ရိုဟင်ဂျာ အရေး ကုလ - အမေရိကန် သံအမတ် စိုးရိမ်

13.1.2015

ကုလသမဂ္ဂ ဆိုင်ရာ အမေရိကန် သံအမတ်ကြီး Samantha Power က ရခိုင်ပြည်နယ်မှာ လူသားချင်း စာနာမှု အခြေအနေဟာ ဆက်လက် ဆိုးရွားလျှက် ရှိပြီး လူနည်းစု မွတ်ဆလင်တွေ အပေါ် တိုက်ခိုက် ခဲ့သူများ အပေါ် အရေးယူမှု မရှိသလောက် ဖြစ်နေတာ တွေ့ရတယ်လို့ တနင်္လာနေ့က ပြောလိုက် ပါတယ်။

အမေရိကန် နိုင်ငံခြားရေး ပေါ်လစီနဲ့ ပတ်သက်လို့ အထက် လွှတ်တော် ရီပတ်ဘလီကင် အမတ် အများစု ခေါင်းဆောင် Mitch McConnell က ကြီးမှူး ကျင်းပတဲ့ ကင်တာကီ ပြည်နယ်၊ Lousville တက္ကသိုလ်မှာ အခုလို သံအမတ်ကြီး ပါဝယ်က ပြောကြားခဲ့တာ ဖြစ်ပါတယ်။

ရိုဟင်ဂျာ မွတ်ဆလင် ၁ သိန်းကျော်တို့ဟာ အခြေအနေ ဆိုးရွားလှတဲ့ ဒုက္ခသည် စခန်းတွေမှာ နေထိုင်ကြ ရတဲ့ အကြောင်းနဲ့ နိုင်ငံသား ဖြစ်ခွင့် လျှောက်ထားဖို့ စိစစ်ရာမှာလည်း ရိုဟင်ဂျာတွေ အနေနဲ့ သူတို့ရဲ့လူမျိုး အမည်ရင်းနဲ့ မှတ်ပုံတင်ခွင့် မရတဲ့ အဆိုပြုချက် ဥပဒေကြမ်းကိုလည်း သူက ပြစ်တင် လိုက်ပါတယ်။ မြန်မာ အစိုးရ အနေနဲ့ ရိုဟင်ဂျာ အမည်ကို လက်မခံဘဲ တဘက်နိုင်ငံ ဘင်္ဂလားဒေ့ရ်ှက တရားမဝင် ရောက်ရှိ လာတဲ့ ဘင်္ဂါလီတွေ အဖြစ် သတ်မှတ် ခေါ်ဝေါ် ထားတာ ဖြစ်ပါတယ်။

မြန်မာနိုင်ငံ ပြုပြင်ပြောင်းလဲ မှုများ အတွက် ဖိအားပေးရာမှာ အဓိက နိုင်ငံရေး ပါတီကြီး ၂ ရပ်တို့ဖြစ်တဲ့ ရီပတ်ဘလီကင်နဲ့ ဒီမိုကရက်တို့ကြား ပူးပေါင်း ဆောင်ရွက်မှုကိုလည်း သံအမတ်ကြီး ပါဝဲလ်က မီးမောင်းထိုးပြသွားပါတယ်။ မြန်မာနိုင်ငံနဲ့ပတ်သက်လို့ သတင်းထောက်တွေအနေနဲ့ ဖိနှိပ်ချုပ်ခြယ်ခြင်း ခံနေရတဲ့အကြောင်းလည်း သူက ပြောကြားသွားပါတယ်။ မြန်မာနိုင်ငံအနေနဲ့ လူ့အခွင့်အရေး လေးစားလိုက်နာတဲ့ ဒီမိုကရေစီနိုင်ငံ ဖြစ်လာဖို့ကတော့ အလှမ်းကွာဝေးဆဲရှိတယ်လို့လည်း သံအမတ်ကြီးက Power က ပြောခဲ့ပါတယ်။