နောက်ဆုံးသတင်း/ဆောင်းပါးများ

မောင်နှမကျေးရွာမှ အမျိုးသမီးများ မုဒိမ်းကျင့်ခံရ၊ ရွာငယ်တစ်ခုမှ ရွာသူရွာသားများကို မောင်းထုတ်

MYARF
RB News
30.11.2016

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း မောင်နှမ ကျေးရွာအုပ်စုရှိ ရွာများ အတွင်းသို့ စစ်သားများ ၀င်ရောက်၍ ဒေသခံများကို လုပ်ကြံ ဖန်တီး၍ ဖမ်ဆီးခြင်း၊ အမျိုးသမီးများကို မုဒိမ်းကျင့်ခြင်း၊ အုပ်ချုပ်ရေးမှူးမှ တဆင့် ရွာသားများကို ရွာပြင်သို့ မောင်းထုတ်ခြင်းများ ပြုလုပ်ခဲ့ကြောင်း သတင်း ရရှိပါသည်။

ယနေ့ နိုဝင်ဘာလ (၃၀) ရက်နေ့ နေ့လည်ပိုင်းတွင် စစ်သားများသည် မောင်နှမ ကျေးရွာအုပ်စု၊ တောင်ရွာ (မစ္ဇီတိုလ္လာ) သို့ ၀င်ရောက်၍ ဦးဇော်ဟိရ်အာမတ်၏ အိမ်တွင် ဓါးရှည် သုံးလက် တွေ့ရှိခဲ့သည်ဟု လုပ်ကြံ ဖန်တီးကာ ဦးဇော်ဟိရ်အာမတ်၏ သား ၃ ဦးကို ဖမ်းဆီးခဲ့သည်။ ထို့နောက် စစ်သားများနှင့် အတူ ပါလာသည့် အောင်မင်္ဂလာ ကျေးရွာမှ ရခိုင်များနှင့် အောင်သာယာ ကျေးရွာမှ န.တ.လ ရွာသားများ သယ်ဆောင် လာသည့် ဓါးများကို ဖမ်းဆီးထားသူ (၃) ဦးကို ကိုင်ဆောင်စေကာ ဓါတ်ပုံ ရိုက်ယူပြီး ခေါ်ဆောင်သွားခဲ့သည်။

စစ်သားများသည် မောင်နှမကြီးရွာမှ ဒေသခံတစ်ဦး၏ သမီး (၃) ဦးနှင့် ဘာသာရေးဆရာတစ်ဦး၏ ဇနီးတို့ကို အုပ်စုဖွဲ့ မုဒိမ်းကျင့်ခဲ့သည်ဟု ဒေသခံတစ်ဦးက RB News သို့ပြောသည်။

“သောကြာနေ့ကစပြီး ကျွန်တော်တို့ ရွာကို စစ်သားတွေ ၀င်ထွက်နေတယ်။ ရွာထဲရှိတဲ့ ကျွဲ၊ နွား၊ တိရိစ္ဆာန် အားလုံးကို လုသွားတယ်။ စနေနေ့က အပြစ်မဲ့ ရွာသား ၁၆ ယောက်ကို ဖမ်းသွားတယ်။ အသက် ၁၀ နှစ် အထက် ယောက်ျားလေး တွေ့တာနဲ့ ရိုက်တယ်၊ သူတို့ ရိုက်ပြီး မကျေနပ်သေးရင် ဖမ်းပြီး ဌာနချုပ်ကို ခေါ်သွားတယ်” ဟု အဆိုပါ ဒေသခံက ပြောသည်။

ညနေ (၄) နာရီခန့် အချိန်တွင် ကျေးရွာအုပ်ချုပ်ရေးမှူး ဦးကျော်ကျော်မောင် ရောက်ရှိလာပြီး၊ “အခု မင်းတို့ကို ငါ မကယ်နိုင်ဘူး။ မင်းတို့ရွာကနေ ထွက်သွားကြ၊ ညပိုင်းမှာ စစ်သားတွေ ပြန်ဝင်လာမယ်။ အဲဒီအချိန်ကျရင် မင်းတို့ကို သေနတ်နဲ့ ပစ်မယ်” ဟု ခြိမ်းခြောက် ပြောဆိုကာ တောင်ရွာမှ တစ်ရွာလုံးကို ရွာမှထွက်သွားခိုင်းခဲ့သည်။

ကျေးရွာအုပ်ချုပ်ရေးမှူးက ခြိမ်းခြောက်သဖြင့် ရွာသားများသည် အ၀တ်အစား အချို့ယူ၍ နေမ၀င်ခင် ရွာမှ ထွက်၍ အနီးအနားရှိ ကျေးရွာများသို့ သွားရောက် ခိုလှုံနေကြသည်။

ရွာသားများ မထွက်မီ အောင်မင်္ဂလာမှ ရခိုင် ရွာသားများ၊ အောင်သာယာမှ န.တ.လ ရွာသားများသည် ဓါးများ ကိုင်ဆောင်လျက် အုပ်စုလိုက် ၀င်ရောက်လာပြီး ၎င်းတို့ ရှေ့မှောက်တွင်ပင် ကျွဲ၊ နွား၊ ဆိတ်များနှင့် စပါးများကို ယူဆောင် သွားကြကြောင်း ဒေသခံများက ပြောပါသည်။ ယခုအခါ မောင်နှမ ကျေးရွာအုပ်စု တောင်ရွာတွင် မည်သူတစ်ဦး တစ်ယောက်မှမရှိကြောင်း သိရှိရသည်။

စစ်သားများသည် မုဒိမ်းကျင့်ခြင်းကို လက်နက်သဖွယ် ဆက်လက် အသုံးပြုလျက် ရှိပြီး နိုဝင်ဘာလ (၂၉) ရက်နေ့ ညပိုင်းကလည်း လောင်းဒုံကျေးရွာအုပ်စု၊ ကျွန်းခေါင်းရွာမှ အမျိုးသမီးတစ်ဦးကို အုပ်စုဖွဲ့ မုဒိမ်းကျင့်ခဲ့ကြောင်း ဒေသခံတစ်ဦးက ပြောပါသည်။


Comment ရေးရန်

Rohingya Exodus