နောက်ဆုံးသတင်း/ဆောင်းပါးများ

အောင်ချက်ကောင်းခဲ့သည့် ဖေါင်တော်ပြင် အထက ခွဲ ကို အောက်ချက် ကျရန် အာဏာပိုင်များ ပြုလုပ်နေ



RB News
27.7.2015

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ်၊ ဖေါင်တော်ပြင် ကျေးရွာရှိ အထက်တန်း ကျောင်းခွဲသည် ဘူးသီးတောင် မြို့နယ်တွင် အောင်ချက် အကောင်းဆုံး ကျောင်းတစ်ကျောင်း ဖြစ်သောကြောင့် အာဏာပိုင်များက ယခု ပညာသင်နှစ်တွင် အောင်ချက်ကျသွားစေရန် စနစ်တကျ ပြုလုပ်လျက် ရှိကြောင်း သတင်း ရရှိပါသည်။

ဘူးသီးတောင် မြို့နယ်၊ ခြင်းသမား ကျေးရွာ အုပ်စု၊ ဖောင်တော်ပြင် ကျေးရွာရှိ အထက်တန်း ကျောင်းခွဲသည် ၂၀၁၄ - ၂၀၁၅ ပညာသင်နှစ်တွင် တစ်မြို့နယ်လုံး၌ အောင်ချက် ရာခိုင်နှုန်း အများဆုံး၊ အမှတ် အများဆုံးဖြင့် ဂုဏ်ယူစွာ ရပ်တည် နိုင်ခဲ့ပြီး၊ များသောအားဖြင့် ဒေသခံ ရိုဟင်ဂျာ ဆရာ/မ များက ၀င်ရောက်၍ စာသင်ကြား ပေးခဲ့ခြင်း ဖြစ်သည်။ ယင်းကျောင်းသည် ရိုဟင်ဂျာ ကျောင်းသား/သူ များ၏ အကျိုးကို သယ်ပိုးနေပြီး၊ စည်းကမ်းပိုင်း ရေးရာသော် လည်းကောင်း၊ သင်ကြားရေး အပိုင်းသော် လည်းကောင်း၊ အဖက်ဖက်မှ တိုးတက် အောင်မြင်လာပြီး မြို့နယ် အတွင်းတွင် စံပြကျောင်း သဖွယ် ဖြစ်လာသည်ကို မြို့ပေါ်မှာ အာဏာပိုင်များနှင့် ရခိုင်အစွန်းရောက် များ၏ လတ်တလော လုပ်ရပ်များက မူလအခြေအနေနှင့် ဆန့်ကျင်ဘက်သို့ တွန်းပို့လျက် ရှိနေသည်ဟု ဒေသခံများက RB News သို့ပြောပါသည်။ 

ယခုအခါ အဆိုပါ ကျောင်းတွင် ရိုဟင်ဂျာ ဆရာ/မ များကို သင်ကြားပေးခွင့် ရပ်တန့်လိုက်ပြီး၊ ရခိုင် ဆရာ/မ များသာ သင်ကြားပေး ရမည်ဟု ပြုလုပ်လိုက်ပြီး၊ ရခိုင် ဆရာ/မ များ၏ လုံခြုံရေးကြောင့် နေရပ်သို့ ချက်ချင်း ပြန်ရမည် စသည်ဖြင့် မူအသစ်များ ပြုလုပ်ကာ ရခိုင် ဆရာ/မ များက နံနက်ပိုင်းတွင်လည်း ကျောင်းချိန် အတိုင်း ကျောင်းသို့ မလာရောက်ဘဲ၊ ရောက်သည့် အခါတွင်လည်း ထမင်းစား၊ စကားပြော စသည်ဖြင့် အချိန်ဖြုန်းကာ ကျောင်းချိန် မပြီးဆုံးမှီ စောလျင်စွာ ပြန်သွားသည်ဟု ဒေသခံများက ပြောပါသည်။ ၎င်းတို့က ကျောင်းသား/သူ များ၏ စာသင်ချိန်များကို အလဟသ ဖြုန်းတီးကာ ကျောင်းသား/သူများ စာသင်ချိန် နည်းပြီး စာမတတ်ရန် တမင် ပြုလုပ်လျက် ရှိသည်ဟု ဆိုသည်။ 

သဘောထား ပျော့ပျောင်းသည့် ယခင် မြို့နယ် အုပ်ချုပ်ရေးမှူး ဦးမျိုးတင့်ဇော်က ဆရာ/မ များ ညအိပ်ရန် အဆောင် တစ်ဆောင် ဆောက်ပေးခဲ့သော်လည်း၊ ယခု အုပ်ချုပ်ရေးမှူး ဖြစ်သူ ရခိုင် အစွန်းရောက် ဦးသန်းရွှေက ညအိပ်ရန် ခွင့်မပြုသည်မှာ ရိုဟင်ဂျာ ကျောင်းသား/သူများကို စာသင်ချိန် အပြည့်အ၀ ပေးနိုင်မည် ဖြစ်သောကြောင့် တမင် ရည်ရွယ်ချက် ရှိရှိဖြင့် စာသင်ချိန် နီးပါးအောင်၊ ဆရာ/မ များ သွားလာရေးကြောင့် စာသင်ကြားရန် စိတ်ဝင်စားမှု နည်းပါးအောင် ပြုလုပ်နေခြင်း ဖြစ်သည်ဟု ဒေသခံများက ပြောပါသည်။ 

ဇူလိုင်လ (၂၀) ရက်နေ့က ဗုံးပေါက်ကွဲမည်ဟု အခြေအမြစ် မရှိသည့် ကောလဟလ သတင်းတစ်ခုကို လုပ်ကြံ ဖန်တီးပြီး ဖေါင်တော်ပြင် အ.ထ.က ကျောင်းခွဲကို ၁၀ ရက်တိတိ ပိတ်လိုက်သည်ဟု ကျေးရွာ အုပ်ချုပ်ရေးမှူးမှ တဆင့် ကြေညာခဲ့ပြီး၊ ကျောင်းကို ၁၀ ရက် ပိတ်လိုက်ကြောင်း သိရသည်။

ယမန်နှစ်က အောင်ချက် အကောင်းဆုံး၊ စည်းကမ်း အကောင်းဆုံးဖြင့် ဂုဏ်ယူဝင့်ကြွားစွာ ရပ်တည်နေသည့် ကျောင်းကို ယခုကဲ့သို့ ဆန့်ကျင်ဘက် ဖြစ်လာအောင် အာဏာပိုင်များနှင့် ရခိုင် အစွန်းရောက်များက ရည်ရွယ်ချက် ရှိရှိ ပြုလုပ်နေသဖြင့် မြို့နယ် ပညာရေး ဦးစီးဌာန၊ ပြည်နယ် ပညာရေး ဦးစီးဌာန တို့မှ စီစစ်၍ ယခင် အတိုင်း ကောင်းမွန်သည့် စာသင်ကြားမှု ဖြစ်လာစေရန် ဆောင်ရွက် ပေးစေလိုကြောင်း ဒေသခံများက ပြောပါသည်။

Comment ရေးရန်

Rohingya Exodus