နောက်ဆုံးသတင်း/ဆောင်းပါးများ

ရဲမှူးချုပ်နှင့် ရဲမှူးကြီး (G1) အတွက် ငွေရှာပေးရသည်ဟု ခေါင်းစဉ်တပ်ကာ နယ်ခြားစောင့်ရဲများ ငွေညှစ်



MYARF
RB News
7.12.2015

မောင်တော ။ ။ ရခိုင်ပြည်နယ်၊ မောင်တော မြို့နယ် ကျီးကန်းပြင် ကျေးရွာ အခြေစိုက် အမှတ် (၁) နယ်ခြားစောင့် ရဲတပ်ဖွဲ့ ဌာနချုပ်ရှိ ရဲမှူးကြီး (G1) က မောင်တော မြောက်ပိုင်းရှိ နယ်ခြားစောင့်ရဲများ ငွေညှစ်နေသော သတင်းများ မကြာခဏ ကြားရ၍ စစ်ဆေးရန်ဟု ဆိုကာ ဒီဇင်ဘာလ (၃) ရက်နေ့မှ စ၍ ကြိမ်ချောင်းနှင့် အောင်စစ်ပြင် ကျေးရွာကြားရှိ နယ်ခြားစောင့် ရဲတပ်ဖွဲ့ စခန်း (ယခင် အမှတ် ၂၄ န.စ.က စခန်း) တွင် ရုံးထိုင်လျက် ရှိသည်။ ရဲမှူးကြီး ရုံးထိုင် စစ်ဆေးနေသည်ကို အခွင့်ကောင်းယူ၍ ကြိမ်ချောင်း နယ်ခြားစောင့် ရဲတပ်ဖွဲ့ စခန်း (ယခင် ကြိမ်ချောင်း ရဲစခန်း) တွင် တာဝန်ထမ်းဆောင် နေသော နယ်ခြားစောင့် ရဲတပ်သား ဇော်ဇော်အောင်က ရဲမှူးကြီး အတွက် ငွေရှာပေးရသည်ဟု ဆိုကာ ယခင်ကထက် ပို၍ သောင်းကျန်းပြီး ငွေညှစ်လျက် ရှိနေသည်ဟု ဒေသခံများက RB News သို့ပြောပါသည်။ 

“အရင်က ဇော်ဇော်အောင် မတရားသဖြင့် ငွေညှစ်လို့ ရတဲ့ထဲက စခန်းမှူးကို နည်းနည်းပါးပါး ပေးပြီး ကျန်တာ သူစားနိုင်ခဲ့တယ်။ အခုဆိုရင် လေးပုံသုံးပုံကို စခန်း ၂၄ မှာ ရုံးထိုင်နေတဲ့ ရဲမှူးကြီးကို ပေးနေရတယ်။ ကျန်တဲ့ တပုံကို စခန်းမှူးကို ပေးနေရတယ်။ ရဲမှူးကြီးရတဲ့ထဲက တစ်ဝက်ကို ရဲမှူးချုပ် တင်ကိုကို ကိုဝေစု ပေးရတယ်။ ရဲမှူးချုပ်နဲ့ ရဲမှူးကြီး အတွက် ငွေများများ ရှာပေးနိုင်မှ သူတို့ရဲ့ လူယုံတော် ဖြစ်နိုင်ပြီး ရာထူးတက်မှာ ဆိုတော့ ငွေများများ ရှာပေးနေရတယ်လို့ ဇော်ဇော်အောင်က ပြောနေတယ်” ဟု ဒေသခံ တစ်ဦးက ပြောပါသည်။ 

ထို့အပြင် ဇော်ဇော်အောင်က ၎င်းသည် အထက်အရာရှိကြီး များ၏ အထူးအာဏာဖြင့် လှုပ်ရှားနေသူ ဖြစ်၍ မည်သူ့ကိုမှ အရေးစိုက်ရန် မလိုဟု ကြိုးဝါး ပြောဆိုလျက် ရှိသည်။ 

ဒီဇင်ဘာလ (၄) ရက်နေ့တွင် ဇော်ဇော်အောင်နှင့် အခြား နယ်ခြားစောင့်ရဲ တစ်ဦးသည် သူရိုင်းကျေးရွာ အ၀တွင် စောင့်ပြီး သူရိုင်းကျေးရွာသို့ ခရီးသည်တစ်ဦး ပို့ပေးပြီး ကြိမ်ချောင်းသို့ ပြန်လာနေသော ဆိုင်ကယ် တက္ကစီဆွဲနေသူ ကြိမ်ချောင်း အလယ်ရွာမှ ဦးဆဒမ်ဟူစိန်း (ဘ) ဦးဟူစိန်းအာမတ်ကို စစ်ဆေးပြီး၊ ၎င်း၏ ရှေ့မှောက်တွင်ပင် ဆိုင်ကယ်ထဲသို့ ဘင်္ဂလား ဆင်းမ်ကဒ် တစ်ခု ထည့်သွင်းပေးပြီး ဘင်္ဂလား ဆင်းမ်ကဒ် မိသည်ဟု လုပ်ကြံကာ ငွေကျပ် (၅) သိန်း တောင်းခံခဲ့သည်။ အပြစ်မဲ့ ဆိုင်ကယ် တက္ကစီသမားက ငွေကျပ် (၅) သိန်း မပေးသဖြင့် စခန်းသို့ ခေါ်ဆောင် သွားကာ ရိုက်နှက်၍ ချုပ်နှောင် ထားခဲ့သည်။ 

ထို့နောက် ဇော်ဇော်အောင်က ကြိမ်ချောင်း အလယ်ရွာမှ ၎င်း၏ တပည့်ဖြစ်သူ ဘော်ရှော်ရ်ကို ဖုန်းဆက်၍ ဦးဆဒမ်ဟူစိန်း၏ အိမ်သို့ သွားရောက်ခိုင်းပြီး မိဘများအား ငွေမပေးပါက ရဲမှူးကြီးထံ အပ်နှံ၍ ထောင်ကျအောင် လုပ်မည်ဟု ခြိမ်းခြောက်ကာ ငွေကျပ် ၃ သိန်း ၅ သောင်း ညှစ်ယူခဲ့သည်။ 

ဇော်ဇော်အောင်သည် ဒေသခံ ရွာသားများထံမှ မတရားသဖြင့် ငွေညှစ်သည့် အပြင် WY မူးယစ်ဆေးဝါး ရောင်းဝယ် နေသူ တစ်ဦး ဖြစ်သည်။ ၎င်း၏ မူးယစ်ဆေးဝါး လုပ်ငန်းတွင် အစုစပ်ပါဝင်သူ နှစ်ဦးဖြစ်သည့် ကြိမ်ချောင်း ကျေးရွာမှ ရှားဘူးတို့ နှစ်ဦးကို မူးယစ်ဆေးဝါးများနှင့် ဘင်္ဂလားဒေ့ရ်ှသို့ စေလွှတ်ထားသည်။ 

ဇော်ဇော်အောင်၏ ငွေညှစ်မှုသတင်းများကို အထက်အရာရှိကြီးများက အကြိမ်ကြိမ် ကြားသိသော်လည်း စစ်ဆေး အရေးယူခြင်း မပြုသည်မှာ ရဲမှူးချုပ်နှင့် ရဲမှူးကြီးတို့ ဝေစုရနေ၍ ဖြစ်သည်ဟု ဒေသခံများက ယူဆနေကြသည်။

Comment ရေးရန်

Rohingya Exodus