နောက်ဆုံးသတင်း/ဆောင်းပါးများ

မောင်တော ခရိုင်ရှိ ကျောင်းများတွင် စာသင်ကြားမှု လုံးဝ မရှိသဖြင့် ကျောင်းသားများ အခက်တွေ့

RB News
5.7.2014

ဘူးသီးတောင် ။ ။ ရခိုင်ပြည်နယ် မြောက်ပိုင်း၊ မောင်တောခရိုင် အတွင်းရှိ မြို့နယ်များမှ အစိုးရ ကျောင်းများတွင် ကျောင်းဆရာ/မမျာ လာရောက်၍ စာသင်ကြား ပေးခြင်း မရှိသဖြင့် ကျောင်းသားများ အခက်တွေ့လျက် ရှိကြောင်း သတင်း ရရှိပါသည်။

“ကျွန်တော်တို့ မောင်တော ခရိုင် အတွင်းမှာရှိတဲ့ ဘူးသီးတောင်နဲ့ မောင်တောမြို့နယ်က ကျောင်းတွေမှာ အခု အချိန်ထိ ပုံနှိပ်စာအုပ်တွေ၊ ဗလာ စာအုပ်တွေ မဝေသေးဘူး။ ကျောင်းဖွင့်တာ တစ်လကျော်ပြီ၊ ဘယ်တော့ ရောက်လာမလဲ ဆိုတာလည်း မသိဘူး။ အစိုးရကျောင်းတွေမှာ အလယ်တန်းကျောင်းထိ ပညာရေး အခမဲ့လို့ ပြောထားတာ ရှိပါတယ်။ ဒီဘက်မှာ ငွေကြေး တတ်နိုင်တဲ့လူနည်းပြီး၊ ငွေကြေး မတတ်နိုင်သူတွေ များတော့ မိဘတိုင်းက ကျောင်းသားတွေ လိုအပ်တဲ့ ပုံနှိပ်စာအုပ်နဲ့ ဗလာစာအုပ် တွေကို အပြင်ကနေ ၀ယ်ပေးဖို့ မဖြစ်နိုင်ဘူး။ အဲဒီတော့ အစိုးရက ပေးမှာကို မျှော်နေကြတယ်။ ကျောင်းဖွင့်တာ တစ်လကျော် သွားပေမယ့် ပုံနှိပ်စာအုပ်နဲ့ အခြားသော စာရေး ကိရိယာတွေ မရသေးတဲ့ အတွက် ပညာသင်ဖို့ အထောက် အကူဘာမှ မရှိဘူး ဖြစ်နေတယ်” ဟု ဘူးသီးတောင်မြို့ ဒေသခံ တစ်ဦးက RB News သို့ပြောပါသည်။

ဘူးသီးတောင်မြို့မှ အခြားသော ဒေသခံ တစ်ဦးက “ပြည်နယ် ၀န်ကြီး ဦးမောင်စံရွှေက ကျောင်းတွေ မဖွင့်ခင်မှာ အစည်းအဝေး လုပ်တယ်။ ပညာရေး ၀န်ထမ်းတွေကို ပညာရေးကို သေချာ ကျပ်မတ်ပြီး သင်ကြားပေးဖို့ မှာကြားခဲ့ပါတယ်။ ဒါပေမယ့် အခု ဖြစ်နေတာက ၀န်ကြီး ဦးမောင်စံရွှေ မှာကြားတာနဲ့ ပြောင်းပြန် ဖြစ်နေပါတယ်။ လူကြီး ခရီးစဉ် ရှိတယ်ဆိုရင် ကျောင်းဆရာ/မ တွေအားလုံး ကျောင်းတက်ကြတယ်။ လူကြီး ခရီးစဉ် ရှိတဲ့ နေ့တစ်ရက်ထဲ ကျောင်းမှာ ဆရာဆိုတာ မြင်နေရတယ်။ မြို့နယ် ပညာရေးမှူးရုံးက လူကြီး ခရီးစဉ် ရှိတဲ့နေ့ဆိုရင် ဆရာမတွေကို ကြိုတင် အကြောင်းကြား ထားတယ်။ မြို့နယ် ပညာရေးမှူး ကိုယ်တိုင်က အခုလို ပညာမသင်ကြား ပေးရေး ကိစ္စမှာ ပူးပေါင်း ပါဝင်နေတာ ဖြစ်ပါတယ်။ ဆရာမတွေ ကျောင်းလာတဲ့ ရက်တွေမှာ ဆိုရင်လည်း ငွေကောက်ရုံက လွဲပြီး ဘာမှ မလုပ်ဘူး။ ဟိုကြေး၊ ဒီကြေးဆိုပြီး ကောက်တာတွေ မနည်းဘူး” ဟု ပြောပါသည်။

ရသေ့တောင် မြို့နယ်တွင် ပညာသင်ကြားရေး အတွက် အခက်အခဲ ဖြစ်နေသည့် ကျောင်းသား များမှာ ဘူးသီးတောင် မြို့နယ် ညောင်ချောင်းရှိ တွဲဖက် အထက်တန်းကျောင်းတွင် ပညာသင်ကြားရန် ကြိုးစားနေ ကြသော်လည်း အဆိုပါ ကျောင်းမှ ကျောင်းအုပ် ဆရာမကြီးက ကျောင်းဝင်ခွင့် မပေးသဖြင့် ပညာသင်ကြား၍ မရဖြစ်နေသည်ဟု ရသေ့တောင်မှ ဒေသခံ တစ်ဦးက ပြောပါသည်။

