အာဏာပိုင်များ ငွေယူ၍ အလယ်သံကျော်မှ မလေးရှားသို့ စက်လှေတစ်စီး ထွက်ခွာခွင့်ပြု
Rohingya Eye
RB News
19.10.2014
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း အလယ်သံကျော် ကျေးရွာရှိ ဒေသဆိုင်ရာ အာဏာပိုင်များက ငွေယူ၍ အလယ်သံကျော်မှ မလေးရှားနိုင်ငံသို့ လူကုန်ကူးသည့် စက်လှေ တစ်စီး ထွက်ခွာခွင့်ပြု ခဲ့ကြောင်း သတင်း ရရှိပါသည်။
အောက်တိုဘာလ (၁၆) ရက်နေ့ ညသန်းခေါင်ယံ (၁) နာရီအချိန်တွင် မောင်တောမြို့နယ် တောင်ပိုင်း အလယ်သံကျော် ကျေးရွာဈေး၏ တောင်ဘက် မောင်တူလာရွာနှင့် ကပ်လျက်ရှိသည့် ဂူးဒါချောင်းမှ ထွက်ခွာသော မလေးရှားနိုင်ငံသို့ လူကုန်ကူးသည့် စက်လှေ တစ်စီးကို ဒေသဆိုင်ရာ အာဏာပိုင်များက ငွေယူ၍ ထွက်ခွာခွင့်ပြု ခဲ့ကြောင်း ဒေသခံများက RB News သို့ပြောပါသည်။
အဆိုပါ စက်လှေတွင် လူ (၅၀) ခန့်လိုက်ပါသွားပြီး လူကုန်ကူးသည့် ပွဲစားများက တစ်ဦးလျှင် ငွေကျပ် တစ်သိန်း ငါးသောင်းစီ ယူခဲ့ကြောင်း သိရှိရပါသည်။ လူကုန်ကူးမှုကို ဦးဆောင်သူမှာ ဦးဇော်ထူး (ယခင် ဥက္ကဌဟောင်း၊ ရခိုင်လူမျိုး) ဖြစ်ပြီး၊ ၎င်းနှင့် အတူ အလယ်သံကျော် ကျေးရွာ အုပ်စု၊ ဟာမ်ဖူရာရွာနေ ဦးဆော်လိမ် (ဘ) ဦးမာမတ်အာမီးန် (အသက် ၄၇ နှစ်)၊ ဦးရှော်မ်ရှုကော်ရီးမ် (ဘ) ဦးမာမတ်အာမီးန် (အသက် ၄၂ နှစ်) နှင့် ဦးကော်ရီးမ် (ဘ) ဦးမာမတ်အာမီးန် (အသက် ၄၀ နှစ်) တို့ပါဝင်ကြောင်း ဒေသခံများ၏ ပြောကြားချက်များ အရ သိရှိရပါသည်။
စက်လှေထွက်ခွာစဉ် ဗျူဟာမှူးရွာ အခြေစိုက် စစ်တပ်စခန်းမှ စစ်သားများ လာရောက်၍ လုံခြုံရေး တာဝန်ယူ ပေးခဲ့ကြောင်း ဒေသခံများက ပြောပါသည်။
လူကုန်ကူးသူများ ရရှိသည့် ငွေကျပ် ၇၅ သိန်းမှ စစ်တပ်သို့ ငွေကျပ် ၆ သိန်း၊ အမှတ် (၇) နယ်မြေ နယ်ခြားစောင့် ရဲတပ်ဖွဲ့ စခန်း ရဲမှူးအား ငွေကျပ် ၅ သိန်း၊ သတင်းတပ်ဖွဲ့ (SB) အား ငွေကျပ် ၄ သိန်း၊ စ.ရ.ဖ အဖွဲ့အား ငွေကျပ် ၃ သိန်းနှင့် အလယ်သံကျော် ကျေးရွာ အုပ်စု အုပ်ချုပ်ရေးမှူးအား ငွေကျပ် ၄ သိန်း ပေးခဲ့ရကြောင်း လူကုန်ကူးသူများနှင့် နီးစပ်သူများမှ တဆင့် စုံစမ်း သိရှိရပါသည်။
အာဏာပိုင်များနှင့် လူကုန်ကူးသူများသည် မကြာမီ ရက်ပိုင်း အတွင်းတွင် မြင်းလွှတ် ကျေးရွာမှ စက်လှေများဖြင့် မလေးရှားနိုင်ငံသို့ လူကုန်ကူးရန် စီစဉ်လျက် ရှိကြောင်း သတင်း ရရှိပါသည်။
