နောက်ဆုံးသတင်း/ဆောင်းပါးများ

နှစ်နိုင်ငံ ဆက်ဆံရေးသစ် စတင်ဖို့ ဘင်္ဂလားဒေ့ရှ် ကမ်းလှမ်း



RFA မြန်မာပိုင်း
13.4.2015

ဘင်္ဂလားဒေ့ရ်ှနဲ့ မြန်မာ နှစ်နိုင်ငံ ဆက်ဆံရေး ပိုမို တိုးတက် ကောင်းမွန် လာရေးအတွက် အခင်း အကျင်း သစ်တွေ စတင်ဖို့ ဘင်္ဂလားဒေ့ရှ် အစိုးရက ကမ်းလှမ်း လိုက်ပါတယ်။

မြန်မာနိုင်ငံဟာ ဘင်္ဂလားဒေ့ရှ် အတွက် အာဆီယံ နိုင်ငံတွေနဲ့ ဆက်စပ်ဖို့ အဓိကကျတဲ့ ပေါင်းကူးနေရာမှာ ရှိနေပေမဲ့ ဘင်္ဂလားဒေ့ရ်ှနဲ့ ထိတွေ့မှု အနည်းဆုံး ဖြစ်နေကြောင်း၊ ဒါပေမဲ့ နှစ်နိုင်ငံရဲ့လတ်တလော နဲ့ ရှေ့အနာဂတ် ထိတွေ့ ဆက်ဆံမှု တွေဟာ အရှိန်အဟုန် မြင့်မား လာလိမ့်မယ်လို့ ယုံကြည်ကြောင်း ဘင်္ဂလားဒေ့ရှ် နိုင်ငံခြားရေး ၀န်ကြီး မာမွတ်အလီက ဒါကာမြို့မှာကျင်းပတဲ့ ဘင်္ဂလားဒေ့ရှ်၊ အိန္ဒိယ၊ မြန်မာ သုံးနိုင်ငံ ဆွေးနွေးပွဲမှာ ပြောကြား ခဲ့ပါတယ်။

ဘင်္ဂလားဒေ့ရှ် အနေနဲ့ အသင့်ချုပ်ပြီး အဝတ်အထည် ၊ ဆေးဝါး၊ သားရေထည်ပစ္စည်း၊ ဘိလပ်မြေ၊ ဂုန်လျှော်၊ စိုက်ပျိုးရေး ပစ္စည်းတွေကို မြန်မာနိုင်ငံဘက် တင်ပို့နိုင်ကြောင်း၊ အလားတူ မြန်မာနိုင်ငံဘက်က စိုက်ပျိုးရေး ထွက်ကုန်တွေနဲ့ သဘာဝ သယံဇာတ တွေကိုလည်း ဘင်္ဂလားဒေ့ရ်ှကို တင်ပို့နိုင်ကြောင်း၊ အခု အခါ မြန်မာနိုင်ငံက နိုင်ငံခြား ရင်းနှီး မြှုပ်နှံမှုတွေ ဖွင့်ပေးနေတဲ့ အတွက် ဘင်္ဂလားဒေ့ရှ် အနေနဲ့ကလည်း သင့်တော်တဲ့ ကဏ္ဍမှာ လာရောက် မြှုပ်နှံလိုကြောင်း၊ စွမ်းအင် ကဏ္ဍမှာလည်း အကျိုးတူ ပူးပေါင်း ဆောင်ရွက်လိုကြောင်း ဘင်္ဂလားဒေ့ရှ် နိုင်ငံခြားရေး ဝန်ကြီးက ပြောကြားခဲ့ပါတယ်။

ပြီးခဲ့တဲ့ ဖေဖေဝါရီလက ဘင်္ဂလားဒေ့ရ်ှဝန်ကြီးချုပ်ရဲ့ စွမ်းအင်အကြံပေးအဖွဲ့ဟာ မြန်မာနိုင်ငံကို လာရောက်ခဲ့ပါတယ်။

အဲ့ဒီ သုံးနိုင်ငံဆွေးနွေးပွဲမှာ မြန်မာအရပ်ဘက်အဖွဲ့အစည်းတစ်ခုဖြစ်တဲ့ တမ္ပဒီပအဖွဲ့ ညွှန်ကြားရေးမှူး ဒေါက်တာ ခင်ဇော်ဝင်းက ဘင်္ဂလားဒေ့ရ်ှမှာရှိနေတဲ့ ရိုဟင်ဂျာ ခေါ် မွတ်စလင်တွေရဲ့ နိုင်ငံသားဖြစ်မှုနဲ့ ပတ်သက်ပြီး မြန်မာ့ လူ့ဘောင်မှာ နှစ်ပိုင်းကွဲနေရာမှာ တချို့က အလယ်အလတ် အမြင်ရှိပြီး၊ တချို့ကတော့ ပြင်းထန်တဲ့ သဘောထား ရှိကြတယ်လို့ ပြောဆိုကြောင်း bdnews24 ဘင်္ဂလားဒေ့ရှ် သတင်းဌာနက ဖေါ်ပြပါတယ်။

Comment ရေးရန်

Rohingya Exodus