နောက်ဆုံးသတင်း/ဆောင်းပါးများ

မြန်မာကို အာဆီယံ အဖွဲ့ထဲက ထုတ်ပယ်ဖို့ ဝန်ကြီးချုပ်ဟောင်း မဟာသီယာ ပြောကြား

ရန်ကုန်မြို့ ကုန်သည်ကြီးများ ဟိုတယ်မှာ ၂ဝ၁၁ ခုနှစ် နိုဝင်ဘာလ ၂ ရက်နေ့က မလေးရှား ဝန်ကြီးချုပ်ဟောင်း ဒေါက်တာ မဟာသီယာ မိုဟာမက်နဲ့ ဒေါ်အောင်ဆန်းစုကြည် တွေ့ဆုံကြစဉ်။

12.6.2015

ရိုဟင်ဂျာ မွတ်စလင် တွေကို ဖိနှိပ်နေတဲ့ မြန်မာ နိုင်ငံကို အာဆီယံ နိုင်ငံများ အဖွဲ့ကနေ ထုတ်ပယ် သင့်တယ်လို့ မလေးရှား ဝန်ကြီးချုပ်ဟောင်း မဟာသီယာ မိုဟာမက်က ဒီနေ့ ပြောကြား လိုက်ပါတယ်။

မလေးရှားနိုင်ငံ ကွာလာလာမ်ပူ မြို့တော်မှာ ပြုလုပ်တဲ့ ရိုဟင်ဂျာ မွတ်စလင် အရေး နိုင်ငံတကာ ညီလာခံ အဖွင့် မိန့်ခွန်းမှာ မဟာသီယာက အခုလို ပြောလိုက်တာ ဖြစ်ပြီး မြန်မာလို နိုင်ငံမျိုး အာဆီယံ အဖွဲ့မှာ ထည့်သွင်း ထားတာဟာ အဖွဲ့ နာမည်ပျက် ရုံသာ ဖြစ်ကြောင်း၊ လူအစုလိုက်အပြုံလိုက် သတ်ဖြတ်မှုမျိုးကို ဆက်ကျူးလွန်နေမယ်ဆိုရင် အာဆီယံအဖွဲ့ကနေ ထွက်သွားဖို့လိုကြောင်းလည်း ပြောကြားလိုက်ပါတယ်။

ကုလသမဂ္ဂအနေနဲ့ မြန်မာနိုင်ငံကို အရေးယူသင့်ပြီး အရေးမယူနိုင်ရင်လည်း မိမိတို့အနေနဲ့ ဖိအားပေးရ မှာ ဖြစ်တယ်လို့လည်း မဟာသီယာက ပြောပါတယ်။ သူ့အနေနဲ့ ရိုဟင်ဂျာအရေးကို ဒေါ်အောင်ဆန်းစုကြည် ကို ဆောင်ရွက်ပေးဖို့ စာရေးသားပေးခဲ့ပေမယ့် ဘာအကြောင်းပြန်ချက်မှ မရခဲ့ကြောင်း၊ ဒါ့ကြောင့် ရိုဟင်ဂျာ မွတ်စလင်တွေရဲ့ ကံကြမ္မာကို ပြည်ပကသာ အကာကွယ်ပေးဖို့ ရှိတော့ကြောင်းလည်း သူက ပြောပါတယ်။

အာဆီယံရဲ့ ပြည်တွင်းရေး ဝင်မစွက်ရေးမူဝါဒဟာ အကန့်သတ်ရှိပြီး လှေစီးဒုက္ခသည်အရေး မြန်မာက မဆောင်ရွက်သရွေ့ အဆုံးသတ်ဖို့ မရှိကြောင်း၊ ပြည်တွင်းရေး ဝင်မစွက်ရေးမူဝါဒကို မြန်မာနိုင်ငံက ချိုးဖောက်နေကြောင်းလည်း မဟာသီယာက စွပ်စွဲပြောဆိုပါတယ်။

မဟာသီယာဟာ မလေးရှားနိုင်ငံခေါင်းဆောင် ဝန်ကြီးချုပ်အဖြစ်နဲ့ မြန်မာနိုင်ငံကို ၁၉၉၇ ခုနှစ်မှာ အာဆီယံအဖွဲ့ထဲဝင်ရောက်ဖို့ ဦးဆောင်လက်ခံခဲ့သူ ဖြစ်ပါတယ်။

Comment ရေးရန်

Rohingya Exodus