ရွက်ညိုတောင် အုပ်ချုပ်ရေးမှူးက ကျောင်းသားများ ထံမှ ငွေကောက်ခံလျက်ရှိ
RB News
13.6.2015
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် ရွက်ညိုတောင် ကျေးရွာ အုပ်ချုပ်ရေးမှူးသည် နိုင်ငံတော်မှ အခမဲ့ ပညာရေး စနစ်ဖြင့် ပညာသင်ကြားခွင့် ပေးထားသော်လည်း မူလတန်း ကျောင်းသား တစ်ဦးထံမှ ငွေကျပ် ၁၀၀၀/- စီ၊ မူလတန်းလွန် ကျောင်းသားများ - ၅ တန်းမှ ၇ တန်းထိ တစ်ဦးထံမှ ငွေကျပ် တစ်သောင်း နှစ်ထောင်စီ ကောက်ခံလျက် ရှိပြီး ပင်ရင်းကျောင်း ဖြစ်သော အ.ထ.က (ခွဲ) – (၃) သို့ ပေးသွင်းရန်ဟု ဆိုကြောင်း ဒေသခံများက RB News သို့ပြောသည်။
အုပ်ချုပ်ရေးမှူးက လွန်ခဲ့သည့် ၂၀၁၄-၁၅ ပညာသင်နှစ်တွင် နိုင်ငံတော်မှ အသေးသုံး အဖြစ် ငွေကျပ် ၁၆ သိန်း ချပေးခဲ့ရာ ၈ သိန်းသာ ကျောင်းအတွက် အသုံးပြုပြီး ကျန်သည့် ၈ သိန်းကို ကျောင်းအုပ်ကြီးမှ ကိုယ်ကျိုး အတွက် သုံးခဲ့သည်ကို အကြောင်းပြ၍ ကျောင်းအုပ်ကြီးကို အသိမပေးဘဲ ၎င်းနှင့် သင့်မြတ်သည့် ရပ်မိရပ်ဖ အချို့ကို ကောက်ခံနေခြင်း ဖြစ်သည်ဟု ဆိုသည်။
ကျေးရွာ အုပ်ချုပ်ရေးမှူး ဖြစ်သူသည် မြို့နယ် အုပ်ချုပ်ရေးမှူး၏ မွေးစား တပည့်တစ်ဦး ဖြစ်သဖြင့် ရွာသားများက ပြန်လည်၍ မေးခွန်း ထုတ်ရဲခြင်း မရှိဟု ဒေသခံများက ပြောပါသည်။ မေးခွန်းထုတ်သူ များကို မြို့နယ် အုပ်ချုပ်ရေးမှူးထံ မဟုတ်မမှန် တိုင်ကြား၍ ငွေညှစ်ခြင်းများ ပြုလုပ်သဖြင့် အခက်ကြုံနေရသည်ဟု ဆိုသည်။
ငွေကောက်ခံမှုကြောင့် မရှိဆင်းရဲသည့် ကျောင်းသားများ ပညာသင်ကြားရန် အခက်ကြုံတွေ့ နေရသဖြင့် သက်ဆိုင်ရာမှ စီစစ်ပြီး လိုအပ်သလို အရေးယူ ဆောင်ရွက် ပေးစေလိုကြောင်း၊ ကျေးရွာ အုပ်ချုပ်ရေးမှူးက မြို့နယ် အုပ်ချုပ်ရေးမှူးနှင့် မြို့မ ရဲစခန်းမှ ရဲအုပ် မြတ်ထွေး တို့၏ အမည်ဖြင့် ရွာသားများကို ခြိမ်းခြောက်လျက် ရှိသည်ဟု ဒေသခံများက ပြောပါသည်။
