နိုင်ငံသား လျှောက်ထားသူများကို ခိုးဝင်ဘင်္ဂလီများ ကဲ့သို့ မေးခွန်းများ မေးမြန်း
MYARF
RB News
31.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း အလယ်သံကျော်နှင့် မြင်းလွတ် ကျေးရွာများမှ နိုင်ငံသား လျှောက်ထားသူ များကို လ.၀.က ရုံးမှ ဆင့်ခေါ်၍ ခိုးဝင် ဘင်္ဂလီများကဲ့သို့ မေးခွန်း မေးမြန်းခဲ့ကြောင်း သတင်း ရရှိပါသည်။
မောင်တော မြို့နယ် လ.၀.က ဦးစီးမှူးက ဘင်္ဂလီ လူမျိုး အမည်ဖြင့် နိုင်ငံသား လျှောက်ထားသော မောင်တော မြို့နယ် တောင်ပိုင်း၊ အလယ်သံကျော် ကျေးရွာမှ မိသားစု ၁၂ စုနှင့် မြင်းလွှတ် ကျေးရွာမှ မိသားစု ၃၀ စု တို့ကို လ.၀.က ရုံးသို့ လာရောက်၍ စစ်ဆေးခံရန် ဆင့်ခေါ်ခဲ့သည်။
မတ်လ (၂၆) ရက်နေ့ နံနက်ပိုင်းတွင် အလယ်သံကျော် ကျေးရွာမှ အစိုးရ၏ ထိပ်တန်း အသုံးတော်ခံ ဦးဆော်ဒူလ္လာ မိသားစု အပါအ၀င် မိသားစု ၃ စု နှင့် မြင်းလွတ် ကျေးရွာမှ ပ.ထ.စ ဥက္ကဌဟောင်း ဦးအဒူလ်ဟာဘိစ် မိသားစု အပါအ၀င် မိသားစု ၃ စု တို့သည် စစ်ဆေးခံရန် လ.၀.က ရုံးသို့ သွားရောက်ခဲ့သည်။
“လ.၀.က ရုံးမှာ သူတို့ကို ဘင်္ဂလားဒေ့ရှ် ကနေ မြန်မာနိုင်ငံကို ဘယ်နှစ်ခုနှစ်က ၀င်ရောက် လာတာလဲ၊ ဘင်္ဂလားဒေ့ရ်ှမှာ ဘယ်အရပ်ဒေသမှာ နေထိုင်ခဲ့သလဲ၊ ဘာကြောင့် မြန်မာနိုင်ငံကို ရောက်လာသလဲ၊ ဘယ်လမ်းကြောင်းကနေ ၀င်လာခဲ့တာလဲ၊ မြန်မာနိုင်ငံကို စရောက်ပြီး ဘယ်ဒေသမှာ နေထိုင်ခဲ့သလဲ၊ ဘင်္ဂလားဒေ့ရ်ှမှာ နေထိုင်ခဲ့တဲ့ ဒေသမှာ ဘယ်သူ အုပ်ချုပ်ခဲ့သလဲ စတဲ့ မေးခွန်းတွေ မေးပါတယ်။ စစ်ဆေးခံဖို့ သွားတဲ့လူတွေက ကျွန်တော်တို့က ဘယ်နိုင်ငံကမှ ၀င်ရောက်လာတာ မဟုတ်ဘူး၊ ဒီမြေပေါ်မှာ မွေးဖွားပြီး ဒီဒေသမှာ နေထိုင်လာသူတွေသာ ဖြစ်ပါတယ် လို့ ဖြေတော့ လ.၀.က တာဝန်ရှိသူတွေကို သူတို့ကို တစ်နေကုန် ထိုင်ခိုင်းထားပြီး၊ ညနေပိုင်းကျမှ လ.၀.က ရုံးမှာ ဆက်စစ်ဖို့ မဖြစ်နိုင်တော့ဘူး။ နယ်ခြားစောင့် ရဲတပ်ဖွဲ့ ဌာနချုပ်ကို ခေါ်ယူ စစ်ဆေးရမည်လို့ ပြောဆိုခဲ့တယ်” ဟု ဒေသခံ တစ်ဦးက RB News သို့ပြောသည်။
စစ်ဆေးခံရန် သွားရောက်သူများသည် ၎င်းတို့၏ နေရပ်များကို ပြန်သွားပြီးနောက် စစ်ဆေးသည့် မေးခွန်းများနှင့် ပတ်သက်၍ ရွာအတွင်း ပြန်လည် မျှဝေရာ စစ်ဆေးခံရန် မသွားရောက်သူများထဲမှ အချို့က မဆိုင်သည့် မေးခွန်းများကို ဖြေဆိုရမည်ကို စိုးရိမ်၍ ရွာမှ တိမ်းရှောင် နေကြောင်း သိရသည်။
