မောင်တော ခရိုင်ရှိ ရပ်ကွက် / ကျေးရွာ များတွင် အုပ်ချုပ်ရေးမှူးများ စတင် ရွေးချယ်

မောင်တော ။ ။ ရခိုင်ပြည်နယ်၊ မောင်တော ခရိုင်ရှိ ရပ်ကွက်/ ကျေးရွာများတွင် ၂၀၁၆ ခုနှစ် ဇန်န၀ါရီလ (၁) ရက်နေ့မှစ၍ ရပ်ကွက်/ ကျေးရွာ အုပ်ချုပ်ရေးမှူးများ စတင် ရွေးချယ်လျက် ရှိသည်။ မောင်တော၊ ဘူးသီးတောင်၊ ရသေ့တောင် စသော မြို့နယ်များတွင် မြို့နယ် အုပ်ချုပ်ရေးမှူး များက ဌာနပေါင်းစုနှင့် ပူးပေါင်း၍ အုပ်ချုပ်ရေးမှူး ရွေးချယ်ရေး အဖွဲ့ တစ်ဖွဲ့စီကို ရပ်ကွက်/ ကျေးရွာတိုင်း အတွက် ဖွဲ့စည်း ပေးခဲ့သည်။ 

အဆိုပါ အဖွဲ့သည် ဇန်န၀ါရီလဆန်း တစ်ရက်နေ့မှစ၍ ရပ်ကွက်/ ကျေးရွာ များသို့ သွားရောက်ပြီး အုပ်ချုပ်ရေးမှူး မရွေးချယ်ခင် ဦးစွာ ရပ်မိရပ်ဖ အဖွဲ့ဟု ခေါ်သော လူငါးဦး ပါသော အဖွဲ့တစ်ဖွဲ့စီကို ရွေးချယ် ဖွဲ့စည်းလျက် ရှိသည်။ ဘူးသီးတောင် မြို့နယ်တွင် ကျေးရွာ အုပ်စု (၈၅) စု အတွက် ရွေးချယ်ပြီး ဖြစ်ကြောင်း သိရှိရသည်။ မောင်တော မြို့နယ်နှင့် ရသေ့တောင် မြို့နယ် များတွင် ရွေးချယ် နေဆဲ ဖြစ်သည်။ 

အဆိုပါ ရပ်မိရပ်ဖ အဖွဲ့က ကြီးကြပ်၍ ဆယ်အိမ်စုမှူးများ ရွေးချယ်မည် ဖြစ်ပြီး၊ ဆယ်အိမ်စုမှူး များက မဲပေး၍ အုပ်ချုပ်ရေးမှူး တင်မြှောက်မည် ဖြစ်သည်။ ဦးသိန်းစိန် ဦးဆောင်သည့် လက်ရှိ အစိုးရမှာ ဇန်န၀ါရီလ တစ်လသာ သက်တမ်း ကျန်ရှိပြီး၊ ဇန်န၀ါရီလ (၃၁) ရက်နေ့ ဆိုလျှင် သက်တမ်း ကုန်ဆုံးသွားမည် ဖြစ်သည်။ ရွေးကောက်ပွဲ အနိုင်ရ NLD ပါတီက အစိုးရသစ် ဖွဲ့စည်းပြီး နိုင်ငံကို အုပ်ချုပ်သွားမည် ဖြစ်သည်။ ယခု ရွေးချယ် တင်မြှောက် နေသည့် ရပ်ကွက်၊ ကျေးရွာ အုပ်ချုပ်ရေးမှူး များမှာလည်း ရှေ့နှစ်များ အတွက်သာ ဖြစ်၍ သက်တမ်း ကုန်ဆုံးနေသည့် ဦးသိန်းစိန် အစိုးရနှင့် လုံးဝ သက်ဆိုင်ခြင်း မရှိဘဲ အနိုင်ရ NLD ပါတီ၏ တာဝန်သာ ဖြစ်သည်ဟု ဒေသခံများက ဆိုသည်။ 

မိမိတို့ အစိုးရနှင့် သက်ဆိုင်ခြင်း မရှိသည်ကို သိလျက်နှင့် ယခုကဲ့သို့ အတင်းအဓမ္မ မြန်မြန်ဆန် ရွေးချယ်နေရခြင်းမှာ -- ဆယ်အိမ်စုမှူများက မဲပေးပြီး ရွေးချယ်သည့် အုပ်ချုပ်ရေးမှူးလောင်သည် မြို့နယ် အုပ်ချုပ်ရေးမှူးနှင့် သီးသန့် တွေ့ဆုံရပြီး၊ အုပ်ချုပ်ရေးမှူးသစ် တစ်ဦးထံမှ လာဘ်ငွေ ကျပ်သိန်း ၁၀၀ မှ ၁၅၀ ထိ ယူလေ့ရှိသည်ဟု အုပ်ချုပ်ရေးမှူးရုံးနှင့် နီးစပ်သူ တစ်ဦးက RB News သို့ပြောပါသည်။ ထိုသို့ လာဘ်ငွေ ပေးမှသာ အုပ်ချုပ်ရေးမှူး ခန့်အပ်လွှာ ပေးအပ်သည်ဟု ဆိုသည်။ 

မောင်တော မြို့နယ်တွင် ရပ်ကွက်၊ ကျေးရွာ အုပ်စု ၁၀၅ စုနှင့် ဘူးသီးတောင် မြို့နယ်တွင် ၈၅ စု ရှိသည်။ အရေးကြီးဆုံး ဖြစ်သည့် အချက်မှာ အုပ်ချုပ်ရေးမှူး အသစ်များ ထံမှ ငွေများ မြန်မြန်ယူနိုင်ရန်ပင် ဖြစ်သည်။ 

ထိုသို့ ရွေးချယ်တင်မြှောက်ရာတွင်လည်း အချို့သော ရခိုင်နှင့် ရိုဟင်ဂျာ ပေါင်းစပ်ရွာများတွင် ရိုဟင်ဂျာများကို မဲပေးပိုင်ခွင့်နှင့် ရွေးချယ်ခံပိုင် မပေးဘဲ ဘေးဖယ်ထားသည်ဟု ဒေသခံများက RB News သို့ပြောပါသည်။ မောင်တော မြို့နယ် မြောက်ပိုင်း၊ လောင်းဒုံ ကျေးရွာတွင် ရခိုင်၊ မြို၊ ရိုဟင်ဂျာ၊ မာရ်မာကြီး၊ ဟိန္ဒူ လူမျိုးများ နေထိုင်ကြသည့် ပေါင်းစပ် ကျေးရွာအုပ်စု တစ်စုဖြစ်သည်။ ဇန်န၀ါရီလ (၇) ရက်နေ့တွင် ယင်းကျေးရွာ၌ ကျေးရွာ အုပ်ချုပ်ရေးမှူး ရွေးချယ်ရာတွင် ရိုဟင်ဂျာများ၏ မဲပေးပိုင်ခွင့်နှင့် ရွေးချယ်ခံပိုင်ခွင့်ကို ပိတ်ပင်ထားခဲ့သည်။