နောက်ဆုံးသတင်း/ဆောင်းပါးများ

ရသေ့တောင် နယ်ခြားစောင့် ရဲတပ်ဖွဲ့ စခန်း (၂၂) မှ ရဲများက ဒေသခံများထံမှ ငွေသိန်းချီ၍ ညှစ်ယူ




MYARF
RB News
8.5.2015

ရသေ့တောင် ။ ။ ရခိုင်ပြည်နယ်၊ ရသေ့တောင် မြို့နယ် စေတီပြင် ကျေးရွာ အခြေစိုက် နယ်ခြားစောင့် ရဲတပ်ဖွဲ့ စခန်း အမှတ် (၂၂) မှ နယ်ခြားစောင့် ရဲများသည် အောက်နန်းရာ ကျေးရွာ အုပ်စုနှင့် အထက်နန်းရာ ကျေးရွာအုပ်စု တို့မှ ဒေသခံ ရိုဟင်ဂျာများကို ဖမ်းဆီး၍ ငွေသိန်းချီ၍ ညှစ်ခဲ့ကြောင်း သတင်း ရရှိပါသည်။

ရသေ့တောင် မြို့နယ်၊ စေတီပြင် ကျေးရွာ အခြေစိုက် နယ်ခြားစောင့် ရဲတပ်ဖွဲ့ စခန်း အမှတ် (၂၂) မှ နယ်ခြားစောင့် ရဲများသည် အောင်နန်းရာ ကျေးရွာ အုပ်စု (ရာဇာဘိလ်) မှ ဒေသခံ ရိုဟင်ဂျာ (၄) ဦးကို ဆွဲ၊တင်၊စစ် တွင် မပါဝင်ရန် ရွာသားများကို စည်းရုံးခဲ့သည်ဟု ဆိုကာ ဖေဖော်ဝါရီလ (၈) ရက်နေ့တွင် ဖမ်းဆီး ချုပ်နှောင် ထားခဲ့သည်။ ဖေဖော်ဝါရီလ (၁၇) ရက်နေ့တွင် အဆိုပါ ကင်းစခန်းတွင် ချုပ်နှောင်ထားခြင်း ခံရသည့် အခြားသော အဖမ်းဆီးခံ နှစ်ဦးနှင့် ဆွဲ၊တင်၊စစ် တွင် မပါဝင်ရန် စည်းရုံးခဲ့သူများဟု စွပ်စွဲ ဖမ်းဆီးခံရသူ (၄) ဦးတို့ အချုပ်ခန်းမှ ထွက်ပြေး သွားခဲ့ကြသည်။

ထွက်ပြေးသွားသူ (၄) ဦးကို ရှာဖွေသည်ဟု နယ်ခြားစောင့် ရဲများက အကြောင်းပြ၍ ရွာထဲသို့ အချိန်မတော် ၀င်ရောက်၍ ထွက်ပြေးသွားသူ (၄) ဦးကို ထမင်းကျွေးထားသည်၊ အိမ်များတွင် ထားထားသည်ဟု စွပ်စွဲ၍ လူနေအိမ်များ စစ်ဆေးခြင်း၊ ရွာသားများကို ရိုက်နှက်ခြင်း၊ ဖမ်းဆီး ငွေညှစ်ခြင်းများ ပြုလုပ်လျက် ရှိကြောင်း ဒေသခံများက RB News သို့ပြောသည်။

ထိုသို့ ပြုလုပ်ရာတွင် ယင်းကျေးရွာမှ ဦးမော်ဂုလ်အာမတ်၏ သားနှစ်ဦး ဖြစ်သည့် မုစ်တာခ်အာမတ်နှင့် ဂျော်မိလ်တို့၏ မဟုတ်မမှန် သတင်းပေးမှု များကြောင့်လည်း ဖြစ်သည်ဟု ဒေသခံများက ဆိုသည်။ ဖမ်းဆီးခံရသူ (၄) ဦး ထွက်ပြေး သွားသည်ကို အကြောင်းပြု၍ ဦးမော်ဂုလ်အာမတ်၏ သားနှစ်ဦးက ရွာသားများ ထံမှ ငွေတောင်းခံခြင်း၊ ရွာသားများက ငွေမပေးလျှင် ထွက်ပြေး သွားသူ (၄) ဦးကို ထမင်းကျွေးခဲ့သည်၊ အိမ်တွင် ထားသည်ဟု မဟုတ်မမှန် လုပ်ကြံ၍ နယ်ခြားစောင့် ရဲများထံ သတင်းပို့သည်ဟု ဒေသခံများက ပြောပါသည်။ ထို့ကြောင့် နယ်ခြားစောင့် ရဲများ လာရောက်၍ ဖမ်းဆီး ရိုက်နှက် ငွေညှစ်ခြင်းများ ပိုမို ပြုလုပ်လျက် ရှိသည်ဟု ၎င်းတို့က ပြောသည်။

