ဘင်္ဂလားဖုန်း ကိုင်သည်ဟု လုပ်ကြံ၍ နယ်ခြားစောင့်ရဲ များက ငွေညှစ်
MYARF
RB News
19.8.2015
မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ အမှတ် (၅) နယ်မြေ၊ ရေမျက်တောင် ကျေးရွာရှိ နယ်ခြားစောင့် ရဲတပ်ဖွဲ့ ကင်းစခန်းမှ နယ်ခြားစောင့် ရဲတပ်ဖွဲ့ (၄) ဦးသည် သြဂုတ်လ (၁၅) ရက်နေ့ နံနက် ၁၀ နာရီခန့် အချိန်တွင် ဦးရှည့်ကျ ကျေးရွာသို့ သွားရောက်ပြီး မော်လ၀ီခါလစ်၏ ဆိုင်တွင် ထိုင်၍ MPT ဆင်းမ်ကဒ်ပါသော ဖုန်းများဖြင့် သီချင်း နားထောင် နေသော ဦးရှည့်ကျ ကျေးရွာသား ရော်ရှိဒုလ္လာ (ဘ) ဦးအာဘူလ်ဟာရှိမ် (အသက် ၁၇ နှစ်) နှင့် နုရ်ကာမာလ် (ဘ) ဦးဇော်ဘောရ် (အသက် ၂၈ နှစ်) တို့ကို ဘင်္ဂလား ဖုန်းသုံးနေသည်ဟု လုပ်ကြံ စွပ်စွဲ၍ ဖမ်းဆီးရန် ကြိုးစားခဲ့သည်။
ထိုသို့ ကြိုးစားစဉ် နုရ်ကာမာလ် ဆိုသူသည် ထွက်ပြေး တိမ်းရှောင် သွားနိုင်ခဲ့သော်လည်း ၎င်း၏ ဖုန်းကျခဲ့ပြီး၊ ရော်ရှိဒုလ္လာ ဆိုသူ အဖမ်းခံခဲ့ရသည်။ ရော်ရှိဒုလ္လာ၏ ဖုန်းကို စစ်ဆေး၍ MPT ဆင်းမ်ကဒ် တွေ့ရှိခဲ့သော်လည်း ဖုန်းဟန်းဆက်မှာ ဘင်္ဂလားဒေ့ရှ် နိုင်ငံမှ လာသည့် ဖုန်းဖြစ်၍ ဘင်္ဂလား ဆင်းမ်ကဒ်လည်း သုံးစွဲသည်ဟု စွပ်စွဲ၍ ရိုက်နှက်ကာ ငွေကျပ် တစ်သိန်း ငါးသောင်း ညှစ်ယူခဲ့ကြောင်း ဒေသခံတစ်ဦးက RB News သို့ပြောပါသည်။
ထွက်ပြေး တိမ်းရှောင် သွားခဲ့သူ နုရ်ကာမာလ်၏ ဖုန်းကို နယ်ခြားစောင့် ရဲများက သိမ်းဆည်း၍ ၎င်းတို့အား ငွေမပေးပါက လိုက်လံ ဖမ်းဆီးပြီး ထောင်ချမည်ဟု ခြိမ်းခြောက်ခဲ့သည်။ ထို့ကြောင့် နုရ်ကာမာလ်ကလည်း ကြောက်ရွံ၍ နယ်ခြားစောင့် ရဲများအား ငွေပေးရန် သဘောတူခဲ့ရပြီး၊ ငွေကျပ် သုံးသောင်း ညှစ်ခံခဲ့ရကြောင်း အဆိုပါ ဒေသခံက ပြောပါသည်။
အဆိုပါ ကင်းစခန်းမှ နယ်ခြားစောင့် ရဲများသည် ရွာအတွင်းသို့ အချိန်မတော် ၀င်ရောက်၍ ရွာသားများကို အမြဲလိုလို နှောက်ယှက်၍ လုပ်ကြံ စွပ်စွဲမှုများ ပြုလုပ်ပြီး ငွေညှစ်ခြင်းများ မကြာခဏ ပြုလုပ်လေ့ ရှိသည်ဟု ဆိုသည်။ ထွက်ပြေး သွားသူ၏ ဖုန်းတွင် MPT ဆင်းမ်ကဒ်သာ ရှိသော်လည်း မတရား သဖြင့် အနိုင်ကျင့် ရိုက်နှက်ခံရပြီး ငွေညှစ်ခံရမည်ကို စိုးရိမ်၍ ထွက်ပြေးခဲ့ခြင်း ဖြစ်သည်။
