လောင်းဒုံမှ နယ်ခြားစောင့်ရဲများက ဆေးဆိုင် ပိုင်ရှင်တစ်ဦးထံမှ ငွေကျပ် ၃ သိန်းညှစ်
MYARF
RB News
12.4.2015
မောင်တော ။ ။ မောင်တော မြို့နယ် မြောက်ပိုင်း လောင်းဒုံ ကျေးရွာ အခြေစိုက် နယ်ခြားစောင့် ရဲကင်းစခန်းမှ နယ်ခြားစောင့်ရဲ (၃) ဦးသည် ဆေးဆိုင် ပိုင်ရှင် တစ်ဦးကို ဖမ်းဆီး၍ ရိုက်နှက်၍ ငွေကျပ် (၃) သိန်း ညှစ်ယူခဲ့ကြောင်း သတင်း ရရှိပါသည်။
ဧပြီလ (၁၁) ရက်နေ့ ည ၉ နာရီ အချိန်တွင် မောင်တောမြို့နယ် မြောက်ပိုင်း လောင်းဒုံ ကျေးရွာအုပ်စု အခြေစိုက် နယ်ခြားစောင့် ရဲကင်း စခန်းမှ နယ်ခြားစောင့်ရဲ (၃) ဦးသည် ၎င်းကျေးရွာအုပ်စု ဆင်သေပြင် အရှေ့ရွာသို့ သွားရောက်ပြီး ဆေးဆိုင် ပိတ်ပြီး ဆေးဝါး အချို့ အိတ်ထဲသို့ ထည့်၍ အိမ်ပြန်ရန် ပြင်ဆင်နေသော ဆေးဆိုင်ပိုင်ရှင် ဦးလာလူးကို ဖမ်းဆီးပြီး ဆိုင်ရောင်းရန် ခွင့်ပြုချက်နှင့် ပတ်သက်၍ မေးမြန်းရာ ဦးလာလူးက မြို့နယ် ဆရာဝန်ထံမှ ရယူထားသည့် ခွင့်ပြုချက်စာကို ထုတ်ပြသော်လည်း နယ်ခြားစောင့် ရဲများက နယ်ခြားစောင့် ရဲကင်းခစန်းသို့ သတင်းပို့ထားခြင်း မရှိဟု ဆိုကာ ၎င်းကို နယ်ခြားစောင့် ရဲကင်းစခန်းသို့ ခေါ်ဆောင် သွားပြီး ငွေကျပ် ၅ သိန်း တောင်းခံခဲ့သည်။
ဦးလာလူးက နယ်ခြားစောင့် ရဲများ တောင်းခံသည့် ငွေကျပ် ၅ သိန်းကို ပေးရန် ငြင်းဆန်ခဲ့သဖြင့် လူမဆန်စွာ ရိုက်နှက်ခဲ့သည်။ နယ်ခြားစောင့် ရဲများ၏ လူမဆန်စွာ ရိုက်နှက်မှု ဒဏ်ကို မခံနိုင်တော့၍ နောက်ဆုံးတွင် ငွေကျပ် ၃ သိန်း ပေး၍ ပြန်လည် လွတ်မြောက် လာခဲ့ကြောင်း ဒေသခံ တစ်ဦးက RB News သို့ပြောသည်။
ဧပြီလ (၁၀) ရက်နေ့တွင် မောင်တောမြို့နယ် တောင်ပိုင်း ကံပူးကျေးရွာမှ ဦးဟိုင်ဘုလ္လာ (ဘ) ဦးကာဆိမ်းသည် ၎င်း၏ နေအိမ်အမိုး ပျက်စီးသွား၍ အိမ်အမိုးမိုးရန် အတွက် တောင်ပေါ်သို့ သွားရောက်၍ သက်ကယ် ခုတ်နေစဉ် တပ်မတော်သားများက ဖမ်းဆီးပြီး ၎င်းခုတ်ထားသော သက်ကယ်များကို သိမ်းယူသည့် အပြင် တစ်နေ့လုံး သက်ကယ်များ ခုတ်စေကာ ညနေချိန်တွင် ၎င်းသက်ကယ်များကို မောရ၀တီ စစ်တပ် စခန်းသို့ ပို့စေခိုင်းကာ အပြစ် ပေးခဲ့ကြောင်း ဒေသခံ တစ်ဦးက ပြောပါသည်။
