နောက်ဆုံးသတင်း/ဆောင်းပါးများ

မွတ်စလင်တွေ လူ့အခွင့်အရေး ဆုံးရှုံးနေကြောင်း ကုလ လူ့အခွင့်အရေး အထူး ကိုယ်စားလှယ် ပြောကြား



9.1.2015

ကုလသမဂ္ဂရဲ့ မြန်မာနိုင်ငံ ဆိုင်ရာ လူ့အခွင့်အရေး အထူး ကိုယ်စားလှယ် မစ္စရန်ဟီးလီ (Ms. Yanghee Lee) ဟာ မြေပုံမြို့ကို ဒီနေ့ သွားရောက်ပြီး လွှတ်တော် ကိုယ်စားလှယ်တွေ၊ မြို့မိမြို့ဖတွေနဲ့ တွေ့ဆုံ ခဲ့ပါတယ်။

အဲ့ဒီလို တွေ့ဆုံရာမှာ မစ္စရန်ဟီးလီက မြေပုံမြို့နယ် အတွင်း ရခိုင်နဲ့ မွတ်စလင် အသိုင်းအဝန်း နှစ်ခု သင့်မြတ်ပြီး အတူ ယှဉ်တွဲ နေထိုင်နိုင်ရေး ကိစ္စတွေကို ဆွေးနွေး ခဲ့တယ်လို့ တွေ့ဆုံပွဲ တက်ရောက် ခဲ့တဲ့ မြေပုံမြို့နယ် ပြည်နယ် လွှတ်တော် ကိုယ်စားလှယ် ဦးအောင်ဝင်းက ပြောပါတယ်။

"ကျနော်တို့က ဘယ်လို ပြောရမလဲ အခု လက်ရှိ အချိန်မှာ ဘာပဲဖြစ်ဖြစ် ဒုက္ခသည် တွေက ရှိနေ ကြတာပေါ့လေ၊ ဒုက္ခသည် တွေကို ရာသက်ပန် ထားလို့ မဖြစ်ဘူး၊ ဒီလူတွေပါ လူ့အခွင့် အရေး ဆုံးရှုံး နစ်နာ နေတယ်၊ အဲ့ဒါကြောင့် သူတို့ကို လူ့အခွင့် အရေး အရ ဖြစ်စေ၊ လူသားချင်း စာနာမှု အရ ဖြစ်စေ သူတို့ကို လွတ်လပ်စွာ လုပ်ပိုင်ခွင့်တွေ ပေးပြီးတော့ စုစုမဲ့မဲ့နဲ့ ပြန်လည် နေရာချ ထားမယ့် အပိုင်း တွေကို ဒေသခံ လူတွေက ခွင့်လွှတ် သည်းခံပြီးတော့ အဲ့ဒါကို ပြန်လည်ချထား အကောင် အထည်ဖော် ပေးစေချင်တဲ့ စကားပြောပါတယ်"

ဒါ့အပြင် နိုင်ငံသား မှတ်ပုံတင် ကိုင်ဆောင် ထားကြတဲ့ မွတ်စလင်တွေဟာ လူ့အခွင့် အရေးတွေ ဆုံးရှုံးနေပြီး သူတို့ကို လွတ်လပ်စွာ သွားလာ လုပ်ကိုင်ခွင့်တွေ ပေးဖို့ ရန်ဟီးလီ က တိုက်တွန်း ပြောဆို ခဲ့တယ်လို့ သိရပါတယ်။

ရခိုင် တိုင်းရင်းသား တွေနဲ့ မွတ်စလင်တွေ အကြား အတူ ယှဉ်တွဲ နေထိုင်နိုင်ဖို့ အတွက် အချိန် ကာလတစ်ခုကို စောင့်ဆိုင်းဖို့ လိုအပ်တယ်လို့ မြို့ခံတွေက Ms. Yanghee Lee ကို အကြံပြု ပြောဆို ခဲ့တယ်လို့ သိရပါတယ်။ဒါ့အပြင် ရိုဟင်ဂျာ ဆိုတဲ့ အသုံးအနှုန်းဟာ ရခိုင် တိုင်းရင်းသားတွေ လက်မခံနိုင်တဲ့ အမည် ဖြစ်တာကြောင့် မွတ်စလင် အသိုင်းအဝန်းက ရိုဟင်ဂျာကို အသိအမှတ် ပြုဖို့ တောင်းဆို နေသရွေ့ အတူ ယှဉ်တွဲ နေထိုင်ဖို့ ဆိုတာ မဖြစ်နိုင်ကြောင်း ကိုလည်း Ms. Yanghee Lee ကို ပြောပြ ခဲ့တယ်လို့ သိရပါတယ်။

Ms. Yanghee Lee ဟာ မြေပုံမြို့ တောင်ပေါ် မွတ်စလင် ဒုက္ခသည် စခန်းကို သွားရောက်ပြီး ဒုက္ခသည် တွေနဲ့ တွေ့ဆုံ ခဲ့သလို မနက်ဖြန်မှာ စစ်တွေမြို့နယ် အတွင်းမှာ ရှိတဲ့ ဒုက္ခသည် စခန်းတွေကို သွားရောက်ဖို့ ရှိတယ်လို့ သိရပါတယ်။

မြေပုံမြို့ကို ရောက်ရှိ လာတဲ့ Ms. Yanghee Lee ကို မြေပုံမြို့ခံ အချို့က ကုလသမဂ္ဂရဲ့ ရိုဟင်ဂျာ အသုံးအနှုန်းကို လက်မခံကြောင်း ဆိုင်းဘုတ် ကိုင်ဆောင်ပြီး ဆန္ဒပြဖို့ ကြိုးစား ခဲ့ရာမှာ ရဲတပ်ဖွဲ့က တားဆီး ခဲ့တာကြောင့် ရဲတပ်ဖွဲ့နဲ့ ဒေသခံတွေ အကြား ရုန်းရင်း ဆန်ခတ် ဖြစ်ပွားခဲ့တယ် လို့လည်း သိရပါတယ်။

Comment ရေးရန်

Rohingya Exodus