နောက်ဆုံးသတင်း/ဆောင်းပါးများ

ဗိုလ်မှူးရွာရှိ ရဲကင်းစခန်းမှ ရဲများက ခရီးသွားများထံမှ ငွေညှစ်



Rohingya Eye
RB News
2.1.2016

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း ချောင်းဒေါင်း (ဂေါ်ရာခါလီ) ကျေးရွာမှ ဦးဟာလူး (ဘ) ဦးအဒူဟာကိမ်း (အသက် ၄၀ နှစ်) သည် စားကုန်ပစ္စည်း ဆိုင်ပိုင်ရှင် တစ်ဦး ဖြစ်ပြီး၊ ဒီဇင်ဘာလ (၂၇) ရက်နေ့က ဆိုင်အတွက် လိုအပ်သည့် စားကုန် ပစ္စည်းများ ၀ယ်ယူရန် မြို့ထဲသို့ သွားရောက်၍ United တည်းခိုရိပ်သာ ဆိုင်တန်းများမှ ပစ္စည်းများ ၀ယ်ယူ၍ ကျေးရွာသို့ ပြန်ရန် ကားဂိတ် ရှိရာသို့ ဆိုက်ကားဖြင့် သွားနေစဉ်၊ မောင်တော ခရိုင် ပြည်သူ့ ဆေးရုံ ရှေ့တွင် ဗိုလ်မှူးရွာရှိ ဒေါက်တာ ခင်မောင်လတ်၏ နေအိမ်ရှေ့ရှိ ရဲကင်းစခန်းမှ ရဲများ လာရောက်၍ ဆိုက်ကားကို ရပ်တန့် ခိုင်းပြီး ရဲကင်းစခန်း ရှိရာသို့ ဖမ်းဆီး ခေါ်ဆောင် သွားခဲ့သည်။ ထို့နောက် ဦးဟာလူးကို ၂၀၁၂ ခုနှစ် အရေးအခင်းတွင် ပါဝင်ခဲ့သည်ဟု လုပ်ကြံ စွပ်စွဲ၍ ငွေကျပ် (၇) သိန်း တောင်းခံခဲ့သည်။ တောင်းသည့်ငွေ မပေးပါက မီးရှို့မှု ပုဒ်မတပ်၍ တရားစွဲဆို သွားမည်ဟု ခြိမ်းခြောက် အကျပ်ကိုင် နေသဖြင့် နောက်ဆုံးတွင် ငွေကျပ် တစ်သိန်းငါးသောင်း ပေးမှသာ ပြန်လည် လွှတ်မြောက် လာခဲ့ကြောင်း ဒေသခံ တစ်ဦးက RB News သို့ပြောပါသည်။ 

အလားတူ ညောင်ချောင်း ကျေးရွာမှ ဦးရော်ရှိတ်အာမတ် (အသက် ၃၅ နှစ်) ကိုလည်း အဆိုပါ ကင်းစခန်းမှ ရဲများက အထက်ပါ အတိုင်း စွပ်စွဲ၍ ငွေကျပ် သုံးသောင်း ညှစ်ယူခဲ့သည်။ 

ထိုကဲ့သို့ ငွေညှစ်ခြင်းနှင့် ပတ်သက်၍ မြို့ခံ လူငယ် တစ်ဦးက “အရင်တုန်းက ရဲတွေက နယ်ပိုင်းက ရိုဟင်ဂျာတွေကို ဘင်္ဂလား ဆင်းမ်ကဒ် သုံးနေတယ် ဆိုပြီး စွပ်စွဲ ခြိမ်းခြောက်ပြီးတော့ ငွေညှစ်တယ်။ အခု ပဋိပက္ခ ဖြစ်ပြီးတဲ့ နောက်ပိုင်းမှာ စွပ်စွဲမှု အသစ်တစ်ခု တိုးလာတယ်။ အဲဒါကတော့ မီးရှို့မှုနဲ့ စွပ်စွဲပြီးတော့ ငွေညှစ်နိုင်တဲ့ နည်းလမ်းဘဲ။ အချို့ရဲတွေရဲ့ အပြောအရ ဒီဒေသမှာ ပဋိပက္ခဖြစ်ရင် သူတို့ အတွက် ပိုအကျိုးရှိတယ်၊ နိုင်ငံတော်ရဲ့ လစာ ပြီးတော့ နိုင်ငံတော်ရဲ့ ပုံရိပ်တွေကို ထိခိုက်အောင် လုပ်နေတဲ့ ရဲတွေကို ပြည်ထောင်စု အစိုးရ အနေနဲ့ အမြန်ဆုံး အရေးယူပေးဖို့ မြို့ခံ လူထုက လိုလားနေတယ်လို့ ပြောလိုပါတယ်” ဟုပြောပါသည်။

Comment ရေးရန်

Rohingya Exodus