နောက်ဆုံးသတင်း/ဆောင်းပါးများ

မသန်မစွမ်း မော်လ၀ီ တစ်ပါးကို နယ်ခြားစောင့်ရဲ များက လုပ်ကြံ ဖမ်းဆီး၍ ရက်စက်ပြီး ငွေညှစ်



MYARF
RB News
28.1.2016

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း၊ အလယ်သံကျော် ကျေးရွာနှင့် ကံပူးကျေးရွာ ကြားရှိ ချောင်းဝ နယ်ခြားစောင့် ရဲတပ်ဖွဲ့ ကင်းစခန်းမှ နယ်ခြားစောင့်ရဲ (၅) ဦးသည် အလယ်သံကျော် ကျေးရွာမှ နာမည်ဆိုးဖြင့် ကျော်ကြားသည့် နယ်ခြားစောင့်ရဲ များ၏ တပည့် ကျော်ဇေယျာဦး၏ ညီ အယာတူလ္လာ (ဘ) ဦးကာဒိရ်ဟူစိန်းနှင့် အတူ ဇန်န၀ါရီလ (၂၆) ရက်နေ့ ည ၈ နာရီ အချိန်တွင် ကံပူးကျေးရွာသို့ သွားရောက်၍ အိမ်ခြံဝင်း ရှေ့တွင် ဆိုင်ငယ် တစ်ဆိုင်ရောင်းချပြီး အသက်မွေးဝမ်းကျောင်း ပြုနေသည့် မသန်မစွမ်း ဖြစ်နေသည့် မော်လ၀ီ ဆိုက်ဖူလ္လာ (ဘ) ဦးဟာဘီရာမန် (အသက် ၂၅ နှစ်) ၏ ဆိုင်ကို စစ်ဆေးခဲ့သည်။ 

ဆိုင်တွင် တရားမ၀င် ပစ္စည်း တစ်စုံတစ်ရာ မတွေ့ရှိခဲ့သော်လည်း နောက်ဆုံးတွင် မော်လ၀ီဆိုက်ဖူလ္လာ၏ MPT ဆင်းမ်ကဒ်သုံး ဖုန်းကို စစ်ဆေးရန်ဟု ဆိုကာ ယူ၍ ၎င်း၏ ရှေ့မှောက်တွင်ပင် ဘင်္ဂလား ဆင်းမ်ကဒ် တစ်ကဒ် ထည့်သွင်းပေးကာ ဘင်္ဂလား ဆင်းမ်ကဒ် တွေ့ရှိသည်ဟု လုပ်ကြံ၍ မသန်မစွမ်း ဖြစ်နေသည့် မော်လ၀ီ ဆိုက်ဖူလ္လာကို လက်ထိပ်ခတ်၍ ဖမ်းဆီး ခေါ်ဆောင် သွားခဲ့သည်။ 

ထို့နောက် အဆိုပါ နယ်ခြားစောင့်ရဲ များသည် မော်လ၀ီဆိုက်ဖူလ္လာ ကိုပါ ၎င်းတို့နှင့် အတူ ခေါ်၍ ကံပူးကျေးရွာအုပ်စု၊ ဒိလ်ဖာရာသို့ သွားရောက် လှည့်လည်ခဲ့ပြီး စခန်းသို့ ပြန်သွားရာ မော်လ၀ီဆိုက်ဖူလ္လာသည် ခြေထောက်မသန်သူ တစ်ဦး ဖြစ်၍ နယ်ခြားစောင့်ရဲ များနှင့် အတူ လမ်းပြိုင် မလျှောက်နိုင်သောကြောင့် နယ်ခြားစောင့်ရဲ တစ်ဦးက ၎င်းကို အတင်းဆွဲခေါ်ရာ လမ်းတွင် ဒုက္ခကြုံတွေ့ရသည်။ 

ကင်းစခန်းနှင့် မနီးမဝေးရှိ တံတားပေါ်သို့ ရောက်သည့်အခါ မော်လ၀ီဆိုက်ဖူလ္လာက လမ်းဆက် မလျှောက်နိုင်တော့ သဖြင့် နယ်ခြားစောင့်ရဲ များက ၎င်းအား ပြန်လွှတ်ပေးရန် ငွေကျပ် ၅ သိန်း တောင်းခံခဲ့သည်။ မော်လ၀ီဆိုက်ဖူလ္လာက မိမိသည် မည်သည့် အပြစ်မှ ကျူးလွန်ထားခြင်း မရှိသဖြင့် ငွေ (၅) သိန်း ပေးနိုင်မည် မဟုတ်ကြောင်း၊ လက်ဆောင် အဖြစ် ငွေကျပ် နှစ်သောင်းသာ ပေးမည်ဟု ပြောကြားခဲ့သည်။ နယ်ခြားစောင့်ရဲ များက ငွေကျပ် နှစ်သောင်းကို လက်မခံဘဲ ဆက်လက် ခေါ်သွားရာ နောက်ဆုံးတွင် မတတ်သာတော့၍ ငွေကျပ် နှစ်သိန်း ပေး၍ နယ်ခြားစောင့်ရဲ များ၏ လက်ထဲမှ လွတ်မြောက် လာခဲ့သည်ဟု ဒေသခံ တစ်ဦးက RB News သို့ပြောပါသည်။ 

မော်လ၀ီဆိုက်ဖူလ္လာကို မဖမ်းဆီးမှီ ရွာအပြင်ဘက်တွင် ကံပူးကျေးရွာမှ မော်လ၀ီဟာမိတ်ကို တွေ့ရှိခဲ့၍ ဖမ်းဆီးနိုင်ရန် အမျိုးမျိုး လုပ်ကြံ ကြိုးစားခဲ့ကြသည်။ သို့သော်လည်း မအောင်မြင်ခဲ့ကြောင်း သိရသည်။ ငွေညှစ်ခံရသည့် မသန်စွမ်းသူ မော်လ၀ီ ဆိုက်ဖူလ္လာတွင် မိဘ၊ ဆွေမျိုး တစ်ဦးတစ်ယောက်မှ မရှိသည့် ဆင်းရဲသား တစ်ဦး ဖြစ်သည်။ နယ်ခြားစောင့်ရဲ များ၏ အတင်းဆွဲခေါ်မှုကြောင့် ၎င်း၏ ခန္ဓာကိုယ် တစ်ခုလုံး ယောင်ယမ်းလျက် ရှိကြောင်း သိရှိရပါသည်။

Comment ရေးရန်

Rohingya Exodus