မောင်တောမြို့နယ်မှ ဒေသခံ တစ်ဦးက “ကျွန်တော်တို့ ကျွန်းခေါင်းရွာမှာ မူလတန်းလွန် ကျောင်းလေး တစ်ကျောင်း ရှိပါတယ်။ အဲဒီကျောင်းမှာ ကျောင်းသား/သူ ပေါင်း ၁၅၀၀ နီးပါး ရှိပြီး၊ ဆရာ/မ ၆ ယောက် ရှိပါတယ်။ ကျောင်းအုပ်ကြီးက ဦးမင်းအောင် ဖြစ်ပါတယ်။ ဆရာ/မ တွေထဲမှာ ၅ ယောက်က ရခိုင် လူမျိုးပါ။ ရိုဟင်ဂျာ ဆရာ တစ်ယောက်ဘဲ ပါတယ်။ အဲဒီ ရခိုင်လူမျိုး ဆရာ/မ ၅ ယောက် စလုံး ကျောင်းကို လုံးဝ မလာဘူး။ အဲဒီတော့ ကျောင်းသား/သူ ၁၅၀၀ ကျော်ကို ဆရာ တစ်ယောက်ထဲနဲ့ စာသင်ဖို့ ဆိုတာ လုံးဝ မဖြစ်နိုင်ဘူး။ ကျောင်းသား/သူတွေရဲ့ ပညာရေး အလွန်ကို နစ်နာ နေပါတယ်” ဟု RB News သို့ပြောပါသည်။

၎င်းက ဆက်လက်၍ “လွန်ခဲ့တဲ့နှစ်ကလည်း ရခိုင်လူမျိုး ဆရာမတွေ မလာလို့ ရွာထဲက ရိုဟင်ဂျာ ဆရာ ၉ ယောက်က ကလေးတွေကို စာသင်ပေးခဲ့ ပါတယ်။ လစာပေးမယ် ဆိုပြီး ကျောင်းအုပ်ကြီး ဦးမင်းအောင်က ခန့်ခဲ့ပေမယ့် နောက်ဆုံးမှာ တစ်နှစ်လုံး ဘာလစာ တစ်ပြားမှ မရခဲ့ကြဘူး။ အခု ဒီနှစ်လည်း ဦးမင်းအောင်က အဲဒီဆရာတွေကို ပြန်ခေါ်နေတယ်။ ဒါပေမယ့် ဆရာတွေက မနှစ်ကလို အလကား မသင်နိုင်ဘူးလို့ အကြောင်း ပြန်လိုက်ပါတယ်။ ဘာကြောင့် အဲဒီလို အကြောင်းပြန်လိုက်လည်း ဆိုတော့ ကျောင်းအုပ်ကြီးက အစိုးရဆီက ကျောင်းအတွက် လိုအပ်တဲ့ ထောက်ပံ့ကြေး၊ ဆရာတွေ အတွက် လစာတွေ ရနေတဲ့ အပြင်၊ UNICEF ကလည်း ထောက်ပံ့ကြေး တစ်ချို့ ရပါတယ်။ အဲဒီတော့ ကျေးရွာက ဆရာတွေကို အသုံးချပြီး ငွေရှာတဲ့ အတွက် ရိုဟင်ဂျာ ဆရာတွေက ငြင်းလိုက်တာ ဖြစ်ပါတယ်။ လွန်ခဲ့တဲ့ အပတ်က ကလည်း မြို့နယ် အုပ်ချုပ်ရေးက ကျောင်းခြံစည်းရိုး ပြင်ဖို့ ဆိုပြီး ဦးမင်းအောင်ကို ငွေ ၁၀ သိန်း ပေးလိုက်ပါတယ်။ အဲဒီငွေနဲ့ ခြံစည်းရိုး ပြင်ဖို့ အစီအစဉ် မရှိဘူး။ ဦးမင်းအောင် အလွဲသုံးစား လုပ်လိုက်မှာ ဖြစ်ပါတယ်” ဟု ပြောပါသည်။

သမ္မတ ဦးသိန်းစိန်က ရခိုင်ပြည်နယ်တွင် ပညာရေး မြင့်မားရန် လုပ်ဆောင်ပေး ရမည်ဟု လစဉ် မိန့်ခွန်းများတွင် ထည့်သွင်း ပြောကြားခဲ့သော်လည်း တကယ့် လက်တွေ့တွင် ပြောင်းပြန် ဖြစ်နေပြီး၊ ပညာရေး အခြေအနေမှာ အဆိုးရွားဆုံး အခြေအနေသို့ ရောက်ရှိ နေပါသည်။ ထို့ကြောင့် နေပြည်တော် အစိုးရ ကိုယ်တိုင် စုံစမ်း စစ်ဆေး၍ အရေးယူ ဆောင်ရွက် ပေးရန် အထူး လိုအပ်လျက် ရှိသည်ဟု ဒေသခံများက ဆိုသည်။

MYARF မှ အချက်အလက် ကူညီပံ့ပိုးသည်။ 

Comment ရေးရန်

Rohingya Exodus