ဆိုင်တွင် ထိုင်စကားပြောနေသည့် လူငယ်များထံမှ နယ်ခြားစောင့်ရဲများက အကြောင်းမဲ့ ငွေညှစ်
Rohingya Eye
RB News
31.3.2015
မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း မောင်နှမ ကျေးရွာအုပ်စု၌ ဆိုင်တွင် ထိုင်စကား ပြောနေသည့် လူငယ်ထံမှ နယ်ခြားစောင့်ရဲများက အကြောင်းမဲ့ ငွေညှစ်ခဲ့ကြောင်း သတင်း ရရှိပါသည်။
မတ်လ (၂၈) ရက်နေ့ ည ၉ နာရီ အချိန်တွင် မောင်တောမြို့နယ် မြောက်ပိုင်း မောင်နှမ ကျေးရွာ၊ ဟာဆာရီး ဖာရာရှိ ကွမ်းယာဆိုင် တစ်ဆိုင်တွင် ဒေသခံ ရိုဟင်ဂျာ လူငယ်များ ထိုင်စကားပြောနေစဉ် နယ်ခြားစောင့် ရဲတပ်ဖွဲ့ ကွပ်ကဲရေး ဌာနချုပ်မှ ကင်းလှည့်သော ကားတစ်စီး ဆိုင်ရှေ့သို့ ရောက်ရှိလာသဖြင့် လူငယ်များက မတော်မတရား ဖမ်းဆီး နှိပ်စက်ခံရမည်ကို စိုးရိမ်၍ ထွက်ပြေး သွားခဲ့ကြသည်။ သို့သော်လည်း ဆက်လက် ထိုင်နေသည့် လူငယ် အချို့ကို နယ်ခြားစောင့် ရဲများက ရှာဖွေ စစ်ဆေးမှုများ ပြုလုပ်ပြီး ဥပဒေနှင့် ငြိစွန်းသည့် ပစ္စည်း တစ်စုံတစ်ရာ မရရှိသော်လည်း အဆိုပါ လူငယ်များကို နယ်ခြားစောင့် ရဲများက လူမဆန်စွာ ရိုက်နှက်၍ ဖမ်းဆီးနေစဉ် ကျေးရွာ အုပ်ချုပ်ရေးမှူး ဦးအာဘူကာလာမ် ရောက်ရှိလာပြီး နယ်ခြားစောင့် ရဲများကို ဖျောင်းဖျ ပြောဆိုခဲ့သည်။ သို့သော်လည်း နယ်ခြားစောင့်ရဲများက အဆိုပါ လူငယ်များကို ပြန်လည် မလွှတ်ပေးဘဲ ငွေကျပ် နှစ်သိန်းစီ ရသည့်အခါမှသာ လွှတ်ပေးခဲ့ပြီး၊ ထွက်ပြေးသွားသည့် လူငယ် ၅ ဦးထံမှလည်း ငွေကျပ် တစ်သိန်းစီ ယူပေးရန် ကျေးရွာ အုပ်ချုပ်ရေးမှူးကို မှာကြားခဲ့ကြောင်း ဒေသခံ တစ်ဦးက RB News သို့ပြောသည်။
ရိုက်နှက် ဖမ်းဆီးခံရပြီး ငွေကျပ် နှစ်သိန်းစီ ညှစ်ခံရသည့် လူငယ်များမှာ --
(၁) အီမာန်ဟူစိန်း (ဘ) ဦးလာလ်မျာ (အသက် ၃၅ နှစ်)
(၂) ရှော်ရိဒ်ဟူစိန်း (ဘ) ဦးမာမတ်ဟာရှိမ်း (အသက် ၃၂ နှစ်)
(၃) မာမတ်အာယုဖ် (ဘ) ဦးနော်ဇိရ်အာမတ် (အသက် ၂၇ နှစ်)
(၄) မာမတ်ဟာလိမ်း (ဘ) မော်လ၀ီဟာဆောင်း (အသက် ၃၀ နှစ်) တို့ဖြစ်ပြီး၊
ထွက်ပြေးသွားသည့် အတွက် မတ်လ (၂၉) ရက်နေ့တွင် ငွေကျပ် တစ်သိန်းစီ ညှစ်ခံရသည့် လူငယ် (၅) ဦးမှာ --
(၁) အလီဇူဟာရ် (ဘ) ဦးဖော်ယာစ်အာမတ်
(၂) အဘူဘော်ရှော်ရ် (ဘ) ဦးမာမတ်
(၃) မာမတ်အီလီယာစ် (ဘ) ဦးဟာလာမျာ
(၄) မာမတ်ရှော်ဖိခ် (ဘ) ဦးမူစ်တာခ်အာမတ်
(၅) အဘူလ်ကာလာမ် (ဘ) ဦးအာမိရ်ဟူဆောင်း -- တို့ဖြစ်သည်။
ညမထွက်ရ အမိန့်မှာ ည ၁၁ နာရီမှ စ၍ ဖြစ်သော်လည်း ည ၉ နာရီ အချိန်တွင် နယ်ခြားစောင့် ရဲများက မတော်မတရား ပြုလုပ်နေခြင်း လက်နက် အာဏာဖြင့် အခွင့်ကောင်းယူ၍ ဗိုလ်ကျ စိုးမိုးနေခြင်း ဖြစ်သည်ဟု ဒေသခံများက ပြောပါသည်။
