နောက်ဆုံးသတင်း/ဆောင်းပါးများ

ဖွဲ့စည်း ပုံပြင်ရေး လူထု ဆန္ဒခံယူပွဲ မူကြမ်း လွှတ်တော်မဲခွဲ



အောင်ရဲမောင်မောင်
2.2.2015

၂၀၀၈ ဖွဲ့စည်းပုံ အခြေခံ ဥပဒေကို ပြင်ဆင်တဲ့ ဥပဒေကြမ်း အတည်ပြုရေး ပြည်လုံးကျွတ် ဆန္ဒခံယူပွဲ ဥပဒေကြမ်းကို ဒီကနေ့ ပြည်ထောင်စု လွှတ်တော် မှာ အခြေအတင် ဆွေးနွေးခဲ့ ကြပါတယ်။ မူလက ဥပဒေကြမ်း ကော်မတီက ယာယီ နိုင်ငံသား ကတ်ပြား ကိုင်ဆောင်ထားသူတွေ အနေနဲ့ ဆန္ဒခံယူပွဲမှာ မဲမပေး သင့်ဘူးလို့ သဘောထား မှတ်ချက် ရှိပြီး သမ္မတက မဲပေးသင့်တယ်လို့ သဘောထား မှတ်ချက် ပြန်ပို့ ထားတာကြောင့် လွှတ်တော် ကိုယ်စားလှယ်တွေ အနေနဲ့ အငြင်းအခုံတွေ ဖြစ်တဲ့ထိ ဒီကနေ့ ဆွေးနွေးခဲ့ ကြပါတယ်။ အပြည့်အစုံကို ဗွီအိုအေ သတင်းထောက် ကိုအောင်ရဲ မောင်မောင် က တင်ပြ ပေးထားပါတယ်။

ဖွဲ့စည်းပုံ ပြင်ဆင်တဲ့ အခါမှာ ဒီဖွဲ့စည်းပုံ ပြင်ဖို့ ဆန္ဒခံယူပွဲ လုပ်မဲ့ အခြေအနေ တွေနဲ့ ပတ်သက်ပြီး ဥပဒေကြမ်း တစ်ခု ပြုစု ရေးဆွဲထားတဲ့ ကိစ္စကို ဒီကနေ့ ပြည်ထောင်စု လွှတ်တော်မှာ အခြေအတင် ဆွေးနွေး ခဲ့ကြတာပါ။ အဓိက ကတော့ White Card အဖြူရောင် ကတ်ပြားလို့ ခေါ်တဲ့ ယာယီ နိုင်ငံသားကတ် ကိုင်ဆောင် ထားသူတွေ အနေနဲ့ ဒီ ဆန္ဒခံယူပွဲမှာ မဲပေးခွင့် ရှိတယ်လို့ သမ္မတက ဒီဥပဒေကြမ်း အပေါ်မှာ သဘောထား မှတ်ချက်ပေးပြီး လွှတ်တော်ကို ပြန်ပို့ ထားတာပါ။

ဒါပေမဲ့ လွှတ်တော်ဘက်က ဥပဒေကြမ်း ကော်မတီက မဲပေးခွင့် မရှိသင့်ဘူးလို့ မှတ်ချက် ရှိထားတဲ့ အတွက် လွှတ်တော်ထဲမှာ အခြေအတင် ဆွေးနွေးခဲ့ ကြတာလည်း ဖြစ်ပါတယ်။ ရခိုင် အမျိုးသားပါတီ အမတ်တွေ ဖြစ်တဲ့ ဒေါက်တာ အေးမောင်၊ ဦးဘရှိန်၊ ဒေါ်ခင်စောဝေနဲ့ ဦးထွန်းအောင်ကျော် တို့က White Card ကိုင်ဆောင်သူတွေ အနေနဲ့ မဲပေးခွင့် မရှိဘူးလို့ ဒီကနေ့ လွှတ်တော်မှာ ဆွေးနွေး ခဲ့တဲ့ အကြောင်း ရခိုင်အမျိုးသား ပါတီ ရဲ့ ပြည်သူ့လွှတ်တော် အမတ် ဦးဖေသန်းက ဗီအိုအေ ကိုပြောပါတယ်။

