နယ်ခြားစောင့် ရဲတပ်ဖွဲ့ဝင်များက လမ်းသွားလမ်းလာ များကို ရိုက်နှက် ငွေညှစ်နေ
MYARF
RB News
18.7.2014
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်းရှိ ကျေးရွာများတွင် နယ်ခြားစောင့် ရဲတပ်ဖွဲ့ဝင်များက လမ်းသွားလမ်းလာ များကို အကြောင်းမဲ့ ရိုက်နှက် ညှဉ်းပန်း နှိပ်စက်၍ ငွေညှစ်မှုများ ပြုလုပ်လျက် ရှိကြောင်း သတင်း ရရှိပါသည်။
မောင်တောမြို့နယ် တောင်ပိုင်း သရေကုန်းဘောင် ကျေးရွာ အုပ်စု၊ ရွာသစ် (နတလ) ရွာရှိ ဘုန်းကြီးကျောင်း၌ အစောင့်ချ ထားသည့် နယ်ခြားစောင့် ရဲတပ်ဖွဲ့ဝင် များသည် လမ်းမပေါ်သို့ ထွက်၍ ကင်းစောင့် လေ့ရှိပြီး၊ လမ်းမှ ဖြတ်သန်း သွားလာသည့် ဒေသခံ ရိုဟင်ဂျာများကို စစ်ဆေး၍ ပါလာသည့် ငွေ၊ ပစ္စည်းများကို လုယက်သည့် အပြင် အကြောင်းမဲ့ ရိုက်နှက်ခြင်းများ ပြုလုပ်လျက် ရှိကြောင်း ဒေသခံ တစ်ဦးက RB News သို့ပြောပါသည်။ ဆိုင်ကယ် စီးနင်း သွားသူများကိုလည်း နယ်ခြားစောင့် ရဲတပ်ဖွဲ့၏ တာဝန်နှင့် မသက်ဆိုင်သည့် လိုင်စင် စစ်ဆေးခြင်း၊ ဆိုင်ကယ် ဦးထုပ် မပါသူများကို ဦးထုပ် မပါဟူ၍ လည်းကောင်း၊ အကြောင်း အမျိုးမျိုး ခေါင်းစဉ်တပ်၍ ငွေညှစ်လျက်ရှိသည်။
ဆိုင်ကယ် တက္ကစီများကိုလည်း စစ်ဆေးခြင်းများ ပြုလုပ်ပြီး ငွေကျပ် ၅၀၀၀/- မှ ငွေကျပ် ၁၀၀၀၀/- အထိ ညှစ်ယူလျက် ရှိကြောင်း သိရှိရပါသည်။ တက္ကစီကားများ၏ ယာဉ်မောင်းများ၊ စပယ်ယာများကိုလည်း ရိုက်နှက်ခြင်း၊ ခရီးသည်များကို စစ်ဆေး၍ ပါလာသည့် ငွေ၊ ပစ္စည်းများကို လုယက်ခြင်းများ နေ့စဉ်နှင့်အမျှ ပြုလုပ်လျက် ရှိကြောင်း အဆိုပါ ဒေသခံမှ ပြောပါသည်။
အလားတူ မောင်တောမြို့နယ်မှ ဘဂုံးနား ကျေးရွာ အုပ်စု၊ နူရူလ္လာရွာရှိ နယ်ခြားစောင့် ရဲတပ်ဖွဲ့ ကင်းစခန်းနှင့် ဇော်မတတ် ကျေးရွာရှိ တံတား ကင်းစခန်းများမှ နယ်ခြားစောင့် ရဲတပ်ဖွဲ့ဝင်များကလည်း သရေကုန်းဘောင်ရှိ နယ်ခြားစောင့် ရဲတပ်ဖွဲ့ဝင်များ နည်းတူ ပြုလုပ်လျက် ရှိကြောင်း သိရှိရပါသည်။