မတ်လ (၃၀) ရက်နေ့တွင် နယ်ခြားစောင့် ရဲများက အောက်နန်းရာ ကျေးရွာ အုပ်ချုပ်ရေးမှူး ဦးအာမီးန် (ဘ) ဦးဘောက်ရှုးကို ထွက်ပြေး သွားသူ (၄) ဦးကို ရွာတွင် နေထိုင်စေသည်ဟု စွပ်စွဲ၍ ဖမ်းဆီး ခေါ်ဆောင် သွားခဲ့သည်။ ၎င်းအား ချုပ်နှောင် ထားစဉ် နယ်ခြားစောင့် ရဲများက လူမဆန်စွာ ရိုက်နှက်ခဲ့သည့် အပြင် လူမျိုးဘာသာ ခွဲခြား၍ စော်ကား ဆဲဆိုခြင်းများ ပြုလုပ်ခဲ့သည်။ ၎င်းထံမှ နယ်ခြားစောင့် ရဲများက ငွေကျပ် ၅၅ သိန်း ညှစ်ယူ၍ ဧပြီလ (၁၅) ရက်နေ့တွင် ပြန်လည် လွှတ်ပေးခဲ့ကြောင်း ဒေသခံများက RB News သို့ပြောသည်။

ထို့အပြင် အောက်နန်းရာ ကျေးရွာမှ ဒေသခံ ၂၅ ဦးကို ဖမ်းဆီးခဲ့သည်။ ဖမ်းဆီးခံရသူ (၂၅) ဦးမှ ဦးဘော်နီအာမီးန် (ဘ) ဦးအာယုဖ်ကို ယခင်က ဘင်္ဂလားဒေ့ရှ် နိုင်ငံသို့ တရားမ၀င် သွားရောက်ခဲ့ပြီး၊ ဆွဲ၊တင်၊စစ် တွင်လည်း ပါဝင်ရန် ပျက်ကွက်ခဲ့သည်ဟု စွပ်စွဲ၍ ထောင်ဒဏ် (၅) နှစ် ချမှတ်ခဲ့သည်။ ကျန်သည့် (၂၄) ဦးထံမှ တစ်ဦးလျှင် ငွေကျပ် ၂ သိန်းမှ ၃ သိန်းထိ ညှစ်ယူ၍ ပြန်လည် လွှတ်ပေးခဲ့ကြောင်း သိရသည်။ အထက်နန်းရာ ကျေးရွာအုပ်စု၊ နီလာမ်ဘော်ရွာနှင့် အဒူလ္လာရွာ (ပေါက်ပြင်ရွာ) တို့မှလည်း ဒေသခံ (၄) ဦးကို ဖမ်းဆီး၍ ငွေကျပ် ၄ သိန်းစီ ညှစ်ယူကာ ပြန်လည် လွှတ်ပေးခဲ့သည်။

မေလ (၅) ရက်နေ့တွင် တစ်ဖန် အောက်နန်းရာ ကျေးရွာမှ မော်လ၀ီ ယာကုဖ်အား ခြိမ်းခြောက်၍ ငွေကျပ် တစ်သိန်း ညှစ်ယူခဲ့သည်။ ၎င်းငွေကို နယ်ခြားစောင့် ရဲများက တိုက်ရိုက် မယူဘဲ ဦးမော်ဂုလ်အာမတ်၏ သားနှစ်ဦး ထံမှ တစ်ဆင့် ညှဏ်ယူခဲ့သည်။ မေလ (၆) ရက်နေ့တွင် ဦးမော်ဂုလ်အာမတ်၏ သားနှစ်ဦးက မော်လ၀ီ တစ်ပါးကို ခြိမ်းခြောက်၍ ငွေကျပ် နှစ်သိန်း ငါးသောင်း တောင်းခံလျက် ရှိနေကြောင်း ဒေသခံ တစ်ဦးက ပြောပါသည်။

ယခုအခါ နယ်ခြားစောင့် ရဲများ ကိုယ်တိုင် ရွာထဲသို့ သွားရောက်၍ ရွာသားများကို နှောက်ယှက်ခြင်း မပြုတော့ဘဲ ၎င်းတို့ လိုချင်သည့် ငွေကြေးကို ဦးမော်ဂုလ်အာမတ်၏ သားနှစ်ဦး ဖြစ်သည့် မုစ်တာခ်အာမတ်နှင့် ဂျော်မိလ်တို့ ထံမှ တဆင့် ခြိမ်းခြောက်၍ တောင်းခံလျက် ရှိသည်ဟု ဒေသခံများက ပြောပါသည်။

Comment ရေးရန်

Rohingya Exodus