နောက်ဆုံးသတင်း/ဆောင်းပါးများ

နယ်ခြားစောင့် ရဲတပ်ဖွဲ့နှင့် အုပ်ချုပ်ရေးတို့ ပူးပေါင်း၍ အပြစ်မဲ့ တစ်ဦးကို ဖမ်းဆီးထား




RB News
20.6.2014

မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း၊ အလယ်သံကျော် ကျေးရွာ အုပ်စု၊ မောင်တူလာရွာမှ အပြစ်မဲ့ ရိုဟင်ဂျာ လူငယ်တစ်ဦးကို ကျေးရွာ အုပ်ချုပ်ရေးနှင့် နယ်ခြားစောင့် ရဲတပ်ဖွဲ့တို့ ပူးပေါင်း၍ ဖမ်းဆီး ထားကြောင်း သတင်း ရရှိပါသည်။

လွန်ခဲ့သည့် ဇန်န၀ါရီလတွင် မောင်တောမြို့နယ် အလယ်သံကျော် ကျေးရွာ အုပ်စု၊ မောင်တူလာရွာမှ ရော်ရှိတ်အာမတ် (ဘ) ဦးဇော်ဖော်ရ် အာမတ် (အသက် ၂၃ နှစ်) ၏ တူမနှင့် အလယ်သံကျော် ကျေးရွာ အုပ်ချုပ်ရေးမှူး၏ တပည့် ဖြစ်သူ ကျော်ဇေယျာဦးတို့၏ တူမတို့ ကလေး အချင်းချင်း စကားများခဲ့ကြရာ ရော်ရှိတ်အာမတ်က ကြားဝင်၍ ဖြေရှင်း ပေးခဲ့သည်။ ထိုကိစ္စနှင့် ပတ်သက်၍ ကျော်ဇေယျာဦးက မကျေနပ်ဘဲ ရော်ရှိတ်အာမတ်ကို ဆဲဆိုကြိမ်းမောင်းပြီး စကားများခဲ့သည်။ စကားများပြီး နောက်နေ့တွင် ရော်ရှိတ်အာမတ်၏ နေအိမ်သို့ ကျော်ဇေယျာဦးနှင့် အတူ ၎င်း၏ ညီအစ်ကို ၄ ဦး ရောက်ရှိလာပြီး ရော်ရှိတ်အာမတ်ကို အနိုင်ကျင့်ရန် ကြိုးစားခဲ့သော်လည်း ရော်ရှိတ်အာမတ်ကို မတွေ့ရှိသဖြင့် ခြံစည်းရိုးနှင့် အိမ်ထရံများကို ဓါးဖြင့် ခုတ်၍ ပြန်သွားခဲ့ကြသည်။

ကျော်ဇေယျာဦးသည် အုပ်ချုပ်ရေးမှူး၏ တပည့် တစ်ဦး ဖြစ်ပြီး ရွာသားများကို မကြာခဏ ညှဉ်းပန်း နှိပ်စက်လေ့ ရှိသောကြောင့် ရော်ရှိတ်အာမတ်မှာ နေအိမ်မှ ခဏ တိမ်းရှောင်နေစဉ် ကျော်ဇေယျာဦးက နောက်နောင် ရွာသို့ ပြန်လည် လာ၍ မရအောင် လုပ်ပစ်မည်ဟု ကြုံးဝါး၍ ကျော်ဇေယျာဦး ကိုယ်တိုင် မိမိအိမ်ကို မိမိ မီးရှို့ပြီး ရော်ရှိတ်အာမတ်မှ မီးတင်ရှို့သည်ဟု သတင်းလွှင့်ခဲ့သောကြောင့် ရော်ရှိတ်အာမတ်မှ ရွာမှ အပြီး ရှောင်တိမ်းခဲ့ရသည်။ ကျော်ဇေယျာဦးမှ မိမိအိမ်ကို မိမိ မီးရှို့ခဲ့သော်လည်း မီးရှို့ပြရုံသာ ဖြစ်ပြီး ပျက်စီးခြင်း လုံးဝမရှိခဲ့ဟု ဒေသခံ တစ်ဦးက RB News သို့ပြောပါသည်။

