နောက်ဆုံးသတင်း/ဆောင်းပါးများ

ကုလသမဂ္ဂက မြန်မာနဲ့ သံတမန် ဆက်ဆံရေး အဆင့်လျှော့ချ လိုက်ပြီလား?

UN Photo/Amanda Voisard


ရိုနေဆန်းလွင်
RB News
11.12.2016

ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်းက မြန်မာနိုင်ငံနဲ့ ဆက်ဆံတဲ့ နေရာမှာ ပိုမိုထိရောက်ဖို့ အတွက် ဗီဂျေနံဗီးယားကို မြန်မာနိုင်ငံဆိုင်ရာ အထူးအကြံပေးပုဂ္ဂိုလ် အဖြစ်ခန့်အပ်ထားခဲ့တယ်။ အခုနှစ် ဒီဇင်ဘာလ (၃၁) ရက်နေ့မှာ သက်တမ်း ကုန်ဆုံးသွားပေမယ့် ကုလသမဂ္ဂ အထွေထွေ ညီလာခံက ထောက်ခံတင်ပြခြင်း မရှိလို့ သက်တမ်းတိုးတော့မှာ မဟုတ်ဘဲ သူ့နေရာမှာ လူစားလည်း ထိုးမှာမဟုတ်ဘူးလို့ ဆိုပါတယ်။ 

မြန်မာနိုင်ငံမှာ ရိုဟင်ဂျာလူမျိုးက အကြီးအကျယ် လူ့အခွင့်အရေး ချိုးဖောက်ခံနေရတဲ့ အပြင်၊ အခြားသော တိုင်းရင်းသားတွေလည်း လူ့အခွင့်အရေး ချိုးဖောက်ခံနေရလို့ ထိထိရောက်ရောက် ကိုင်တွယ်နိုင်ဖို့ အထူး အကြံပေးပုဂ္ဂိုလ် ထားပြီး၊ မြန်မာအစိုးရနဲ့ရော တိုင်းရင်းသား လူမျိုးစု အားလုံးနဲ့ ထိတွေ့ ဆက်ဆံစေခဲ့တယ်။ 

ဗီဂျေနံဗီးယားက မြန်မာအစိုးရဘက်ကို မျက်နှာလိုက်တယ်ဆိုပြီး အတော်လေး နာမည်ဆိုးနဲ့ ကျော်ကြားလာလို့ နိုင်ငံတကာ အသိုင်းအ၀န်းကြားမှာ မျက်နှာပျက်နေရသူ တစ်ဦးလို့ ဆိုရင်လည်း မမှားပါဘူး။ သူ့ရဲ့ အစီရင်ခံပုံ ညံ့ဖျင်းလို့ မြန်မာနိုင်ငံတွင်း လူ့အခွင့်အရေး ချိုးဖောက်မှုတွေကို ကုလသမဂ္ဂက ထိထိရောက်ရောက် မကိုင်တွယ်နိုင်ခဲ့ဘူးလို့ ဆိုရင်လည်း မှန်ပါမယ်။

အောက်တိုဘာလ (၉) ရက်နေ့က မောင်တောမြို့နယ်နဲ့ ရသေ့တောင်မြို့နယ်မှာ နယ်ခြားစောင့်ရဲတပ်ဖွဲ့ စခန်း (၃) ခု တိုက်ခိုက်ခံရတဲ့ နောက်ပိုင်းမှာ ဒေသခံ ရိုဟင်ဂျာတွေကို မြန်မာအစိုးရက နယ်မြေရှင်းလင်းရေး ခေါင်းစဉ်တပ်ပြီး အစုလိုက်အပြုံလိုက် သတ်ဖြတ်မှု၊ နေအိမ်တွေ မီးရှို့မှု၊ အမျိုးသမီးများကို စစ်သားများက အုပ်စုဖွဲ့ မုဒိမ်းကျင့်မှုတွေက မြန်မာအစိုးရက ဖုံးကွယ်ပြီး ငြင်းဆိုနေပေမယ့် ကုလသမဂ္ဂ အပါအ၀င် နိုင်ငံတကာ အသိုင်းအ၀န်းမှာတော့ ဘယ်လိုမှ ပစ်ပယ်ထားလို့ မရတဲ့ ကိစ္စတစ်ခု ဖြစ်လာတယ်။ 

နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ကိုယ်တိုင်က စစ်တပ်ဘက်က ရပ်တည်ပြီး နိုင်ငံတကာ အသိုင်းအ၀ိုင်းကို ပြစ်တင် ဝေဖန်တာတွေ လုပ်လာတော့ အခြေအနေက ပိုဆိုးလာတယ်လို့ ဆိုရပါမယ်။ 

နိုဗယ်လ်ငြိမ်းချမ်းရေး ဆုရှင် တစ်ယောက် အနေနဲ့ အမှန်တရားဘက် လိုက်ပြောရမယ့် အစား စစ်တပ်က ကျူးလွန်နေတဲ့ ရာဇ၀င်မှုတွေကို ဖုံးဖိပြီး ဘက်လိုက်ပြောနေတာက နိုင်ငံတကာ အသိုင်းအ၀ိုင်း အတွက် အမျက်ထွက်စရာ ကိစ္စတစ်ခု ဖြစ်လာပါတယ်။ 

ရိုဟင်ဂျာအရေးကို တောက်လျှောက် လေ့လာနေတဲ့ သတင်းထောက်တွေ၊ လူ့အခွင့်အရေး လှုပ်ရှားသူတွေ၊  နိုင်ငံတကာ အဖွဲ့အစည်းတွေ ပြန်လည် ဝေဖန်တာကို ကြည့်မယ်ဆိုရင် ဒေါ်အောင်ဆန်းစုကြည်ရဲ့ ပုံရိပ်က နိုင်ငံတကာ အသိုင်းအ၀ိုင်းကြားမှာ အတော်လေးကို ကျဆင်းသွားပြီလို့ ဆိုရပါမယ်။ အချို့ကလည်း ဒေါ်အောင်ဆန်းစုကြည် ကိုယ်တိုင် ဒီပြဿနာရဲ့ အစိတ်အပိုင်းလို့ ပေါ်ပေါ်တင်တင် ဝေဖန် ပြောဆိုနေကြတယ်။ 

အဲလို ဝေဖန်သံတွေ ဆူဆူညံညံ ထွက်လာတဲ့ အချိန်မှာ ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်းရဲ့ အထူး အကြံပေးပုဂ္ဂိုလ် ဗီဂျေနံဗီးယားက ဒေါ်အောင်ဆန်းစုကြည်ကို ဘူးသီးတောင်၊ မောင်တောမြို့တွေကို သွားပြီး အရပ်သား ပြည်သူတွေရဲ့ လုံခြုံရေးကို သေချာတာဝန်ယူပေးမယ်လို့ ပြောဆိုဖို့ တရားဝင် ကြေညာချက် ထုတ်ပြန်ပြီး တိုက်တွန်းခဲ့တယ်။ အဲလို တိုက်တွန်းချက်ကလည်း တကယ်တမ်းမှာ ကိုယ့်နိုင်ငံထဲမှာ ဘာဖြစ်နေသလဲဆိုတာ ကိုယ်တိုင် သွားကြည့်မှ သိမယ်လို့ နိုင်ငံပြင်ပက လူတစ်ယောက်က ပြောလိုက်သလိုပါပဲ။ ဘာမှ မဖြစ်ဘူးလို့ ပြောမနေနဲ့လို့ ပြောလိုက်တာနဲ့ အတူတူပါပဲ။ 

နံဗီးယားရဲ့ ကြေညာချက်နဲ့ အတူ အမေရိကန်၊ ကနေဒါနဲ့ ဥရောပ (၁၄) နိုင်ငံကလည်း လူသားချင်းစာနာတဲ့ အထောက်အပံ့တွေ ပေးခွင့် ပိတ်ပင်ထားတာကို အမြန်ဆုံး ဖွင့်ပေးဖို့ တောင်းဆိုလိုက်တယ်။ အဲဒီကြေညာချက်က နံဗီးယားရဲ့ ကြေညာချက်ကို ကျောထောက်နောက်ခံ လုပ်ပေးထားသလိုဖြစ်ပြီး၊ ကုလသမဂ္ဂနဲ့ အတူ ဒီ အင်အားကြီး နိုင်ငံတွေလည်း အတူရပ်တည်နေတယ်လို့ ပြောလိုက်တာပါ။