“နိုင်ငံတော် အာဏာသည် နိုင်ငံသားများထံမှ ဆင်းသက်သည်-ဆိုတဲ့ ဒီမဲပေးခြင်းအားဖြင့် လွှတ်တော်တွေ၊ အစိုးရတွေ၊ ကျနော်တို့ ပေါ်လာတယ်၊ ဒါကြောင့် နိုင်ငံတော်ရဲ့ အချုပ်အခြာ အာဏာဟာ အဲဒီထဲမှာ နိုင်ငံသားထံမှ ဆင်းသက်သည် ဆိုတဲ့ ပုဒ်မကို အကိုးအကား အထောက်အထားပြု ပြီးတော့ နိုင်ငံသား ကိုသာ မဲပေးခွင့် ပြုသင့်တယ်၊ ဒါကြောင့် White Card ကိုင်ဆောင် ထားတဲ့ သူတွေသာ မဲပေးမယ် ဆိုရင် ကျနော်တို့ ရခိုင်ပြည်နယ်မှာ ပြဿနာတွေ ဖြစ်လာနိုင်တယ်။ ဒါဟာ ရခိုင်ပြည်နယ်ရဲ့ အရေး မဟုတ်ဘူး။ တစ်နိုင်ငံလုံးရဲ့ အရေးဖြစ်ပါတယ်။ အချုပ်အခြာ အာဏာကို ထိပါးလာနိုင်ပါတယ်။ ဒါကြောင့် White Card နဲ့ မဲမပေးသင့် ပါဘူးလို့ ဆွေးနွေး ပါတယ်။”

တစ်ဘက် ကလည်း မွတ်ဆလင် ပြည်သူ့ လွှတ်တော် ကိုယ်စားလှယ် ဘူးသီးတောင် အမတ် ဦးရွှေမောင် ကတော့ သမ္မတ သဘောထား မှတ်ချက် ပေးထားတဲ့ အတိုင်း ၁၅ သိန်းသော White Card ကိုင်ဆောင်သူ တွေဟာ ဒီဆန္ဒခံယူပွဲမှာ မဲပေးခွင့်ရှိတယ်လို့ ထောက်ခံ ဆွေးနွေးပါတယ်။

“ဒီရိုဟင်ဂျာ မွတ်ဆလင်တွေကို ကျတော့ နိုင်ငံသား စိစစ်ရေး ကတ်ပြား အစား ယာယီ သက်သေခံ လက်မှတ်တွေ ထုတ်ပေးခဲ့တယ်။ ထုတ်ပေး တာကိုက ၁၉၅၁ ခုနှစ် နည်းဥပဒေနဲ့ မညီဘူး။ ပြောင်းပြန် ဖြစ်နေတယ်၊ process က reserve process ဖြစ်နေတယ်လို့ တင်ပြခဲ့တယ်။ ဒါကြောင့် မို့ white card ကိစ္စ က နိုင်ငံတော်က ဖြေရှင်းဖို့ ကျန်နေတဲ့ ကိစ္စတစ်ခု လည်း ဖြစ်နေတယ်။ လက်ရှိ အခြေအနေမှာ ပြည်ထောင်စု အစိုးရရယ်၊ ရခိုင်ပြည်နယ် အစိုးရ ဦးဆောင်ပြီးတော့ ရခိုင် Action Plan ဆွေးနွေးတဲ့ ထဲမှာလည်း White Card ကိစ္စက ပါတယ်။ အဲဒီတော့ မပြီးပြတ်သေးဘဲ နိုင်ငံတော်က ဆောင်ရွက်နေတဲ့ ကိစ္စတွေ ဒီလို အခြေအနေ တွေမှာ ယာယီ သက်သေခံ လက်မှတ် ကိုင်ဆောင် ထားသူတွေက နိုင်ငံသားလို့ သတ်မှတ် ခဲ့ရသူ မဟုတ်တဲ့ အတွက် အခု ဒီဥပဒေကြမ်းမှာ ဆန္ဒမဲ ပေးပိုင်ခွင့် မရှိဘူးလို့ အဲဒီလို ပြောလို့ရှိရင် တစ်နိုင်ငံလုံးမှာ ရှိတဲ့ ၁၅ သိန်းသော White Card ကိုင်ဆောင်သူတွေ အတွက် အခွင့်အရေး ဆုံးရှုံးသွားမှာ ဖြစ်တယ်။ ဒါကြောင့် နိုင်ငံတော် သမ္မတက နိုင်ငံသားတွေရဲ့ အခွင့်အရေး မဆုံးရှုံးဖို့နဲ့ တည်ဆဲ ဥပဒေတွေနဲ့ ကိုက်ညီဖို့ အတွက် ယာယီ သက်သေခံ လက်မှတ် ကိုင်ဆောင်သူ တွေကို မဲစာရင်းမှာ ထည့်ဖို့ အတွက် ပေးရမှာဖြစ်တယ်လို့ ကျနော်က တင်ပြတာပေါ့နော်။”

