ခမရ ၅၆၄ မှ ဒု-တပ်ရင်းမှူးနှင့် အဖွဲ့ ဒေသခံများ ထံမှ စားသောက်ဖွယ်ရာများ လုယက်၊ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့နယ်၏ မြောက်ဖက်ဆုံး၊ ဘင်္ဂလားဒေ့ရှ် နယ်စပ်၊ အောင်ဇံ ကျေးရွာအုပ်စု အတွင်း နယ်ခြားခြံစည်းရိုးနားတွင် လွန်ခဲ့သည့် ရွေးကောက်ပွဲ ကာလ အကြို နယ်မြေ လုံခြုံရေး အတွက် ခမရ (၅၆၄) တပ်ရင်းမှ ဒု-တပ်ရင်းမှူး ဗိုလ်မှူး အောင်ကျော်စိုး ဦးဆောင်သည့် စစ်သား (၁၂) ဦးပါ အဖွဲ့ကို တာဝန်ပေး စခန်းချ ထားခဲ့သည်။ ထိုစခန်းမှ စစ်သားများသည် ဆာလေတောင်ရွာ၊ ကြောင်တိုးရွာနှင့် အောင်ဇံ - ရိုဟင်ဂျာရွာ များသို့ မကြာခဏ ၀င်ရောက်ပြီး ကြက်၊ ဘဲ၊ ဆိတ်များ ဆွဲယူသွားခြင်း၊ ရေကန်မှ ငါးများ ဖမ်းယူသွားခြင်း၊ စိုက်ခင်းများမှ ဟင်းသီးဟင်ရွက်များ ဆွတ်ခူး ယူသွားခြင်း များကို နေ့စဉ်နှင့်အမျှ အတင်းအဓမ္မ ပြုလုပ်လျက် ရှိကြောင်း ဒေသခံများက RB News သို့ပြောပါသည်။ 

အဆိုပါ စစ်သားများသည် စားသောက်ဖွယ်ရာများ လုယက် စားသုံးခြင်း သာမက ဒေသခံ ရွာသားများထံမှ မတရားသဖြင့် ငွေညှစ်လျက် ရှိသည်ဟု ဆိုသည်။ 

ဒီဇင်ဘာလ (၁၂) ရက်နေ့တွင် ကြောင်တိုးရွာမှ ဦးအီဆုပ်အလီ (ဘ) ဦးဆုလ်တာန်အာမတ်၊ ဦးခါလေဒ်ဟူစိန်း (ဘ) ဦးဆုလ်တာန်အာမတ်နှင့် ဦးဟူဆောင်းအလီ တို့ကို စခန်းသို့ ဆင့်ခေါ်၍ စားကျက်၌ ချုံပုတ် ခုတ်ထွင်း ရှင်းလင်းသည်ကို စစ်စခန်းမှ ခွင့်ပြုချက် မယူဘဲ လုပ်သောကြောင့် အပြစ်ရှိသည်ဟု အတင်းအဓမ္မ ၀န်ခံခိုင်းပြီး ငွေကျပ် ၃ သောင်းစီ ညှစ်ယူခဲ့သည်။ 

ဒီဇင်ဘာလ (၁၄) ရက်နေ့တွင် အောင်ဇံ ကျေးရွာအုပ်စု၊ ဖူရာန်မာဂျွားရွာမှ ဦးမူရှားအလီ (ဘ) ဦးအလီဟူဆောင်းနှင့် ဦးရှောမ်ရှုအာလောမ် (ဘ) ဦးမော်တီရာမာန် တို့နှစ်ဦးကို စခန်းသို့ ဆင့်ခေါ်ပြီး ဖမ်းချုပ်ကာ နွေစပါး စိုက်ပျိုးရန် ယာယီဆည် ဆောက်လုပ်သည်ကို ဒု-တပ်ရင်းမှူး ထံမှ ခွင့်ပြုချက် မယူဘဲ အပြစ်ရှိသည်ဟု အတင်းအဓမ္မ ၀န်ခံခိုင်းပြီး ဒဏ်ငွေဟု ဆိုကာ ငွေကျပ် ၅ သောင်းစီ ညှစ်ယူခဲ့ကြောင်း ဒေသခံများက RB News သို့ပြောပါသည်။