နောက်ဆုံးသတင်း/ဆောင်းပါးများ

ရွေးကောက်ပွဲ ရှုံးနိမ့်သည့် အနောက်ပြင် အုပ်ချုပ်ရေးမှူးက ရွာသားများကို ညှဉ်းပန်း နှိပ်စက် ငွေညှစ်



MYARF
RB News
9.2.2016

ရသေ့တောင် ။ ။ ရခိုင်ပြည်နယ်၊ ရသေ့တောင် မြို့နယ်၊ အနောက်ပြင် ကျေးရွာ အုပ်ချုပ်ရေးမှူးက စစ်တပ်မှ ဗိုလ်ကြီး စိုင်းအောင်ကျော်၊ ဗိုလ်ကြီး သက်ပိုင်ဦး တို့နှင့် ပူးပေါင်း၍ ရွာသူရွာသား များကို ညှဉ်းပန်း နှိပ်စက်လျက် ရှိကြောင်း သတင်း ရရှိပါသည်။ 

ဖေဖော်ဝါရီလ (၅) ရက်နေ့တွင် တပ်ရင်း (၅၅၁) လက်အောက်ခံ စခန်းများ ဖြစ်သည့် ကူတောင်နှင့် ရွှေလောင်းတောင် အခြေစိုက် စခန်းခွဲများမှ ဗိုလ်ကြီး စိုင်းအောင်ကျော်နှင့် ဗိုလ်ကြီး သက်ပိုင်ဦးတို့ အဖွဲ့သည် အနောက်ပြင် ကျေးရွာ အုပ်ချုပ်ရေးမှူး ဦးမောင်မောင်နှင့် အတူ ရွာထဲသို့ ရောက်ရှိလာပြီး ဆယ်အိမ်စုမှူးများ၊ ရပ်မိရပ်ဖများ၊ ဘာသာရေး ဆရာများနှင့် ကျေးရွာ အတွင်းရှိ ဂုဏ်သရေရှိ ပုဂ္ဂိုလ်များကို အိမ်များထဲသို့ ၀င်ရောက်၍ လူမဆန်စွာ ထိုးကြိတ် ရိုက်နှက်ခဲ့ကြောင်း ဒေသခံများက RB News သို့ပြောပါသည်။ ကျေးရွာ အုပ်ချုပ်ရေးမှူး ရွေးကောက်ပွဲတွင် အနိုင်ရခဲ့သည့် ဦးရှကူရ်ကိုလည်း ရှာဖွေခဲ့သည်။ ၎င်းကို မတွေ့သဖြင့် ၎င်း၏ ဖခင် ဖြစ်သူ ဦးနူရ်အာမတ်ကို ပြင်းထန်စွာ ထိုးကြိတ် ရိုက်နှက်ခဲ့သည်။ 

ထို့နောက် မော်လ၀ီ ဆရာ တစ်ပါးဖြစ်သူ ဦးအလီဂျူဟာရ် ဆိုသူကို ဖမ်းဆီးရန် ရှာဖွေခဲ့ရာ၊ မော်လ၀ီက တိမ်းရှောင် နေသဖြင့် ပစ်မိန့်နှင့် အတူ လက်ခံထားသူကို ငွေဒဏ် (၁၀) ချမှတ်မည်ဟု ကြေညာခဲ့သည်။ 

ဖေဖော်ဝါရီလ (၅) ရက်နေ့မှ စ၍ ယနေ့ အချိန်ထိ ရွာသား (၃၀) ကျော်ကို ဗိုလ်ကြီးနှင့် အဖွဲ့က ရိုက်နှက်ခဲ့သည်။ ထို့အပြင် မော်လ၀ီ ဦးအလီဂျူဟာရ်ကို ဖမ်းဆီးရန် အိမ်သို့ အကြိမ်ကြိမ် သွားရောက်ပြီး ၎င်း၏ ဇနီးကို အမျိုးမျိုး ခြိမ်းခြောက်လျက် ရှိသည်။ ဗိုလ်ကြီးနှင့် အဖွဲ့၏ ရက်စက် ကြမ်းကြုတ်မှုကြောင့် ရွာတွင် အမျိုးသား တစ်ဦးမှ မနေရဲတော့ဘဲ တိမ်းရှောင်နေရသည်ဟု ဒေသခံများက ပြောပါသည်။ 