ကျော်ဇေယျာဦး၏ လုပ်ကြံမှုကြောင့် ရော်ရှိတ်အာမတ်သည် တက္ကသိုလ် ၀င်တန်း စာမေးပွဲပင် မဖြေဆိုခဲ့ရဘဲ အိုမင်းနေသည့် မိဘများကို ထား၍ မတရားဖိနှိပ်ခံရမှုမှ ကင်းဝေးရန် ထွက်ပြေး တိမ်းရှောင် သွားခဲ့ရသည်။ ကျော်ဇေယျာဦးက ရော်ရှိတ်အာမတ် တစ်ဦးတည်းကို လုပ်ကြံရုံသာမက ရော်ရှိတ်အာမတ်၏ မိတ်ဆွေ (၇) ဦးကိုပါ ၎င်း၏ နေအိမ်ကို မီးရှို့သည်ဟု စွပ်စွဲခဲ့သည်။ ထိုကဲ့သို့ မတရား စွပ်စွဲခံရသူ (၇) ဦးထဲမှ (၆) ဦးသည် ငွေကြေး တတ်နိုင်သူများ ဖြစ်သောကြောင့် ကျေးရွာ အုပ်ချုပ်ရေးမှူး ဦးမောင်သက်နိုင်ကို ငွေသိန်းချီ ပေးပြီး မတရား ဖမ်းဆီးခံရမည့် အရေးမှ လွတ်မြောက်ခဲ့သည်။ သို့သော်လည်း ကျော်ဇေယျာဦး၏ လုပ်ကြံ စွပ်စွဲခံရမှုတွင် ပါဝင်သူ တစ်ဦး ဖြစ်သည့် မော်လ၀ီ နူရ်အာလမ် (ဘ) ဦးမိုဟာမတ်အာရော်ဖ် (အသက် ၂၈ နှစ်) သည် ဆင်းရဲသူ တစ်ဦး ဖြစ်ပြီး ငွေကြေး မပေးနိုင်ခဲ့သောကြောင့် ကျော်ဇေယျာဦး၏ အငြိုးထားမှုကို ခံခဲ့ရသည်။

ယမန်နေ့ (ဇွန်လ ၁၉) နေ့လည် ၃ နာရီ အချိန်တွင် မောင်တူလာ ရွာသား မော်လ၀ီ နူရ်အာလမ်သည် အလယ်သံကျော် ဈေးရှိ လဘက်ရည်ဆိုင်တွင် လဘက်ရည် ထိုင်သောက်နေစဉ် ကျော်ဇေယျာဦး ရောက်ရှိလာပြီး၊ နယ်ခြားစောင့် ရဲတပ်ဖွဲ့ကို ဖုန်းဆက် အကြောင်းကြား ခဲ့သည်။ နယ်ခြားစောင့် ရဲတပ်ဖွဲ့ဝင် (၈) ဦး ရောက်ရှိလာပြီး မော်လ၀ီ နူရ်အာလမ်ကို လူအများရှေ့တွင် လူမဆန်စွာ ရိုက်နှက်ပြီး လက်ထိပ်ခတ်၍ နယ်မြေရုံးသို့ ဖမ်းဆီးခေါ်ဆောင် သွားခဲ့ကြောင်း ဒေသခံ တစ်ဦးက RB News သို့ပြောပါသည်။

ကျော်ဇေယျာဦးသည် အလယ်သံကျေးရွာ အုပ်စု အတွင်းရှိ ရွာများတွင် မတရားမှုများစွာကို ဦးဆောင် ပြုလုပ်နေသူ တစ်ဦး ဖြစ်ပြီး၊ မော်လ၀ီ နူရ်အာလမ်က ကျော်ဇေယျာဦးနှင့် ရဲတပ်သား သုံးဦးတို့ ဓါးပြတိုက်သည့် ကိစ္စကို စ.ရ.ဖ ရုံးသို့ တိုင်တန်းသည့် ကိစ္စကိုလည်း အငြိုးထားကာ ယခုကဲ့သို့ လုပ်ကြံ ဖမ်းဆီးခြင်း ဖြစ်သည်ဟု ဒေသခံများက ဆိုသည်။

ကျော်ဇေယျာဦး၏ လူမဆန်စွာ ညှဉ်းပန်းနှိပ်စက်မှု၊ ငွေညှစ်မှုများနှင့် ပတ်သက်၍ RB News တွင် အကြိမ်ကြိမ် ဖော်ပြခဲ့ပြီး ဖြစ်သလို၊ ခရိုင်၊ မြို့နယ် အုပ်ချုပ်ရေးမှူး ရုံးများနှင့် ဒေသ ဆိုင်ရာ အာဏာပိုင်များကို တိုင်တန်းခဲ့သော်လည်း လုံးဝ အရေးယူ ဆောင်ရွက် မပေးဘဲ၊ အာဏာပိုင်များ ကိုယ်တိုင် ဒေသခံများကို ညှဉ်းပန်း နှိပ်စက် နိုင်ရန် လွှတ်ပေး ထားသည်ကို လေ့လာ တွေ့ရှိရပါသည်။

Comment ရေးရန်

Rohingya Exodus