ဘူးသီးတောင် မြို့မ ရဲစခန်းမှ ရဲအုပ်မြတ်ထွေးက ဒေသခံများထံမှ ငွေညှစ်
RB News
5.5.2015
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် မြို့မရဲစခန်းမှ ရဲအုပ်မြတ်ထွေးသည် ယခင်က အတိုင်း ဆက်လက်၍ အပြစ်မဲ့ ဒေသခံများထံမှ မတရားသဖြင့် ငွေညှစ်ခြင်းများ ပြုလုပ်လျက် ရှိကြောင်း သတင်း ရရှိပါသည်။
ဘူးသီးတောင် မြို့နယ် မြို့မရဲစခန်းမှ ရဲအုပ်မြတ်ထွေးသည် ၎င်း၏ မတရားသဖြင့် ညှဉ်းပန်း နှိပ်စက်မှု၊ ငွေညှစ်မှုများကြောင့် တာဝန်မှ ပြောင်းရွှေ့ ခံရမည်ကို သိရပြီးနောက် နေပြည်တော်သို့ သွားရောက်ပြီး ၁၅ ရက်ကြာ နေထိုင်ပြီးနောက် ရဲချုပ်ကို သိန်း ၅၀၀ လာဘ်ငွေပေးပြီး မူလ နေရာတွင် တာဝန်ထမ်းဆောင် နေခြင်း ဖြစ်သည်ဟု ဘူးသီးတောင် မြို့နယ် မြို့မရဲစခန်း အသိုင်းအ၀ိုင်းမှ ပြောကြားချက်များ အရ သိရှိရပါသည်။ ရဲအုပ်မြတ်ထွေး ခရီးသွားနေစဉ် ကာလတွင် ဘူးသီးတောင်မြို့မှာ တည်ငြိမ် အေးချမ်းနေခဲ့ပြီး ယခု ပြန်လည် ရောက်ရှိလာသည့် အချိန်မှ စ၍ ကျေးလက်ဒေသများမှ ဒေသခံများ မြို့ပေါ်သို့ ဈေးဝယ်လာရန်ပင် အလွန် အခက်အခဲ ကြုံလျက် ရှိသည်ဟု ဒေသခံများက RB News သို့ ပြောသည်။ လမ်းသွားလမ်းလာ များကို အကြောင်းမဲ့ ဖမ်းဆီးပြီး ပုဒ်မ အမျိုးမျိုး ခေါင်းစဉ်တပ်ကာ ခြိမ်းခြောက် ရိုက်နှက်၍ ငွေညှစ်လျက် ရှိသည်ဟု ဆိုသည်။
ကျေးလက် ဒေသမှ ဒေသခံများမှာ တစ်နှစ်ပတ်လုံး လယ်လုပ်၊ ငါးဖမ်းဖြင့် ရရှိသည့် ငွေများကို ရဲအုပ်မြတ်ထွေးသို့ တစ်ရက်တည်း ပေးနေရသည်ဟု ဒေသခံများက ပြောပါသည်။ ရဲအုပ်မြတ်ထွေး၏ လုပ်ရပ်များကြောင့် ဘူးသီးတောင် မြို့ပေါ်ရှိ စီးပွားရေး လုပ်ငန်းများလည်း ထိခိုက်လျက် ရှိနေပြီး၊ ဆိုင်များမှာလည်း ပိတ်ရမည့် အခြေအနေတွင်ပင် ဆိုက်ရောက်နေသည်ဟု ဆိုသည်။ ယခုကဲ့သို့ မတရားသဖြင့် ဖမ်းဆီး ငွေညှစ်နေခြင်းကို ပြည်နယ် အစိုးရ၊ ပြည်ထဲရေး ၀န်ကြီးဌာန အမြန်ဆုံး တားဆီး ပိတ်ပင် အရေးယူ ဆောင်ရွက်ပေးပါရန်နှင့် အကယ်၍ ဆက်လက်၍ လုပ်ဆောင်ခွင့် ပေးထားပါက ဒေသခံများနှင့် ရဲအုပ်မြတ်ထွေးတို့ အကြား မလိုလားအပ်သည့် ပြဿနာ ဖြစ်ပေါ် လာလိမ့်မည်ဟု ဒေသခံများက ပြောပါသည်။
မြို့နယ် ရဲတပ်ဖွဲ့မှူး ဦးအောင်ဘာလေ ကလည်း ရဲအုပ်မြတ်ထွေး ထံမှ ဝေစု ရနေသည့် အတွက် အရေးယူ ဟန့်တားခြင်း မရှိကြောင်း၊ မြို့နယ် အတွင်းရှိ ရဲတပ်ဖွဲ့ဝင် များမှာ တရားဝင် ဓါးပြ လိုင်စင်ရ သောင်းကျန်းသူ များပမာ ဖြစ်နေသည်ဟု ဆိုသည်။
လတ်တလော ငွေညှစ်ခံရသူ အချို့မှာ --
(၁) ဦးနူရ်မာမတ် (ဘ) ဦးဖော်ဇော်လ်ကော်ရီးမ် -- ဦးလှဖေ - တောင်ရွာမှ -- လူကုန်ကူးမှုတွင် ပါဝင် ပတ်သက်နေသည်ဟု လုပ်ကြံ စွပ်စွဲခံရပြီး ငွေကျပ် ၆ သိန်း ညှစ်ခံရ
(၂) ဦးဇော်မိလ် (ခ) ဦးစိုးမြင့် (ဘ) ဦးမောန်ဇူရ် -- ပွဲရုံလုပ်ငန်းရှင် - မြို့မဈေးကြီးမှ - နိုင်ငံခြားငွေ လဲလှယ်သည်ဟု စွပ်စွဲခံရပြီး ငွေကျပ် ၅ သိန်း ညှစ်ခံရ
(၃) ဦးအာမီးရ် အီဆုပ်အလီ (ဘ) ဦးကျောက်ဆိပ် -- ဈေးကြီးမှ မတရား ဖမ်းဆီးခံရပြီး ငွေကျပ် ၆ သိန်း ညှစ်ခံရ --- တို့ဖြစ်သည်။
(၃) ဦးအာမီးရ် အီဆုပ်အလီ (ဘ) ဦးကျောက်ဆိပ် -- ဈေးကြီးမှ မတရား ဖမ်းဆီးခံရပြီး ငွေကျပ် ၆ သိန်း ညှစ်ခံရ --- တို့ဖြစ်သည်။
