နောက်ဆုံးသတင်း/ဆောင်းပါးများ

လှေစီး ရွှေ့ပြောင်း ဒုက္ခသည် ကိစ္စ ဆွေးနွေးဖို့ မြန်မာကို မလေးရှားပြော

(ဓါတ်ပုံ - Christophe Archambault/AFP/Getty Images via Al Jazeera America)

17.5.2015

လှေစီး ရွှေ့ပြောင်း ဒုက္ခသည်တွေ အရေးနဲ့ ပတ်သက် လို့ ဆွေးနွေး ပြောဆိုဖို့ မြန်မာ အစိုးရကို မလေးရှား နိုင်ငံခြားရေး ဝန်ကြီး အန်နီဖါ အာမန်က ဒီကနေ့ တနင်္ဂနွေနေ့မှာ တိုက်တွန်းလိုက်ပါတယ်။

မဟုတ်ရင်တော့ အရေးပေါ် အစည်းအဝေး တခု ခေါ်ရလိမ့်မယ်လို့ သူက သတိပေး ခဲ့ပါတယ်။

နိုင်ငံတကာ အဆင့်အထိ မရောက်ခင် ဒီကိစ္စ ဖြေရှင်းနိုင်ရေး ကို မြန်မာ အစိုးရအနေနဲ့ ဆွေးနွေးပြောဆိုမယ်လို့ သူ့အနေနဲ့ မျှော်လင့်ကြောင်း လည်း မစ္စတာ အန်နီဖါက ဘာနားမား မလေးရှား အစိုးရ သတင်း ဌာန ကို ပြောသွားပါတယ်။

အဲဒီ လှေစီး ရွှေ့ပြောင်း ဒုက္ခသည်တွေ အရေး နဲ့ ပတ်သက်လို့ အင်ဒိုနီးရှား နိုင်ငံခြားရေး ဝန်ကြီးနဲ့ ဘင်္ဂလားဒက် ရှ် နိုင်ငံခြားရေးဝန်ကြီးတို့ လည်း ဒီကနေ့ မှာပဲ တွေ့ဆုံ ဆွေးနွေးခဲ့ကြပါတယ်။

ဒီကိစ္စကို ဖြေရှင်းနိုင်ဖို့ အင်ဒိုနီးရှား ၊ မလေးရှားနဲ့ ထိုင်းနိုင်ငံတို့ လာမယ့် ရက်ပိုင်း အတွင်း တွေ့ဆုံ ဆွေးနွေးဖို့ ရှိပါတယ်။

ပင်လယ်ပြင်မှာ မျောပါနေတဲ့ ရွှေ့ပြောင်း ဒုက္ခသည်တွေကို ကမ်းကပ် ခိုလှုံခွင့်ပေးဖို့ အဲဒီနိုင်ငံတွေက ငြင်းဆန်နေတဲ့အတွက် ကုလသမဂ္ဂ နဲ့ နိုင်ငံတကာ အဖွဲ့အစည်းတွေရဲ့ ဝေဖန်ပြောဆိုမှုတွေကို ရင်ဆိုင် နေရပါတယ်။

ဒီအတောအတွင်းမှာပဲ အင်ဒိုနီးရှားနိုင်ငံ ကို ရောက်ရှိ လာ တဲ့ လှေစီး ရွှေ့ပြောင်း ဒုက္ခသည်တွေက ပင်လယ်ပြင် မှာ မျောနေစဉ် တုန်း က သူတို့ လှေပေါ်မှာ စားနပ်ရိက္ခာ လုကြရင်း ခိုက်ရန်ဖြစ်ပွားပြီး လူတရာလောက် သေဆုံးခဲ့ကြောင်း ဘီဘီစီကို ပြောပါတယ်။

ခိုက်ရန်ဖြစ်ပွားစဉ် အတွင်း လူတချို့ ဓါးထိုး ခံခဲ့ရသလို တချို့လည်း ကြိုးကွင်းစွပ် အသတ်ခံခဲ့ရပြီး တချို့ လှေပေါ်ကနေ ပင်လယ်ထဲ ပစ်ချခံခဲ့ရ တယ်လို့ အခုအခါ အာချေး ဒုက္ခသည်စခန်းမှာ ခိုလှုံနေကြတဲ့ အဲဒီ လူတွေက ပြန်ပြောပါတယ်။

ဘင်္ဂလားဒက်ရ်ှနဲ့ မြန်မာနိုင်ငံကနေ လှေသင်္ဘောတွေနဲ့ ထွက်လာကြရာမှာ လူမှောင်ခို ပွဲစားတွေရဲ့ စွန့်ပစ် ခံရအပြီး ထိုင်း၊ အင်ဒိုနီးရှား၊ မလေးရှားနိုင်ငံတွေနားက ပင်လယ်ပြင် မှာ မျောပါ နေတဲ့ လှေသင်္ဘော တွေ ပေါ်မှာ ဒုက္ခသည်တွေ ထောင်နဲ့ ချီ ရှိနေ တယ် လို့ ယူဆရပါတယ်။

Comment ရေးရန်

Rohingya Exodus