ဘူးသီးတောင် မြို့နယ် အုပ်ချုပ်ရေးမှူးက အိမ်ပြုပြင်သူများထံမှ ငွေတောင်းခံလျက်ရှိ

MYARF
RB News
29.4.2015

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် အုပ်ချုပ်ရေးမှူး ဦးသန်းရွှေသည် ကျေးလက်ဒေသများသို့ ကွင်းဆင်း၍ အိမ်ပြုပြင်သူများထံမှ ငွေတောင်းခံလျက် ရှိကြောင်း သတင်း ရရှိပါသည်။

ယနေ့ ဧပြီလ (၂၉) ရက်နေ့ နံနက်ပိုင်းတွင် ဘူးသီးတောင် မြို့နယ် အုပ်ချုပ်ရေးမှူး ဦးသန်းရွှေသည် ကားတစ်စီးဖြင့် ကကျဘက် ကံပြင် ကျေးရွာအုပ်စုသို့ ရောက်ရှိလာပြီး ကျေးရွာ အုပ်ချုပ်ရေးမှူး ဦးမောင်လှသိန်း၊ ကျေးရွာ တာဝန်ခံ ဦးကော်လီမူလ္လာ၊ ရာအိမ်မှူး ဦးအဒူရော်ကိမ် တို့ကို ခေါ်ယူပြီး ၎င်းကျေးရွာတွင် နေအိမ်ပြုပြင်သူများ စာရင်း ကောက်ခံခဲ့သည်။ နေအိမ်ပြုပြင်သူများ ဖြစ်သည့် ဦးဆော်လိမ် (ဘ) ဦးမော်ခ်ဂုလ်အာမတ်၊ ဦးဇော်မိရ် (ဘ) ဦးအုစ်မာန်၊ ဦးမုစ်တာအာမတ် (ဘ) ဦးအော်လီဟူစိန်း တို့ သုံးဦး၏ အမည်များကို စာရင်း ပြုစု သွားခဲ့သည်။

ထို့နောက် မြို့နယ် အုပ်ချုပ်ရေးမှူး ဦးသန်းရွှေသည် ကကျဘက် ကျေးရွာ၊ မြောင်းနား ကျေးရွာ၊ အလယ်ချောင်း ကျေးရွာများသို့ သွားရောက်ပြီး ၎င်းကျေးရွာများတွင် နေအိမ် အမိုးပျက်စီး၍ အမိုးပြုပြင်၊ အိမ်နံရံ ပျက်စီးသွား၍ နံရံ ပြုပြင်သူများ၏ စာရင်း ကောက်ခံပြီး ခွင့်ပြုချက် မရဘဲ နေအိမ် ပြုပြင်ခဲ့သည်ဟု ဆိုကာ ငွေကျပ် ငါးသောင်းစီ တောင်းခံလျက် ရှိကြောင်း ဒေသခံများက RB News သို့ပြောသည်။ ထိုငွေကျပ် ငါးသောင်းစီကို မြို့နယ် အုပ်ချုပ်ရေးမှူးက တိုက်ရိုက် မတောင်းဘဲ ကျေးရွာ အုပ်ချုပ်ရေးမှူး များမှ တဆင့် တောင်းခံလျက် ရှိကြောင်း သိရသည်။