ဖေဖော်ဝါရီလ (၆) ရက်နေ့တွင် မနီးမဝေးရှိ တောင်သို့ ထင်းခုတ်ရန် သွားနေသည့် မူဖိစ် (ဘ) ဦးနူရ်ဘော်ရှော်ရ် အပါအ၀င် လူငယ် (၄) ဦးကို အုပ်ချုပ်ရေးမှူး ဦးမောင်မောင်နှင့် တပ်ရင်း (၅၅၁) မှ စစ်သားများ အကြောင်းမဲ့ ဖမ်းဆီး ရိုက်နှက်၍ ငွေကျပ် (၃) သိန်း ညှစ်ယူခဲ့သည်။ 

ဖေဖော်ဝါရီလ (၉) ရက်နေ့တွင် ကျေးရွာ အုပ်ချုပ်ရေးမှူး ဦးမောင်မောင်နှင့် စစ်သားများက အနောက်ပြင် ကျေးရွာမှ သစ်ခွဲသမား (လွှသမား) များ ဖြစ်သည့် ဦးယာစီးန်နှင့် ဦးကာမာလ် တို့ကို စစ်တပ်နှင့် ကျေးရွာ အုပ်ချုပ်ရေးမှူး ထံမှ ခွင့်ပြုချက် မယူဘဲ သစ်ခွဲနေသည်ဟု ဆိုကာ ငွေကျပ် တစ်သိန်း၊ ၀ါးနှင့် ဓနိ ရောင်းသူ ဦးဟာဘဲစ်အာမတ် (ဘ) ဦးအဒူရော်ကိမ်းကို ရွာတွင်း ဓနိနှင့် ၀ါးရောင်းနေသောကြောင့်ဟု ဆိုကာ ငွေကျပ် တစ်သိန်းနှင့် ဓနိ တစ်ထောင်၊ ဦးနူရ်ဘော်ရှော်ရ် (ဘ) ဦးအာဘူတာဟဲရ်ကို နွားတစ်ကောင် ရွာအပြင်ဘက် လယ်ကွင်းသို့ ထွက်ခဲ့သည်ဟု ဆိုကာ ငွေကျပ် တစ်သိန်း၊ ဦးနော်ဘီဟူစိန်း (ဘ) ဦးအီလီယာစ် အပါအ၀င် (၅) ဦးကို ရွာအပြင် ထွက်၍ ချောင်းကမ်းမှ ထင်းခုတ်ခဲ့သည်ဟု ဆိုကာ ငွေကျပ် နှစ်သိန်း၊ ဦးအာယုဖ်ခါန် (ဘ) ဦးဒူလားမျာနှင့် ဦးနိုရ်အာမတ် (ဘ) ဦးအဒူကာဒဲရ် တို့ကို ရွာအပြင်ဘက် တောင်ခြေစောင်းသို့ နွားကျောင်းရန် သွားခဲ့သည်ဟု ဆိုကာ ငွေကျပ် သုံးသိန်း -- ညှစ်ယူခဲ့သည်။ ထိုသို့ ငွေညှစ်ယူရာတွင် ကျေးရွာ အုပ်ချုပ်ရေးမှူး ဦးမောင်မောင်နှင့် အတူ တပည့်များ ဖြစ်သည့် ဦးအဒူလ်ဟာရှိမ်နှင့် ဦးရော်ရှိတ်တို့လည်း ပူးပေါင်း ပါဝင်ခဲ့သည်။ 

