လူသတ်မှု တစ်ခုကြောင့် မဆိုင်သူများကို ဖမ်းဆီး၍ ငွေညှစ်လျက်ရှိ
RB News
7.7.2014
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် လက်ဝဲဒက်ပြင်ရှည် အုပ်စုတွင် ဖြစ်ပွားခဲ့သည့် လူသတ်မှုနှင့် ပတ်သက်ပြီး၊ မသက်ဆိုင်သူ များကို ဖမ်းဆီး၍ ငွေညှစ်လျက် ရှိကြောင်း သတင်း ရရှိပါသည်။
ဇူလိုင် (၄) ရက်နေ့ မတိုင်မှီ ရက်ပိုင်းတွင် ဘူးသီးတောင်မြို့နယ် လက်ဝဲဒက် ပြင်ရှည် အုပ်စု၊ ကျောက်လှပြင် ကျေးရွာ၌ ဖြစ်ပွားခဲ့သည့် ဦးမာမတ်ကာဆိမ်း (ဘ) ဦးမာမတ်ဆူဘေဟန်ကို အမည်မသိသူ များက သတ်ဖြတ်မှုနှင့် ပတ်သက်၍ ဘူးသီးတောင်မြို့နယ် မြို့မ ရဲစခန်းမှ စခန်းမှူး ဒုရဲမှူး တင်လှနှင့် ဒုရဲအုပ် ကျော်လှတို့သည် ကျေးရွာ အတွင်းမှ အပြစ်မဲ့ အမျိုးသမီး ၁၃ ဦးကို ဖမ်းဆီး၍ စစ်ဆေးမှုများ ပြုလုပ်ပြီး ပြန်လည် လွှတ်ပေးခဲ့သော်လည်း စစ်ဆေးသည့် အခါတွင် မဖွယ်မရာများ ပြုလုပ်ခဲ့ကြောင်း ဒေသခံ တစ်ဦးက RB News သို့ပြောပါသည်။
ထို့အပြင် ကျေးရွာတွင်းရှိ မူလတန်းကျောင်းတွင် စေတနာဖြင့် ကျောင်းဆရာ လုပ်နေသည့် ဆရာ (၄) ဦးကို ဖမ်းဆီး ချုပ်နှောင်ခဲ့ပြီး တစ်ဦးထံမှ ငွေကျပ် ၇၀၀၀၀/- စီ ညှစ်ယူ၍ ပြန်လည် လွှတ်ပေးခဲ့ကြောင်း အဆိုပါ ဒေသခံမှ ပြောပါသည်။
ယနေ့ (ဇူလိုင်လ ၇) ညပိုင်းတွင် ကျေးရွာ အတွင်း ကင်းစောင့်သည့် ကင်းသမား (၂၃) ဦးကို ဖမ်းဆီး စစ်ဆေးမည်ဟု အကြောင်းကြား ထားကြောင်း သိရှိရပါသည်။
အသတ်ခံရသူ ဦးမာမတ်ကာဆိမ်း၏ နေအိမ်တွင် မိသားစုဝင်များ မရှိတော့သဖြင့် နေအိမ်ရှိ ပစ္စည်းများကို ကျေးရွာ အုပ်ချုပ်ရေးမှူးနှင့် ရာအိမ်မှူး၊ ဆယ်အိမ်မှူးများ ထုခွဲရောင်းချရန် စီစဉ်လျက် ရှိကြောင်း ဒေသခံများက ပြောပါသည်။ ဦးမာမတ်ကာဆိမ်းတွင် သားတစ်ဦး ဖြစ်သူ ရှိသော်လည်း အမွေရမည့်သူကို မပေးဘဲ၊ ကျေးရွာ အုပ်ချုပ်ရေး အာဏာကို အလွဲသုံးစား ပြုလုပ်၍ ငွေရှာရန် ကြံရွယ် နေခြင်း ဖြစ်သည်ဟု ၎င်းတို့က ပြောပါသည်။
