သစ်ခုတ်သမား (၃) ဦးကို စိုင်းဒင်မှ နယ်ခြားစောင့်ရဲ များက ဖမ်းဆီး နှိပ်စက် ငွေညှစ်
MYARF
RB News
6.5.2016
မောင်တော ။ ။ ရခိုင်ပြည်နယ်၊ ဘူးသီးတောင် မြို့နယ်၊ စိုင်းဒင် အခြေစိုက် နယ်ခြားစောင့် ရဲတပ်ဖွဲ့ ကင်းစခန်းမှ ဒုရဲအုပ် တစ်ဦး အပါအ၀င် တပ်ဖွဲ့ဝင် (၆) ဦးသည် ရိုဟင်ဂျာ သစ်ခုတ်သမား (၃) ဦးကို မတရားသဖြင့် ဖမ်းဆီးပြီး ကိုယ်လက်အင်္ဂါ ကျိုးသည်အထိ လူမဆန်စွာ ထိုးကြိတ် ရိုက်နှက်၍ ငွေကျပ် နှစ်သိန်း ခုနှစ်သောင်း ညှစ်ယူခဲ့ကြောင်း သတင်း ရရှိပါသည်။
ဘူးသီးတောင် မြို့နယ် ဆေးအိုးကျ ကျေးရွာမှ သစ်ခုတ်သမား များသည် ဧပြီလ (၂၄) ရက်နေ့ ည (၁၀) နာရီခန့် အချိန်တွင် မနီးမဝေးရှိ စိုင်းဒင်တောင်မှ အိမ်သုံးသစ်ဝါးများ ခုတ်ယူပြီး ဖောင်ဖွဲ့ကာ စိုင်းဒင်ချောင်း တစ်လျှောက် မျှော၍ ယူလာနေစဉ် စိုင်းဒင် အခြေစိုက် နယ်ခြားစောင့် ရဲတပ်ဖွဲ့ ကင်းစခန်းမှ နယ်ခြားစောင့်ရဲ များက ၎င်းတို့ကို ရပ်တန့်ခိုင်းပြီး ကင်းစခန်းသို့ ခေါ်ဆောင် သွားခဲ့သည်။ စခန်းထဲတွင် ၎င်းတို့ကို လူမဆန်စွာ ထိုးကြိတ် ရိုက်နှက်သည့် အပြင် ကိုယ်လက် အင်္ဂါ ကျိုးသည့် အထိ တုတ်ဖြင့် ရိုက်နှက်ခြင်း၊ ခန္ဓာကိုယ် ပေါ်တွင် ဆေးလိပ်မီးဖြင့် ထိုးခြင်းများ ပြုလုပ်ခဲ့သည်။ ထို့နောက် ငွေကျပ် နှစ်သိန်း ခုနှစ်သောင်း ညှစ်ယူ၍ ပြန်လည် လွှတ်ပေးခဲ့ကြောင်း ဒေသခံများက RB News သို့ပြောသည်။
လူမဆန်စွာ ထိုးကြိတ် ရိုက်နှက်ခံရပြီး ငွေညှစ်ခံရသူ သစ်ခုတ်သမား (၃) ဦးမှာ -- (၁) ဦးမိုဟာမတ်ဆိဒိတ် (ဘ) ဦးမာဆောန်၊ (၂) ဦးဆွေယာဒ်အာမတ် (ဘ) ဦးမာဆောန်နှင့် (၃) ဦးအဒူလာမီးန် (ဘ) ဦးနူရ်ဟူစိန်း -- တို့ဖြစ်သည်။
ရိုက်နှက် ငွေညှစ်ခံရသူ များသည် အခြားသော ဒေသခံ ရိုဟင်ဂျာများ နည်းတူ ၂၀၁၅ ခုနှစ် နှောင်းပိုင်းတွင် တိုက်ခတ်ခဲ့သည့် လေမုန်တိုင်း ဒဏ်ကြောင့် နေအိမ်များ ဆိုးဆိုးရွားရွား ပျက်စီးပြီးနောက် ပြုပြင် မွမ်းမံရန် အတွက် ခြေလျင် တပ်ရင်း (၅၅၁)၊ သစ်တော ဦးစီးဌာန၊ စိုင်းဒင် အခြေစိုက် နယ်ခြားစောင့် ရဲတပ်ဖွဲ့ ကင်းစခန်း တို့ရှိ တာဝန်ရှိသူ များထံမှ ခွင့်ပြုချက် ရယူပြီး သစ်ဝါးခုတ်ကာ မျှောယူလာခဲ့ခြင်း ဖြစ်သည်။
