အမေရိကန်နိုင်ငံ Ferguson မြို့ ကာဖျူးထုတ်

17.8.2014

အမေရိကန် ပြည်ထောင်စု Missouri ပြည်နယ် အုပ်ချုပ်ရေးမှူး Jay Nixon က St. Louis မြို့နယ် စီရင်စု ထဲက Ferguson မြို့မှာ အရေးပေါ် အခြေအနေ ကြေညာလိုက်ပြီး ညမထွက်ရ အမိန့် ထုတ်ပြန် လိုက်ပါတယ်။

ရဲရဲ့ ပစ်ခတ်မှုကြောင့် African American ဆယ်ကျော်သက် တယောက် August လ ၉ ရက်နေ့က သေဆုံးခဲ့ ပြီးနောက် ဆန္ဒပြ ဆူပူ လုယက်မှုတွေ သောကြာနေ့ ညအထိ ဆက်လက် ဖြစ်နေတဲ့ အတွက် ခုလို အရေးပေါ် အခြေ အနေ ထုတ်ပြန် ခဲ့တာပါ။

ခုလို အရေးပေါ် အခြေအနေ ထုတ်ပြန် ရတာဟာ ဆန္ဒပြသူ တွေရဲ့ အသံတိတ် သွားအောင် လုပ်တာ မဟုတ်ဘဲ လူမှု အသိုင်း အဝိုင်း အတွက် အန္တရာယ် ရှိတဲ့ လက်တဆုတ်စာ လုယက်သူ တွေကို ထိန်းသိမ်းနိုင်ဖို့ ဖြစ်တယ်လို့ ပြည်နယ် အုပ်ချုပ်ရေးမှူး Nixon က စနေနေ့က ပြောကြား ခဲ့ပါတယ်။
ငြိမ်းချမ်းမှုနဲ့ တရားမျှတမှု ပေါ်ပေါက်ရေး အတွက် အသေအချာ လုပ်သွားဖို့လည်း သူက အာမခံ ခဲ့ပါတယ်။ သောကြာနေ့ တုန်းက ဆိုင်တွေကို ဖျက်ဆီး လုယက် ကြတဲ့ သူတွေကို တားနိုင်ဖို့ ကြိုးစားခဲ့တဲ့ ပြည်သူ တွေကိုလည်း အုပ်ချုပ်ရေးမှူးက ကျေးဇူးတင် ခဲ့ပါတယ်။

ရဲရဲ့ ပစ်ခတ်မှုကြောင့် ၁၈ နှစ်အရွယ် Michael Brown မသေဆုံးခင် သူဟာ ကုန်စုံဆိုင်လေး တခုမှာ လုယက်ပြီး ဆိုင်ဝန်ထမ်းကို ခြိမ်းခြောက် နေပုံရတဲ့ Video အပါအဝင် သေဆုံးမှု အစီရင်ခံစာကို Ferguson ရဲတပ်ဖွဲ့က သောကြာနေ့က ထုတ်ပြန်ခဲ့ ပြီးနောက်မှာ အကြမ်းဖက်မှုတွေ ထပ်ဖြစ်ခဲ့တာပါ။ အခင်း ဖြစ်ခဲ့တဲ့ ကုန်စုံဆိုင်နားမှာ သောကြာနေ့က လူတွေ စုဝေးခဲ့ပြီး အဲဒီထဲက တချို့က ဆိုင်တော်တော် များများကို ဖျက်ဆီး လုယက်ခဲ့ ကြပါတယ်။ ဒါကို ဆန္ဒပြ နေသူတွေက တားဆီးဖို့ ကြိုးစား ခဲ့တာ ဖြစ်ပါတယ်။

ပြဿနာဖြစ်တဲ့ နေရာကို ရောက်လာတဲ့ အဓိကရုဏ်း နှိမ်နှင်းရေး ရဲတွေကို ဆန္ဒပြသူ တချို့က ပုလင်းတွေ တခြား အရာတွေနဲ့ ပစ်ပေါက် ခဲ့ကြပါတယ်။