လီဆယ် တိုင်ကြားခြင်းကို မစစ်ဆေးဘဲ အပြစ်မဲ့များကို ဖမ်းဆီး ငွေညှစ်
Rohingya Eye & MYARF
RB News
21.10.2014
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ရွှေဇားကျေးရွာ အုပ်စု၊ မြောက်ရွာတွင် လာရောက်၍ ဂဏန်းရှာသည့် ရခိုင် အမျိုးသမီးများက လီဆယ် တိုင်ကြားသည်ကို နယ်ခြားစောင့် ရဲတပ်ဖွဲ့ဝင်များက စစ်ဆေးခြင်း မပြုဘဲ၊ အပြစ်မဲ့ ဒေသခံများကို ဖမ်းဆီး၍ ငွေညှစ်ခဲ့ပြီး၊ ဖမ်းဆီးထားသူ များထဲမှ (၃) ဦးကို ယခု အချိန်ထိ ချုပ်နှောင် ထားကြောင်း သတင်း ရရှိပါသည်။
အောက်တိုဘာလ (၁၈) ရက်နေ့ နေ့လည် ၂ နာရီ အချိန်တွင် မောင်တောမြို့နယ် မြောက်ပိုင်း ရွှေဇား ကျေးရွာ အုပ်စု၊ မြောက်ရွာမှ ဦးဘော်ရှော်ရ် (၂၀၁၂ ဇွန်လ ဆူပူမှုတွင် ပါဝင်သည်ဟု လုပ်ကြံ စွပ်စွဲခံရပြီး ထောင်ဒဏ် ၇ နှစ် ကျခံနေရသူ) ၏ ပုဇွန်ကန်တွင် ၎င်းပိုင်ဆိတ်များ ကျက်စားနေစဉ်၊ အောင်ဗလ (ရခိုင်ရွာ) မှ ရခိုင် အမျိုးသမီး (၃) ဦးသည် ခွေးနှစ်ကောင် နှင့်အတူ ဂဏန်းရှာရန် ရောက်ရှိလာခဲ့သည်။ ၎င်းတို့နှင့် အတူ ပါလာသည့် ခွေးနှစ်ကောင်က ဆိတ်များကို ကိုက်ရန် ကြိုးစားသောကြောင့် ဆိတ်ကျောင်းနေသည့် အာဇီမူလ္လာ (အသက် ၂၈ နှစ်) က ခွေးများကို တုတ်တစ်ချောင်းဖြင့် ခြောက်၍ မောင်းထုတ်ခဲ့သည်။
အဆိုပါ ဖြစ်စဉ်ကို ရခိုင် အမျိုးသမီးများက ၎င်းတို့ကို ရန်ပြု တိုက်ခိုက်သည်ဟု လီဆယ်၍ နယ်ခြားစောင့် ရဲတပ်ဖွဲ့ဝင်များကို တိုင်ကြားခဲ့ရာ၊ နယ်ခြားစောင့် ရဲတပ်ဖွဲ့ဝင်များ ရောက်ရှိလာပြီး ပုဇွန်ကန် ပိုင်ရှင်၏ ဇနီး ဖြစ်သူ ဒေါ်ရှာမိုနီး (အသက် ၅၅ နှစ်) ကို ဖမ်းဆီးခေါ်ဆောင် သွားခဲ့သည်။ တဖန် ညနေ (၄) နာရီ အချိန်တွင် ဆိတ်ကျောင်း နေသည့် အာဇီမူလ္လာနှင့် ပုဇွန်ကန်တွင် ရှိနေသည့် အာစ်မောတ်အုလ္လာ (ဘ) ဦးဆွေယာဒ်ဟူဆောင်း (အသက် ၂၈ နှစ်) နှင့် ရီဇူဝါန် (ဘ) ဦးအာဘူကလာမ် (အသက် ၁၉ နှစ်) တို့ကိုလည်း နယ်ခြားစောင့် ရဲတပ်ဖွဲ့ဝင်များက ဖမ်းဆီးခေါ်ဆောင် သွားခဲ့ကြောင်း ဒေသခံ တစ်ဦးက RB News သို့ပြောပါသည်။
ပုဇွန်ကန် ပိုင်ရှင်၏ ဇနီးဖြစ်သူ ဒေါ်ရှာမိုနီးထံမှ ငွေကျပ် ၈ သိန်းယူ၍ ပြန်လည် လွှတ်ပေးခဲ့သော်လည်း၊ ယင်းနေ့ ညသန်းခေါင်ယံ အချိန်တွင် စစ်သားများနှင့် နယ်ခြားစောင့် ရဲတပ်ဖွဲ့ဝင် ၃၀ ခန့်တို့သည် ရွာအတွင်းသို့ ၀င်ရောက်၍ အပြစ်မဲ့ (၅) ဦးကို ထပ်မံ၍ ဖမ်းဆီးပြီး (၃) မိုင်ရှိ နယ်ခြားစောင့် ရဲတပ်ဖွဲ့ စခန်းသို့ ခေါ်ဆောင် သွားခဲ့သည်။ နယ်ခြားစောင့် ရဲတပ်ဖွဲ့ဝင်များသည် အဆိုပါ အပြစ်မဲ့ (၅) ဦးထံမှ ငွေကျပ် ၁၈ သိန်း ညှစ်ယူ၍ ပြန်လည် လွှတ်ပေးခဲ့သော်လည်း၊ ဆိတ်ကျောင်းသား အာဇီမူလ္လာနှင့် ပုဇွန်ကန်တွင် ရှိနေခဲ့သူ နှစ်ဦးကို ယခု အချိန်ထိ ချုပ်နှောင် ထားကြောင်း အဆိုပါ ဒေသခံက ပြောပါသည်။
အကြောင်းမဲ့ ဖမ်းဆီးခံရပြီး ငွေကျပ် ၁၈ သိန်း ညှစ်ခံရသူ (၅) ဦးမှာ --
(၁) မူဟီဘုလ္လာ (ဘ) ဦးဇော်ဟိရ်အာမတ် (အသက် ၂၅ နှစ်) – (ညှစ်ခံရသည့် ငွေကျပ် ၃ သိန်း ၅ သောင်း)
(၂) ရှာဖော်ဒီးန် (ဘ) ဦးနူရ်အာမီးန် (အသက် ၂၂ နှစ်) – (ညှစ်ခံရသည့် ငွေကျပ် ၃ သိန်း ၅ သောင်း)
(၃) ဟူစိန်းဇူဟာရ် (ဘ) ဦးအီမာန်ဟူစိန်း (အသက် ၂၃ နှစ်) – (ညှစ်ခံရသည့် ငွေကျပ် ၄ သိန်း)
(၄) ဦးနူရ်မာမတ် (ဘ) ဦးအဗ်ဒူလ္လာ (အသက် ၆၀ နှစ်) – (ညှစ်ခံရသည့် ငွေကျပ် ၃ သိန်း ၅ သောင်း)
(၅) ကျော်မင်း (ဘ) ဦးနူရ်မာမတ် (အသက် ၂၀ နှစ်) – (ညှစ်ခံရသည့် ငွေကျပ် ၃ သိန်း ၅ သောင်း) -- တို့ဖြစ်ပါသည်။