ဇန်န၀ါရီလ (၁၄) ရက်နေ့တွင် အနောက်ပြင် ကျေးရွာ အုပ်ချုပ်ရေးမှူး ရွေးကောက်ပွဲ ကျင်းပခဲ့သည်။ လက်ရှိ အုပ်ချုပ်ရေးမှူး ဦးမောင်မောင်နှင့် ဦးရှကူရ် (ခ) ဦးမောင်မောင်အေး တို့နှစ်ဦး ယှဉ်ပြိုင်ခဲ့ကြရာ ဦးရှကူရ်က မဲအများစု ရရှိခဲ့ပြီး အပြတ်အသတ် အနိုင်ရရှိခဲ့သည်။ ဇန်န၀ါရီလ (၁၆) ရက်နေ့တွင် ဦးမောင်မောင်က ရွေးကောက်ပွဲတွင် မဲမသမာမှုများ ရှိခဲ့သည်ဟု ဆိုကာ မြို့နယ် အုပ်ချုပ်ရေးမှူးထံ တောင်းဆိုခဲ့သောကြောင့် ရွေးကောက်ပွဲ ပြန်လည် ကျင်းပခဲ့သည်။ သို့သော်လည်း ဒုတိယ အကြိမ် ရွေးကောက်ပွဲတွင်လည်း ဦးရှကူရ် အနိုင်ရရှိခဲ့သည်။ 

ရွေးကောက်ပွဲ အပြီးတွင် ဆယ်အိမ်စုမှူးများကို လာဘ်ငွေများ ပေး၍ အနိုင်ရရှိသည့် ဦးရှကူရ်အား ကန့်ကွက်ခိုင်းရန်လည်း ကြံစည်၍ စည်းရုံးခဲ့သည်။ သို့သော်လည်း ဆယ်အိမ်စုမှူးများက မူလ အခြေအနေ ပေါ်တွင်သာ ခိုင်ခိုင်မာမာ ဆက်လက် ရပ်တည်ခဲ့ကြသည်။ 

ယင်းနေ့မှ စ၍ လက်ရှိ အုပ်ချုပ်ရေးမှူး ဦးမောင်မောင်က စစ်သားများကို ရှေ့တွင်ထားပြီး ရွာသူ/သား များကို ထင်ရာစိုင်း ဖိနှိပ်နေသည်ဟု ဒေသခံများက ပြောပါသည်။ ထိုသို့ ပြုလုပ်နိုင်ရန် စစ်တပ်အား ငွေကျပ် သိန်း (၃၀) လာဘ်ငွေ ပေးခဲ့သည်ဟု ဦးမောင်မောင်နှင့် ခင်မင်ရင်းနှီးသည့် ပုဂ္ဂိုလ် တစ်ဦးက ပြောပါသည်။ ယင်းလာဘ်ငွေများကို ရန်ကုန်မြို့ရှိ ဦးမောင်မောင်၏ ဦးလေး အရင်းဖြစ်သူ ဟာဂျီ ဦးဆော်လိမ်က ထုတ်ပေးခဲ့ကြောင်း၊ ဦးဆော်လိမ် ဆိုသူမှာ ၂၀၁၂ ခုနှစ် အရေးအခင်း နောက်ပိုင်းတွင် အနောက်ပြင် ရွာသားများကို ငွေကြေး၊ ဆန်၊ အ၀တ်အထည် စသည်များ ထောက်ပံ့ ပေးကာ ရွာသားများ၏ အသက်ပေါင်း များစွာကို ကယ်ဆယ်ခဲ့ကြောင်း၊ နောက်ပိုင်းတွင် တူတော်မောင် ဦးမောင်မောင်၏ အကျင့်ပျက် လုပ်ရပ်များကို သိလျက်နှင့် လိုလေသေးမရှိ ငွေကြေးဖြင့် ကူညီ ထောက်ပံ့လျက်ရှိပြီး၊ ရွာသားများ ၎င်းကြောင့် ဒုက္ခရောက်နေသဖြင့် ဦးဆော်လိမ်နှင့် ရွာသားများ လမ်းခွဲခဲ့သည်ဟု ဒေသခံများက ပြောပါသည်။

Comment ရေးရန်

Rohingya Exodus