နောက်ဆုံးသတင်း/ဆောင်းပါးများ

အစိမ်းနုရောင်ကဒ် မယူ၍ ရွေးချယ် ခံထားရသည့် အုပ်ချုပ်ရေးမှူးသစ်ကို ရာထူးမှ ပယ်ချ



RB News
9.4.2016

တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင်တွင် ဇန်န၀ါရီ လဆန်းပိုင်းမှ စ၍ ကျေးရွာ အုပ်ချုပ်ရေးမှူးများ ရွေးကောက် တင်မြှောက်ခဲ့သည်။ ရွေးကောက်ပွဲ အပြီးတွင် မောင်တောခရိုင် အုပ်ချုပ်ရေးမှူး ရုံးမှ အစ္စလာမ် ဘာသာဝင် အုပ်ချုပ်ရေးမှူး များကို နိုင်ငံသား စီစစ်ခံရမည့်သူများ၏ ကဒ်ပြား (ခ) အစိမ်းနုရောင် ကဒ်ပြား ထုတ်ယူရမည်ဟု ညွန်ကြားချက် တစ်ရပ် ထုတ်ပြန်ခဲ့သည်။

အဆိုပါ ညွန်ကြားချက်အရ အုပ်ချုပ်ရေးမှူး ရွေးချယ်ခံရသူ များက အစိမ်းနုရောင်ကဒ်များ ထုတ်ယူခဲ့သော်လည်း တောင်ပြိုလက်ဝဲ မြို့နယ်ခွဲ ကျွန်းပေါက်ပြုစု ကျေးရွာအုပ်စုမှ ရွေးချယ် တင်မြှောက်ခံရသူ ဦးမိုဟာမတ်အာနိုဝါရ် (ဘ) ဦးနူရုလ်အာမီးန်က အဆိုပါ အစိမ်းနုရောင် ကဒ်ပြားသည် နိုင်ငံသားဖြစ်သူများကို တရားမ၀င် ခိုးဝင်လာသူများ အဖြစ်သို့ တွန်းပို့ ထားသည့် ကဒ်ပြားဖြစ်၍ မိမိအနေဖြင့် မကိုင်ဆောင်နိုင်ကြောင်း ပြောဆို၍ ငြင်းဆိုခဲ့သည်။ 

ဦးမိုဟာမတ်အာနိုဝါရ်သည် မြန်မာနိုင်ငံတွင် မွေးဖွား ကြီးပြင်း၍ စစ်တွေ တက္ကသိုလ်မှ ရူပဗေဒ အဓိကဖြင့် ဘွဲ့ရရှိခဲ့သူ ဖြစ်သည်။ ထို့အပြင် ကျေးရွာသားများက ၎င်းတို့အား မျှတစွာ အုပ်ချုပ်မည်ဟု ယုံကြည်၍ ရွေးချယ်ထားသည့် အုပ်ချုပ်ရေးမှူးသစ် ဖြစ်သည့် အလျောက် ကျေးရွာသားများ၏ ကြည်ညိုလေးစားခြင်းကို ခံရသူ ဖြစ်သည်။ 

ခရိုင် အုပ်ချုပ်ရေးမှ ညွန်ကြားချက်ကို လိုက်နာရန် ငြင်းဆိုသောကြောင့် မြို့နယ် အုပ်ချုပ်ရေးမှ ၎င်းအား ရွေးချယ်ခံထားရသည့် ရာထူးမှ ဖြုတ်ချ၍ မဲရှုံးနိမ့်ခဲ့သူ လက်ရှိ အုပ်ချုပ်ရေးမှူး ဦးနူရ်မာမတ် (ဘ) ဦးဖြုတ်အာမတ်ကို အုပ်ချုပ်ရေးမှူး ပြန်ခန့်ရန် ငွေယူနေသည်ဟု ဒေသခံများက RB News သို့ပြောသည်။ မြို့နယ် အုပ်ချုပ်ရေးမှူး ရုံးမှ ဤကဲ့သို့ ပြုလုပ်နေခြင်းမှာ ဥပဒေနှင့် မညီသည့် အပြင် ပြည်သူများ၏ ဆန္ဒကိုပါ လျစ်လျူရှုရာ ရောက်သောကြောင့် အထက် အာဏာပိုင်များက လိုအပ်သလို စီစစ်၍ ဆောင်ရွက်ပေးရန် ကျေးရွာသားများက တောင်းဆိုသည်ဟု ပြောပါသည်။

Comment ရေးရန်

Rohingya Exodus