နောက်ဆုံးသတင်း/ဆောင်းပါးများ

လူဦးရေ စာရင်းကို အကြောင်းပြု၍ BGP များက ရိုက်နှက်၊ လုယက်မှုများ ပိုမိုပြုလုပ်လျက်ရှိ




MYARF
RB News
8.9.2014

မောင်တော ။ ။ ရခိုင်ပြည်နယ်၊ မောင်တောမြို့နယ်ရှိ ကျေးရွာများသို့ နယ်ခြားစောင့် ရဲတပ်ဖွဲ့နှင့် မ.က.ဖ အဖွဲ့ဝင်များ ၀င်ရောက်၍ လူဦးရေ စာရင်း ကောက်ခံခြင်းကို အကြောင်းပြပြီး ရိုက်နှက်၊ လုယက်မှုများကို ပိုမို ပြုလုပ်လျက် ရှိကြောင်း သတင်း ရရှိပါသည်။

သြဂုတ်လ (၂၉) ရက်နေ့ နေ့လည်ပိုင်းတွင် အင်အား ၂၀ ကျော်ရှိ နယ်ခြားစောင့် ရဲတပ်ဖွဲ့ဝင် များနှင့် မ.က.ဖ အဖွဲ့ဝင် များသည် မောင်တောမြို့နယ် မြောက်ပိုင်း သရက်အုပ် ကျေးရွာ အုပ်စု အာရှိတ်ဂျာရွာသို့ ရောက်ရှိလာပြီး၊ ကျေးရွာ အုပ်ချုပ်ရေးမှူး ဦးထွန်းမောင်၊ ကျေးရွာ တာဝန်ခံ ဦးဇာဖောရ် (ဘ) ဦးမာတူးနှင့် အုပ်ချုပ်ရေးမှူး၏ အကူများ ဖြစ်သော ဦးဒိလ်မာမတ် (ဘ) ဦးဆော်ဂူးရူး၊ ဦးအာမတ်၊ ဦးဇူဘိုင်ရ် (ဘ) ဦးဒါနူ၊ ဦးမာမတ်ရှောရိဖ် (ဘ) ဦးဒေါ်လိလ်၊ ဦးအဒူမူနာဖ် (ဘ) ဦးမာဆောင်း၊ ဦးယာစီးန် (ဘ) ဦးဇော်ကော်ရီယာ တို့နှင့် ပူးပေါင်း၍ စာရင်းကောက်ခံခဲ့ရာ၊ ရွာမှ အမျိုးသားများသည် ဘင်္ဂလီ အမည်ဖြင့် အတင်း အဓမ္မ အစစ်ဆေးခိုင်းမည်ကို စိုးရိမ်၍ တိမ်းရှောင် သွားခဲ့သည်။ သို့သော်လည်း လူမဆန်သည့် စစ်ဆေးရေး အဖွဲ့က ခြံဝင်းဂိတ်များ၊ အိမ်တံခါးများ ဖျက်ဆီး၍ နေအိမ်များ အတွင်းသို့ ၀င်ရောက်ပြီး အမျိုးသမီးများကို ရိုက်နှက်၍ လမ်းမများပေါ်သို့ ခေါ်ထုတ် လာခဲ့သည်။ ထို့နောက် အမျိုးသမီးများကို အတင်း အဓမ္မ စစ်ဆေးရန် စာရင်း ကောက်ခံခဲ့သည့် အပြင် နေအိမ်များ အတွင်းမှ အဖိုးတန် ပစ္စည်းများ လုယက် သွားခဲ့ကြောင်း ဒေသခံ တစ်ဦးက RB News သို့ပြောပါသည်။

အလားတူ သြဂုတ်လ (၃၀) ရက်နေ့တွင် စစ်ဆေးရေး အဖွဲ့သည် သရက်အုပ် ကျေးရွာ အုပ်စု၊ အဘော်ဂျာရွာသို့ ၀င်ရောက်၍ စစ်ဆေးရန် ကြိုးစားရာ ရွာမှ အမျိုးသားများ တိမ်းရှောင် သွားခဲ့သည်။ နယ်ခြားစောင့် ရဲတပ်ဖွဲ့ဝင် များနှင့် မ.က.ဖ အဖွဲ့ဝင် များသည် အမျိုးသားများကို မတွေ့ရှိသည့် အခါ နေအိမ် တံခါးများ ရိုက်ချိုး၍ နေအိမ်များ အတွင်းသို့ ၀င်ရောက်ပြီး၊ အမျိုးသမီးများကို လူမဆန်စွာ ရိုက်နှက်၍ အိမ်သုံး ပစ္စည်းများ၊ အိမ်မွေး ကြက်၊ ငှက်များကို လုယက်ရာ၊ အမျိုးသမီးများလည်း ရွာမှ ထွက်ပြေးခဲ့ရသည်။ အမျိုးသမီးများ ထွက်ပြေးနေစဉ် ကိုယ်ဝန်ဆောင် အမျိုးသမီး တစ်ဦးပါဝင် ခဲ့ပြီး၊ အဆိုပါ ကိုယ်ဝန်ဆောင် အမျိုးသမီးသည် သူဦးလာ ကျေးရွာသို့ အရောက်တွင် လယ်ကွင်း၌ အရေးပေါ် မွေးဖွားခဲ့ရကြောင်း ဒေသခံ တစ်ဦးက ပြောပါသည်။

လူဦးရေ စာရင်း ကောက်ခံရန် လာရောက်သည့် အဖွဲ့က အိမ်သုံး ပစ္စည်းများနှင့် အတူ ကြက်၊ ဘဲ၊ ခို အကောင် (၅၀) ကျော် လုယက် သွားခဲ့သည်ဟု ဒေသခံများ၏ ပြောကြားချက်များ အရ သိရှိရပါသည်။ ကြက်၊ ဘဲ၊ ခိုများ လုယက်ခံရသူ များမှာ -- ဦးနူရ်ဘော်ရှော်ရ် (ဘ) ဦးအေရှာဒုလ္လာ၊ ဦးရောမ်ဇာန်အလီ (ဘ) ဦးဟူစိန်းအာမတ်၊ ဒေါ်ဒိလ်ကီဘာစ် (ဘ) ဦးနူရ်ဟူစိန်း၊ ဒေါ်အမီနာ (ဘ) ဦးဒိုင်လာ၊ ဦးမာမတ်ရှား တို့ဖြစ်ပြီး၊ နေအိမ် တံခါးများ ရိုက်ချိုး ဖျက်ဆီးခံရသူ အချို့မှာ -- ဦးရုလ်အာမီးန် (ဘ) ဦးဟာလာမျာ၊ ဦးအာယုဖ် (ဘ) ဦးဆော်ကဒ်ကာဆိမ်၊ ဦးအာဘူလ်ဟာရှိမ်း (ဘ) ဦးအဒူဆော်လာမ်နှင့် ဦးရှောမ်ရှု (ဘ) ဦးဟာလာမျာ တို့ဖြစ်သည်။

Comment ရေးရန်

Rohingya Exodus