ဒီကနေ့ ဆွေးနွေးခဲ့တဲ့ ဦးရွှေမောင် ပြောသွားတာပါ။

ဦးရွှေမောင်လိုပဲ မဲပေးခွင့် ရှိတယ်လို့ ဝ နဲ့ မိုင်းလားက လွှတ်တော် အမတ် နှစ်ယောက် ကလည်း ဆွေးနွေး ခဲ့သလို တပ်မတော်သား ကိုယ်စားလှယ် တွေကလည်း မဲပေးခွင့် ရှိတယ်လို့ ထောက်ခံ ဆွေးနွေးခဲ့ ကြပါတယ်။

အခုလို အခြေအတင် ဆွေးနွေးပြီး နောက်ပိုင်း လွှတ်တော် ထမင်းစားနားချိန် အပြီးမှာတော့ ပြည်ထောင်စု လွှတ်တော် ဥပဒေကြမ်း ကော်မတီက သူတို့ ရဲ့ မူလ သဘောထား မှတ်ချက် ပေးထားတဲ့ White Card ကိုင်ဆောင်သူတွေ မဲပေးခွင့် မရှိဘူး ဆိုတာကို ကော်မတီရဲ့ အတွင်းရေးမှူး ဦးစောလှထွန်းက ပြန်လည် ရုပ်သိမ်းပြီး သမ္မတ သဘောထား မှတ်ချက်ကို ထောက်ခံ ခဲ့ပါတယ်။

ဒါကြောင့် နောက်ဆုံး လွှတ်တော်က မဲခွဲတဲ့အခါမှာ ယာယီ နိုင်ငံသားကတ် ကိုင်ဆောင်သူတွေ မဲပေးခွင့် ရှိတယ် ဆိုတဲ့ အချက်က အနိုင်ရ ခဲ့ပါတယ်။ ဥပဒေကြမ်း ကော်မတီ အနေနဲ့ အရင်က သမ္မတနဲ့ သဘောထား မတိုက်ဆိုင်တဲ့ အခါ မူလ ရပ်တည်ချက် အတိုင်း ရှိပေမဲ့ ဒီနေ့ ဒီကိစ္စမှာတော့ မူလ သဘောထားကို ပြန်လည် ရုပ်သိမ်း သွားတာဟာ မေးခွန်းထုတ် စရာ ကောင်းတယ်လို့ ဦးဖေသန်းက ပြောပါတယ်။

“ဥပဒေကြမ်း ပူးပေါင်း ကော်မတီရဲ့ ဦးစောလှထွန်းက တင်ပြတဲ့အခါ မှာလည်း ပြည်ထောင်စု လွှတ်တော်ရဲ့ အတည်ပြုချက် အတိုင်း အတည်ပြုပေးပါလို့ တင်ပြ ခဲ့ပါတယ်။ မဲခွဲခါနီးကျမှ ဒီလို ပြောင်းလိုက်တာဟာ ဦးစောလှထွန်းရဲ့အာဘော် သူ့တစ်ယောက်တည်းရဲ့ ဆန္ဒ မဟုတ်ဘူးလို့ ယူတယ်။ တစ်စုံတစ်ရာများ ဖိအား ပေးထားသလားလို့ ကျနော်တို့ဘက်က ထင်မြင် ယူဆမိ ပါတယ်။ လွှတ်တော် ကိုယ်စားလှယ်တွေ အားလုံးကလည်း အဲဒီလိုပဲ ယူဆတယ်။ အဲဒီလို အခြေအနေမျိုး ဖြစ်ပါတယ်။”

မနက်ဖြန်မှာလည်း ၂၀၀၈ ဖွဲ့စည်းပုံ အခြေခံ ဥပဒေကို ပြင်ဆင်တဲ့ ဥပဒေကြမ်း အတည် ပြုရေး ပြည်လုံးကျွတ် ဆန္ဒခံယူပွဲ ဥပဒေကြမ်း နဲ့ ပတ်သက်ပြီး ကျန်ရှိနေသေးတဲ့ အချက်တွေကို ဆက်လက် ဆွေးနွေးဖို့တွေ ရှိနေတာပါ။

Comment ရေးရန်

Rohingya Exodus