အလယ်သံကျော် အ.ထ.က ကျောင်းအုပ် အတွက် အဆောင် ဆောက်ရန် ဒေသခံ များထံမှ ငွေကောက်ခံ

Rohingya Eye
RB News
23.11.2014

မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း အလယ်သံကျော် ကျေးရွာရှိ အခြေခံ ပညာ အထက်တန်းကျောင်းမှ ကျောင်းအုပ်ကြီး နေရန် အဆောင် တစ်ခု ဆောက်လုပ်ရန် အတွက် ဒေသခံ ရွာသား များထံမှ အတင်း အဓမ္မ ငွေကောက်ခံ လျက်ရှိကြောင်း သတင်း ရရှိပါသည်။

မောင်တောမြို့နယ် တောင်ပိုင်း အလယ်သံကျော် ကျေးရွာရှိ အခြေခံ ပညာ အထက်တန်းကျောင်းသို့ အသစ် ပြောင်းရွှေ့ လာသော ကျောင်းအုပ် ဆရာမကြီး နေထိုင်ရန် အတွက် အဆောင် တစ်ခု ဆောက်လုပ်ရန်ဟု ဆိုကာ အလယ်သံကျော် ကျေးရွာ အုပ်ချုပ်ရေးမှူး ဦးမောင်သက်နိုင်က ဒေသခံများ ထံမှ အတင်း အဓမ္မ ငွေကောက်ခံ လျက်ရှိသည်။ အလယ်သံကျော် ကျေးရွာ အုပ်စုတွင် အိမ်ခြေပေါင်း ၁၂၀၀ ကျော်ရှိပြီး၊ အိမ်ခြေတိုင်းမှ ငွေကျပ် ၅၀၀၀/- စီ အတင်း အဓမ္မ ကောက်ခံလျက် ရှိကြောင်း ဒေသခံများက RB News သို့ပြောပါသည်။

ကျေးရွာရှိ မျက်နှာဖုံး လူကြီးများနှင့် ငွေကြေး တတ်နိုင်သူများ ထံမှ ငွေကျပ် နှစ်သောင်းထိ ကောက်ခံလျက် ရှိကြောင်း ဒေသခံများက ပြောပါသည်။

ကျေးရွာ အုပ်ချုပ်ရေးမှူး ဦးမောင်သက်နိုင် ကောက်ခံ နေသည့် ကျောင်းအုပ်ကြီး အတွက် အဆောင် ဆောက်လုပ်ရန် ငွေကျပ် ၅ သိန်းခန့်သာ လိုအပ်မည် ဖြစ်သော်လည်း အိမ်ခြေပေါင်း ၁၂၀၀ ကျော်မှ အနည်းဆုံး ၅၀၀၀/- မှ ၂၀၀၀၀/- အထိ ကောက်ခံ၍ ၎င်း၏ ကိုယ်ကျိုး အတွက် အသုံးပြုရန် ဖြစ်သည်ဟု ဒေသခံများက ပြောပါသည်။