ငါးဖမ်းသမား နှစ်ဦးထံမှ နယ်ခြားစောင့် ရဲများ ငွေမရ၍ လူမဆန်စွာ ရိုက်နှက်

MYARF
RB News
10.4.2015

တောင်ပြိုလက်ဝဲ ။ ။ ရခိုင်ပြည်နယ်၊ မောင်တော ခရိုင်၊ တောင်ပြိုလက်ဝဲ မြို့နယ်ခွဲ ရေတွင်းပြင် ကျေးရွာအုပ်စုမှ ဒေသခံ ငါးဖမ်းသမား များကို နယ်ခြားစောင့် ရဲများက ၎င်းတို့ တောင်းသည့် ငွေကို မပေးသဖြင့် လူမဆန်စွာ ရိုက်နှက်ခဲ့ကြောင်း သတင်း ရရှိပါသည်။

မောင်တော ခရိုင်၊ တောင်ပြိုလက်ဝဲ မြို့နယ်ခွဲ၊ ရေတွင်းပြင် ကျေးရွာအုပ်စု၊ အလယ်ရွာနေ ဦးမာဂျဲတ် (ဘ) ဦးရှော်ဖိတ် (အသက် ၅၀ နှစ်) နှင့် အာယာစ် (ဘ) ဦးမာမတ်ဆိဒိခ် (အသက် ၂၆ နှစ်) တို့သည် ဧပြီလ (၉) ရက်နေ့ နေ့လည် ၁၂း၃၀ နာရီ အချိန်တွင် လိပ်ရကျေးရွာ အခြေစိုက် နယ်ခြားစောင့် ရဲတပ်ဖွဲ့ ရဲမှူးက ထုတ်ပေးသည့် ငါးဖမ်း လိုင်စင် စာအုပ်များကို ယူ၍ လှေတစ်စီးဖြင့် မျှောပိုက်နှင့်အတူ ရေတွင်းပြင်နှင့် ဇီးပင်ချောင်း ကြားရှိ ဇီးပင်ချောင်း ချောင်းဝ စခန်းသို့ သွားရောက်၍ ငါးဖမ်းခွင့် စာအုပ်များ အပ်နှံ၍ ငါးဖမ်းရန် သွားခဲ့သည်။

၎င်းတို့ နှစ်ဦးသည် ဖမ်း၍ ရသမျှ ငါးများကို ဘင်္ဂလားဒေ့ရ်ှမှ လှေဖြင့် လာရောက်သော ဖောက်သည်များကို အကြွေးဖြင့် ရောင်းချခဲ့သည်။ ထို့နောက် ဇီးပင်ချောင်း ချောင်းဝ စခန်းသို့ ပြန်လည် ရောက်ရှိလာပြီး ၎င်းတို့ အပ်နှံထားခဲ့သည့် ငါးဖမ်းခွင့် စာအုပ်များကို နယ်ခြားစောင့် ရဲများထံမှ ပြန်လည် တောင်းရာ နယ်ခြားစောင့် ရဲများက ငွေ ၄၀၀၀/- ပေးမှသာ ရမည်ဟု ပြောသဖြင့် ၎င်းတို့က ငါးများ အကြွေးရောင်းခဲ့ရ၍ ငွေမရှိကြောင်း၊ ယခင်က ယခုကဲ့သို့ ငွေပေးရန် မလိုခဲ့၍ နေအိမ်မှ ငွေယူလာခြင်း မရှိကြောင်း၊ နောက်နေ့ ငါးဖမ်းလာချိန်တွင် ငွေပေးမည်ဟု ပြောဆိုသော်လည်း နယ်ခြားစောင့် ရဲများက ၎င်းတို့ နှစ်ဦးကို မှောက်ခိုင်းပြီး တုတ်များဖြင့် လူမဆန်စွာ ရိုက်နှက်ခဲ့သည်။ ထို့နောက် ၎င်းတို့၏ ငါးဖမ်းခွင့် စာအုပ်များကိုလည်း ပြန်လည် မပေးဘဲ လွှတ်ပေးခဲ့ကြောင်း ဒေသခံ တစ်ဦးက RB News သို့ပြောသည်။

နယ်ခြားစောင့် ရဲများ၏ လူမဆန်စွာ ရိုက်နှက်မှုကြောင့် ဒဏ်ရာ ပြင်းထန်စွာ ရရှိခဲ့ပြီး လမ်းမလျှောက်နိုင်တော့ဘဲ လမ်းတစ်ဝက်တွင် လဲကျနေခဲ့သည်။ လမ်းတစ်ဝက်တွင် လဲကျနေသော ၎င်းတို့နှစ်ဦးကို ရွာသားများက တွေ့ရှိပြီး နေအိမ် အသီသီးတို့ ပို့ဆောင် ပေးခဲ့ကြောင်း အဆိုပါ ဒေသခံက ပြောပါသည်။ အဆိုပါ နယ်ခြားစောင့် ရဲများသည် ငါးဖမ်းသွားသူ များကို ယခုကဲ့သို့ မကြာခဏ ရိုက်နှက်လေ့ ရှိကြောင်း သိရသည်။