နောက်ဆုံးသတင်း/ဆောင်းပါးများ

ဘင်္ဂလားဒေ့ရ်ှသို့ ယာယီ နိုင်ငံကူး လက်မှတ်ဖြင့် သွားသူများ အခက်အခဲ ပေါင်းစုံ ကြုံတွေ့နေရ



MYARF
RB News
6.5.2016

မောင်တော ။ ။ ရခိုင်ပြည်နယ်၊ မောင်တော မြို့နယ်မှ ဘင်္ဂလားဒေ့ရှ် နိုင်ငံသို့ ယာယီ နိုင်ငံကူး လက်မှတ်ဖြင့် တရားဝင် ခရီးသွားရောက်သည့် ရိုဟင်ဂျာများသည် နယ်စပ် ဖြတ်ကျော်ရာတွင် အခက်အခဲပေါင်းစုံ ကြုံတွေ့နေရသည့် အပြင် မတရား ငွေညှစ်ခြင်းလည်း ခံနေရကြောင်း သတင်း ရရှိပါသည်။

မောင်တော နယ်စပ် ကုန်သည်များ အသင်းမှ ထုတ်ပေးသည့် (၇) ရက် ယာယီ နိုင်ငံကူး လက်မှတ် ကိုင်ဆောင်ပြီး ဘင်္ဂလားဒေ့ရှ် နိုင်ငံသို့ တရားဝင် သွားလိုသူများသည် အောက်ပါ စခန်း အသီးသီးတွင် အခကြေးငွေများ ပေးသွင်းပြီး ကြိုတင် စာရင်းသွင်းရသည်။

(၁) နယ်စပ် ကုန်သည်များ အသင်း -- ၅၀၀ ကျပ်စီ ကောက်ခံ -- နံနက် (၉) နာရီမှ (၁၁) နာရီအတွင်း စာရင်းသွင်း ရသော်လည်း ၁၀း၃၀ နာရီမှ စ၍ အချိန်ကျော်ပြီဟု ဆိုကာ ၁၀၀၀ ကျပ်စီ ကောက်ခံ

(၂) P.O.E. -- ၅၀၀ ကျပ်စီ ကောက်ခံ

(၃) ခရိုင် လ.၀.က -- ၂၀၀၀ ကျပ်စီ ကောက်ခံ၊ နှစ်စဉ် နိုင်ငံကူးလက်မှတ် သက်တမ်းတိုးလျှင် ၅၀၀၀ ကျပ်စီ ကောက်ခံ

(၄) မြို့နယ် လူကုန်ကူးမှု တားဆီးရေး တပ်စခန်း -- ၅၀၀ ကျပ်စီ ကောက်ခံ -- (၂၀၁၅ မှ စ၍ ကောက်ခံခြင်း မရှိတော့)

(၅) ပို့ဆောင်ရေး ကိုယ်စားလှယ် -- ၄၅၀၀ ကျပ်စီ ကောက်ခံ

(၆) P.O.E. နယ်ခြားစောင့် ရဲတပ်ဖွဲ့ -- ၁၀၀၀ ကျပ်စီ ကောက်ခံ (နိုင်ငံကူး လက်မှတ် အသစ် ဖြစ်လျှင်)

အထက် ဖော်ပြပါ ဌာနများ အပြင် သာမာန် အရပ်သား တစ်ဦး ဖြစ်သည့် မောင်တော မြို့နယ် အမှတ် (၁) ရပ်ကွက်မှ ရခိုင်လူမျိုး ဦးထွန်းထွန်းနိုင် (အသက် ၄၂ နှစ်) ကလည်း ဆိပ်ကမ်းခ ဟုဆိုကာ ခရီးသည် တစ်ဦးထံမှ ငွေကျပ် ၁၀၀၀ မှ ၅၀၀၀ ထိ ဓါးပြသဖွယ် အတင်းအဓမ္မ ကောက်ခံလျက် ရှိသည့်အပြင် အမျိုးသမီးများကို တာဝန်မဲ့ စစ်ဆေးခြင်း၊ မဖွယ်မရာ ပြုလုပ်ခြင်းနှင့် ဂုဏ်သရေရှိ ပုဂ္ဂိုလ်များကို စော်ကားခြင်းများ ပြုလုပ်လျက် ရှိကြောင်း ခရီးသွား ပြည်သူများက RB News သို့ပြောသည်။

ထိုကဲ့သို့ အတင်းအဓမ္မ ကောက်ခံ နေခြင်းကို ဌာနဆိုင်ရာ ပေါင်းစုံ ရှေ့မှောက်တွင် ပြုလုပ်နေခြင်း ဖြစ်ပြီး၊ ငွေကောက်ခံရာတွင် ခရီးသည်များကို လူမဆန်စွာ ဆက်ဆံနေခြင်းကို အာဏာပိုင်များက ဟန့်တားခြင်း မရှိဟု ဆိုသည်။ ငွေကောက်ခံခြင်း အတွက် မြို့ပေါ် မည်သည့် နေရာတွင်မှ တရားဝင် ရုံးဖွင့်လှစ်၍ ဆိုင်းဘုတ် တင်ထားခြင်း မရှိသလို ငွေကောက်ခံပြီး ဖြတ်ပိုင်းလည်း ထုတ်ပေးခြင်း မရှိကြောင်း ခရီးသွား ပြည်သူများက ပြောပါသည်။

မောင်တော နယ်စပ် ကုန်သည်များ အသင်းမှ ထုတ်ပေးသည့် ယာယီ နိုင်ငံကူး လက်မှတ်နှင့် ယာယီ ခရီးသွားသူ များကို ၂၀၁၂ ခုနှစ် မတိုင်မှီက (၇) ရက် နေထိုင်ခွင့် ပြုခဲ့သော်လည်း ၂၀၁၂ ခုနှစ် နောက်ပိုင်းမှ စ၍ (၃) ရက်သာ နေထိုင်ခွင့်ပြုသည်။ ခွင့်ပြုသည့် (၃) ရက်တွင် ပထမရက်သည် ဌာနအသီးသီးတွင် စာရင်းသွင်းရာ၌ ကုန်ဆုံးသွားပြီး၊ ခွင့်ပြုကာလထက် ရက်ကျော်လွန် သွားပါက ဒဏ်ငွေအဖြစ် တစ်ရက်လျှင် ငွေကျပ် ၁၀၀၀ နှုန်းဖြင့် P.O.E. နယ်ခြားစောင့် ရဲတပ်ဖွဲ့၊ ခရိုင် လ.၀.က၊ မြို့နယ် လူကုန်ကူးမှု တားဆီးရေး အဖွဲ့ တို့ကို ပေးသွင်းရကြောင်း သိရှိရသည်။

Comment ရေးရန်

Rohingya Exodus