ်သို့ နေ့စဉ် နေ့တိုင်း ဈေးဝယ်လာသူ များကို အကြောင်းမဲ့ အနှောက် အယှက်ပေးခြင်း၊ ဖမ်းဆီး၍ ငွေညှစ်ခြင်း၊ ဖမ်းဆီး၍ ချုပ်နှောင်ထားခြင်းများ မကြာခဏ ပြုလုပ်လျက် ရှိကြောင်း သိရှိရပါသည်။