ဗီဂျေနံဗီးယားလို လူကတောင် ဒီလို ကြေညာချက် ထုတ်တယ်ဆိုရင် ရိုဟင်ဂျာတွေရဲ့ အခြေအနေက အရမ်းကို ဆိုးရွားနေတယ်လို့ နိုင်ငံတကာ အသိုင်းအ၀ိုင်းက မှတ်ချက်ချကြတယ်။

ကုလသမဂ္ဂ လူ့အခွင့်အရေး ကောင်စီရဲ့ အကြီးအကဲ ဖြစ်တဲ့ ဇားသ်အလ်ဟူစိန်းကလည်း မြန်မာအစိုးရက ရိုဟင်ဂျာလူမျိုးတွေကို လုပ်နေတာတွေက လူသားဖြစ်မှုကို ဆန့်ကျင်တဲ့ ရာဇ၀တ်မှု အထိ ဖြစ်လာနိုင်တယ်လို့ တရားဝင် ကြေညာချက်နဲ့ ပြောဆိုပြီးတဲ့နောက်မှာ ဒီဇင်ဘာလ (၁၀) ရက်နေ့ Facebook Live အမေးအဖြေမှာ မြန်မာအစိုးရက ရိုဟင်ဂျာတွေ အပေါ် လူသားဖြစ်မှုကို ဆန့်ကျင်တဲ့ ရာဇ၀တ်မှုတွေ ကျူးလွန်နေတာ ဆယ်စုနှစ်များစွာ ရှိပြီလို့ ပြောဆိုလိုက်ပါတယ်။ 

ဒါတွေအပြင် ဘင်္ဂလားဒေ့ရ်ှနိုင်ငံ၊ ကော့ဇ်ဘဇားခရိုင်က ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးရဲ့ အကြီးအကဲ ဖြစ်တဲ့ ဂျွန်မတ်ကီစ္စစ်ကလည်း မြန်မာအစိုးရက ရိုဟင်ဂျာတွေကို လူမျိုးတုန်း သန့်စင်ရေး လုပ်နေတယ်လို့ ပြောဆိုခဲ့ပါသေးတယ်။ 

အခုလာမယ့် ၂၀၁၇ ခုနှစ် ဇန်န၀ါရီလမှာ ကုလသမဂ္ဂ အထွေထွေရေးမှူးချုပ် အသစ် ဖြစ်လာမယ့် António Guterres ကလည်း ရိုဟင်ဂျာအကြောင်းကို သေချာနားလည်သူပါ။ ဦးသိန်းစိန် လက်ထက်တုန်းက ရိုဟင်ဂျာတွေကို တတိယနိုင်ငံ ခေါ်သွားဖို့ တောင်းဆိုခဲ့တာကို ပြတ်ပြတ်သားသား တုန့်ပြန်ခဲ့သူ တစ်ဦး ဖြစ်ပါတယ်။

ကုလသမဂ္ဂရဲ့ အဖွဲ့အစည်း နှစ်ခုက term နှစ်မျိုးထွက်လာတယ်။ Ethnic Cleansing နဲ့ Crimes Against Humanity - ဒီ term နှစ်ခုလုံးက တရားဝင်ရပ်တည်လာပါတော့မယ်။ အဲလို ရပ်တည်လာရင် အဲဒီ ရာဇ၀တ်မှုတွေကို ဖြေရှင်းဖို့ အတွက် ကုလသမဂ္ဂကနေ နိုင်ငံတကာခုံရုံး (ICC) ကို ပို့လို့ရတဲ့ နည်းလမ်းတွေ ရှိလာပါလိမ့်မယ်။ အချိန်တော့ နည်းနည်း ကြန့်ကြာနိုင်ပါမယ်။ သို့ပေမယ့် ရာဇ၀တ်မှုအတွက် တရားစီရင်မှုတော့ တကယ်ကို ရှိလာပါလိမ့်မယ်။ 

ဒါတွေ အားလုံးကို သုံးသပ်ကြည့်မယ်ဆိုရင် နံဗီးယား နေရာကို သက်တမ်းလည်း မတိုး၊ လူစားလည်း မထိုးတာက ရာဇ၀တ်မှုကို စတင် ကိုင်တွယ်ဖို့ အတွက် သံတမန် အဆင့် လျှော့ချလိုက်တယ်လို့သာ သုံးသပ်မိပါကြောင်း။


video


Comment ရေးရန်

Rohingya Exodus