ဘူးသီးတောင် ဖရုံချောင်းမှ ရာအိမ်မှူး တစ်ဦးက ရွာသား (၉) ဦးကို လုပ်ကြံစွပ်စွဲ ခြိမ်းခြောက် ငွေညှစ်

RB News

28.9.2016

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် ဖရုံချောင်း ကျေးရွာအုပ်စု ပြိုင်းတောင်ရွာမှ ရာအိမ်မှူး တစ်ဦးဖြစ်သူ ဦးအီဆုပ် (ဘ) ဦးဆော်ဒုလ်အာမီးန်သည် ရွာသား (၉) ဦးကို လုပ်ကြံစွပ်စွဲ၊ ခြိမ်းခြောက်ပြီး ငွေညှစ်ခဲ့သည်။

စက်တင်ဘာလ (၁၇) ရက်နေ့တွင် ဖရုံချောင်း ကျေးရွာအုပ်စု၊ ပြိုင်းတောင်ရွာမှ ရာအိမ်မှူး ဖြစ်သူ ဦးအီဆုပ် (ဘ) ဦးဆော်ဒုလ်အာမီးန်သည် ဦးနော်ဇိရ်အာမတ် (ဘ) ဦးဟာဖီးဇ်အာမတ်နှင့် ဦးဆော်လိမ် (ဘ) ဦးဟာရှိမ်းတို့ အပါအ၀င် ရွာသား (၉) ဦးကို တဖက်နိုင်ငံသို့ သွားရောက် အလုပ်လုပ်ခဲ့သည်ဟု မဟုတ်မမှန် လုပ်ကြံစွပ်စွဲ၍ ငွေကျပ် နှစ်သောင်းစီ ညှစ်ယူခဲ့သည်။ ရာအိမ်မှူး ဦးအီဆုပ်က ငွေမပေးလျှင် နယ်ခြားစောင့် ရဲတပ်ဖွဲ့သို့ ချဲ့ကား၍ သတင်းပို့မည်ဟု ခြိမ်းခြောက်ခဲ့ပြီး၊ ရွာသား (၉) ဦးကလည်း နယ်ခြားစောင့်ရဲများ၏ ဖမ်းဆီးခြင်းကို ခံရလျှင် ရက်စက်စွာ ညှဉ်းပန်းနှိပ်စက်ခံရမည်ကို စိုးရိမ်၍ ရာအိမ်မှူး တောင်းသည့် ငွေကို ပေးခဲ့ရသည်ဟု ဒေသခံတစ်ဦးက RB News သို့ပြောသည်။

ဦးအီဆုပ်သည် ပြိုင်းတောင်ရွာရှိ ရာအိမ်မှူး (၃) ဦးအနက်မှ တစ်ဦးဖြစ်ပြီး၊ ၂၀၁၅ ခုနှစ်တွင် အသတ်ခံခဲ့ရသည့် ကျေးရွာတာဝန်ခံ ဦးဆော်လီမူလ္လာနှင့် အတူ (၆) နှစ်တိုင်တိုင် ရွာသားများကို ညှဉ်းပန်းနှိပ်စက် ငွေညှစ်ခဲ့သူတစ်ဦး ဖြစ်သည်။ ယခုအခါ ရာအိမ်မှူး ရာထူးဖြင့် ရွာသားများ အားလုံးကို အုပ်ချုပ်ရေးအာဏာပြ၍ ခြိမ်းခြောက် ငွေညှစ်ခြင်းများ ဆက်လက်ပြုလုပ်လျက် ရှိသည်။

ပြိုင်းတောင်ရွာရှိ ရွာသား အများစုသည် ကျဘန်း အလုပ်သမားများ ဖြစ်ကြပြီး၊ မိမိတို့၏ ရွာတွင် အလုပ်အကိုင် ရှားပါးသည့်အခါ အခြားရွာများတွင် သွားရောက် အလုပ်လုပ်ကိုင်လေ့ ရှိကြသည်။ အခြားရွာများတွင် အလုပ်လုပ်၍ ပြန်လာသည့်အခါ ရာအိမ်မှူး ဦးအီဆုပ်က တဖက်နိုင်ငံသို့ သွားရောက် အလုပ်လုပ်သည်ဟု လုပ်ကြံစွပ်စွဲ၍ ငွေညှစ်လေ့ရှိပြီး၊ ငွေပေးရန် ငြင်းဆန်သူများကို ကျေးရွာအုပ်ချုပ်ရေးမှူး သို့မဟုတ် နယ်ခြားစောင့် ရဲတပ်ဖွဲ့သို့ တိုင်ကြားမည်ဟု ခြိမ်းခြောက်၍ ငွေညှစ်ကြောင်း ဒေသခံများက ပြောပါသည်။