နောက်ဆုံးသတင်း/ဆောင်းပါးများ

"နှလုံးသားတွေ မီးတင်ရှို့နေတာ ရပ်တန့်ပါ"




"နှလုံးသားတွေ မီးတင်ရှို့နေတာ ရပ်တန့်ပါ"

ရေးသားသူ - ယျာတင် (ရိုဟင်းသား)
RB News
November 17, 2016

နေအိမ်ဆိုတာ-
နွေးထွေးမှုတွေ ပြည့်နှက်နေတဲ့
လှပပြီး ချမ်းမြေ့စရာကောင်းတဲ့
အမိုးအကာနဲ့ နေစရာလေး တစ်ခုပါ။

မိသားစုဆိုတာ-
နွေးထွေးမှုတွေနဲ့ ချည်နှောင်ထားတဲ့
လှပတဲ့ အစုအဖွဲ့လေးတစ်ခုပါ။

မိသားစုဝင်တွေ-
တစ်စုတစ်ဖွဲ့ ထမင်း ဝိုင်းစားတာတို့ ....
သားငယ်လေးက အမေ့ အပွေ့အပိုက်ထဲ
အိပ်မောရင်း ချမ်းမြေ့မှု စည်းစိမ် ခံစားတာတို့ ...
တစ်ယောက်ကို တစ်ယောက် စနောက်ပျော်ပါးတာတို့ ...
ညီအစ်ကို မောင်နှမ အချင်းချင်း
ချစ်စနိုး ရန်ဖြစ်ရင်း မေတ္တာပွားတာတို့ ...
အဖေက ရိုက်ရင် အမေ ရင်ထဲတိုးဝင်တာတို့ ...
အမေကရိုက်ရင် အဖေ့ရင်ထဲ ပြေးဝင်ခိုတာတို့က
မိသားစု ဝင်တွေရဲ့ လုပ်နေကျ သင်ခန်းစာတွေပါပဲ။

အခုတော့-
အဲ့လို နေအိမ်တွေကို အငြိုးကြီးစွာ မီးတင်ရှို့နေတော့
အဲ့လို မေတ္တာအသိုက်အမြုံထဲ နေနေတဲ့ မိသားစုလည်း
တကွဲတပြား ဖြစ်နေရတာပေါ့ဟ။

အဲ့ဒီ နေအိမ်တွေ မီးရှို့ခံရတာနဲ့ အတူတူ
မိသားစု မေတ္တာအသိုက်အမြုံလည်း ပြာကျသွားတယ်
ချမ်းမြေ့မှု အလုံစုံလည်း ပြာကျသွားတယ်
မျက်ရည်တွေ ကျလွန်းလို့ ခန္ဓာထဲ ရေဓာတ်ခမ်းသွားတယ်။

ကြည့်လေ-
အဖေ့ကို ရိုက်နှက် ဖမ်းဆီးကာ လက်ထိပ်ခတ်၍ ခေါ်သွား
အမေက အမျိုးအိမ်တစ်အိမ်မှာ သွားခိုလှုံနေရ
အစ်ကိုက ထွက်ပြေးတိမ်းရှောင်နေရ
အစ်မက မုဒိမ်းကျင့်ခံရလို့ ကိုယ့်ကိုကိုယ် စီရင်သွား
နို့စို့ကလေး ညီမောင်ကို အမေ့အပွေ့ထဲက လုယူပြီး
တကျွမ်းကျွမ်း လောင်နေတဲ့ မီးထဲ ပစ်ချ
ကျနော်ကတော့ မြင်တဲ့အတိုင်းပဲ စပါးစိုက်ခင်းထဲမှာ
အစာရေစာမဲ့ မျက်ရည်မှာ အရည့်ပြည့်
နှလုံးသားမှာ မီးတောင်ပေါက်ကွဲနေတာလေ။

ဒီလို တကွဲတပြားဖြစ်ခဲ့ရခြင်း နောက်ဆက်တွဲဟာ-
အရယ်အမော အစား အငိုအကြွေး
အချမ်းအမြေ့ အစား အပူအပန်
စည်းစိမ်မှု အစား ဒုက္ခခံနေရမှု
စသော ပြောမဆုံးတဲ့ သောကရောက်မှု ဝမ်းနည်းရမှုတွေ
နဖူးတွေ့ ဒူးတွေ့ ခံစားနေရတာပဲလေ။


ဒီမှာ-
ငါတို့ရဲ့ မေတ္တာ အသိုက်အမြုံလေး
ငါတို့ရဲ့ မိုးကာ ချမ်းကာ နေအိမ်လေး
ငါတို့ရဲ့ မိသားစု ခိုစရာလေးကို မီးတင်ရှို့နေတာတွေ
ကျေးဇူးပြုပြီး ဆက်လက်မကျူးလွန်ပါနဲ့ဟ။
အဲ့ဒီ နေအိမ်တွေနဲ့ မီးရှို့ခံရတာနဲ့ အတူတူ
ငါတို့ နှလုံးသားတွေလည်း အတူတူ လောင်ကျွမ်းသွားလို့ပါ။

ကျေးဇူးပြုပြီး-
ငါတို့အိမ်တွေ ... ငါတို့ နှလုံးသားတွေကို
အငြိုးတကြီး မီးတင်ရှို့နေတာတွေ
ရပ်-တန့်-က ရပ်-တန့်-ပါ-တော့။
သင်တို့ လူသားဆန်ရင်ပေါ့လေ။

Comment ရေးရန်

Rohingya Exodus