သရေကုန်တန်း ကျေးရွာ အုပ်ချုပ်ရေးမှူးက ရွာသားများထံမှ ငွေညှစ်

RB News
30.12.2015

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း၊ သရေကုန်တန်း ကျေးရွာ အုပ်ချုပ်ရေးမှူး ဦးဖိုက်ဆဲလ် (ဘ) ဦးယာစီးန်သည် အာဏာ အလွဲသုံးစား ပြုလုပ်၍ ရွာသားများ ထံမှ မကြာခဏ ငွေညှစ်လျက် ရှိကြောင်း သတင်း ရရှိပါသည်။ 

ဒီဇင်ဘာလ (၂၉) ရက်နေ့ နံနက် ၉း၃၀ နာရီ အချိန်တွင် သရေကုန်တန်း ကျေးရွာအုပ်စု၊ အနောက်ရွာမှ ဦးရော်ရှိဒူလ္လာ (ဘ) ဦးမော်နီအူလ္လာ (ခ) ဦးမော်နိုကို ခြိမ်းခြောက်၍ ငွေကျပ် နှစ်သိန်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောပါသည်။ 

ထိုသို့ ငွေညှစ်ရခြင်း အကြောင်းမှာ ဦးရော်ရှိဒူလ္လာ၏ နေအိမ်သည် လွန်ခဲ့သည့် ဇွန်လတွင် မိုးအဆမတန် ရွာသွန်း၍ ရေကြီးခြင်း၊ တစ်ဖန် ဇူလိုင်လတွင် မုန်တိုင်း တိုက်ခိုက်မှု များကြောင့် လုံးဝ ပျက်စီးသွားခဲ့သည်။ ထို့နောက် နိုင်ငံတော် သမ္မတ ခရီးစဉ် အပြီးတွင် အာဏာပိုင်များက မုန်တိုင်းအတွင်း ပျက်စီးသွားသော နေအိမ်များကို ခွင့်ပြုချက် ယူစရာ မလိုဘဲ ပြုပြင်နိုင်ကြောင်း ပြောကြားခဲ့သည်။ ထို့ကြောင့် ဦးရော်ရှိဒူလ္လာလည်း နေအိမ် ပြုပြင်ခဲ့သူ များထဲတွင် တစ်ဦး အပါအ၀င် ဖြစ်ခဲ့သည်။ 

အာဏာပိုင်များ၏ ပြောကြားချက် များကြောင့် အိမ်ပြုပြင် ထားသူ အများစုမှာ နောက်ပိုင်းတွင် ကျေးရွာ အုပ်ချုပ်ရေးမှူး များ၏ ငွေညှစ်ခြင်းကို ခံနေရသည်။ ဤကဲ့သို့ ဖြစ်စဉ်များ ရွာတိုင်းတွင် ဖြစ်လျက် ရှိသည်ဟု ဒေသခံများက ပြောပါသည်။ ယခုကိစ္စတွင် အထက် အာဏာပိုင်များ ပါဝင် ပတ်သက်ခြင်း မရှိဘဲ အောက်ခြေ ကျေးရွာ အုပ်ချုပ်ရေးမှူး များကသာ လုပ်နေသည်ကို လက်တွေ့ မြင်နေရသည်ဟု ဆိုသည်။ 

အလားတူ သရေကုန်တန်း ကျေးရွာ အုပ်ချုပ်ရေးမှူး ဦးဖိုက်ဆဲလ်သည် ဒီဇင်ဘာလ (၂၉) ရက်နေ့တွင် သရေကုန်တန်း၊ အနောက်ရွာမှ ဦးဟာလိမ် (ဘ) ဦးအဒူဇော်ဘောရ် ထံမှ အိမ်ပြုပြင်သည်ဟု ဆိုကာ ငွေကျပ် သုံးသိန်း ညှစ်ယူခဲ့သည်။ သို့သော် ဦးဟာလိမ်ကို မြို့နယ် အုပ်ချုပ်ရေးမှူး ထံမှ ခွင့်ပြုချက် ယူပေးမည်ဟု ဆိုကာ ကတိပေး၍ ငွေညှစ်ခဲ့ခြင်း ဖြစ်ကြောင်း သိရသည်။