နယ်မြေရုံးဝင်း အတွင်းသို့ နွားဝင်သည့် အတွက်ဟုဆိုကာ သားအမိနှစ်ဦးကို လူမဆန်စွာ ရိုက်နှက်

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း ကျောက်လှေကား ကျေးရွာ (ဘာလူးခါလီ ဖာရာ) မှ ဦးအေမာရာန် (အသက် ၃၈ နှစ်) ၏ သားဖြစ်သူ အသက် ၈ နှစ် အရွယ် ကလေးငယ်သည် ဇူလိုင်လ (၁) ရက်နေ့ ည ၆ နာရီ အချိန်တွင် အိမ်မှ နွားများကို ကျောင်းနေစဉ် နွားများသည် ကျောက်လှေကား နယ်မြေ (၆) နယ်ခြားစောင့် ရဲတပ်ဖွဲ့ ရုံး၏ ခြံဝင်း အတွင်းသို့ ၀င်ရောက် သွားသောကြောင့် နယ်ခြားစောင့် ရဲတစ်ဦး ထွက်လာကာ အဆိုပါ ကလေးငယ်ကို ရိုက်နှက်ရာ ကလေးငယ်မှာ ထိုနေရာတွင်ပင် လဲကျသွားခဲ့သည်။ 

ကလေးငယ် ရိုက်နှက်ခံရမှုကို မိခင်ဖြစ်သူ ဒေါ်မူဘာရဲခ်ခါတူ (အသက် ၃၁ နှစ်) က ကြားသိ၍ နယ်မြေ (၆) နယ်ခြားစောင့် ရဲတပ်ဖွဲ့ ရုံးသို့ သွားရောက် စုံစမ်း မေးမြန်းရာ နယ်ခြာစောင့် ရဲတစ်ဦးက ၎င်းအား ရုံးခြံဝင်း အပြင်သို့ အတင်းဆွဲခေါ်ကာ ရိုက်နှက်သည့် အပြင် ခြေထောက်ဖြင့် ကန်ကျောက်မှုများကို အများပြည်သူ ရွာသားများ ရှေ့မှောက်တွင် ပြုလုပ်သဖြင့် မခံနိုင်၍ ထွက်ပြေး သွားခဲ့သည်။ သားအမိ နှစ်ဦးလုံးသည် ဒဏ်ရာများ ရရှိပြီး လမ်းပင် လျှောက်၍ မရတော့သည့် အခြေအနေတွင် ရှိနေကြောင်း ဒေသခံများက RB News သို့ပြောသည်။ ၎င်းတို့မှာ ငွေကြေး မပြေလည်သူများ ဖြစ်သဖြင့် ဆေးကုသရန်ပင် ခက်ခဲလျက် ရှိသည်ဟု ဆိုသည်။ 

အလားတူ ဇွန်လ (၂၉) ရက်နေ့ကလည်း ဒေါ်မူဘာရဲခ်ခါတူ၏ ဖခင် ဖြစ်သူ ဦးအဒူကော်ရိမ်း (အသက် ၅၀ နှစ်) ၏ ငွေကျပ် ၄ သိန်း တန်ဖိုးရှိ နွားထီး တစ်ကောင်သည် အဆိုပါ နယ်မြေရုံး ခြံဝင်း အတွင်းသို့ ၀င်ရောက် သွားသဖြင့် အဆိုပါ နွားထီးအား နယ်ခြားစောင့် ရဲများက သိမ်းဆည်းလိုက်ပြီး ပိုင်ရှင်ထံသို့ ပြန်လည် အပ်နှံခြင်း မရှိခဲ့ကြောင်း ဒေသခံများက ပြောပါသည်။ ထို့အပြင် ကျောက်လှေကား နော်ယာဖာရာရွာနေ ဦးအဒူလာမီးန် (ဘ) ဦးအဒူကော်ရိမ်း (အသက် ၄၂ နှစ်) ၏ ငွေကျပ် ငါးသိန်း တန်ဖိုးရှိ နွားတစ်ကောင်လည်း အဆိုပါ နယ်မြေရုံး ခြံဝင်းအတွင်း ၀င်ရောက် သွားသဖြင့် နယ်ခြားစောင့် ရဲများက သိမ်းဆည်း လိုက်ပြီး ပိုင်ရှင်ကို ပြန်လည် မပေးခဲ့ကြောင်း သိရသည်။ 

အဆိုပါ နယ်မြေ (၆) နယ်ခြားစောင့် ရဲတပ်ဖွဲ့ စခန်းရှိ နယ်ခြားစောင့် ရဲများသည် လူဆိုးဂိုဏ်း သဖွယ် ဖြစ်နေပြီး၊ ဒေသခံ ရိုဟင်ဂျာ ရွာသားများကို တရားသဖြင့် ကိုယ်ထိ လက်ရောက် စော်ကားခြင်းများကို မကြာခဏ ပြုလုပ်လျက် ရှိသဖြင့် အထက် အာဏာပိုင်များက စုံစမ်း စစ်ဆေး၍ အရေးယူပေးပါရန် ဒေသခံများက တောင်းဆိုကြောင်း RB News သို့ပြောပါသည်။