နောက်ဆုံးသတင်း/ဆောင်းပါးများ

လုံခြုံရေးကောင်စီက ကြေညာချက် တောင်းဆိုသည်ကို အရေးမစိုက်ဘဲ ရိုဟင်ဂျာကျေးရွာများကို မြန်မာအစိုးရက ဆက်လက်မီးရှို့နေ




MYARF
RB News
16.9.2017

မောင်တော ။ ။ မောင်တောမြို့နယ်တွင် ရိုဟင်ဂျာရွာများကို ဩဂုတ်လ ၂၅ ရက်နေ့မှစ၍ မြန်မာအစိုးရလက်နက်ကိုင်များက မီးရှို့နေလျက်ရှိရာ စက်တာဘာလ ၁၅ ရက်နေ့တွင်လည်း တစ်ဒါဇင်ခန့် ကျန်ရှိနေသည့် ရိုဟင်ဂျာရွာများကိုလည်း ဆက်လက်မီးရှို့ခဲ့သည်။ စက်တင်ဘာလ ၁၄ ရက်နေ့တွင် ရိုဟင်ဂျာကျေးရွာများကို ဆက်လက်မီးမရှို့ရန် ကမ္ဘာ့ကုလသမဂ္ဂ လုံခြုံရေးကောင်စီက ကြေညာချက်ထုတ်၍ တောင်းဆိုခဲ့သော်လည်း မြန်မာအစိုးရက အရေးမစိုက်ဘဲ ရိုဟင်ဂျာရွာများကို ဆက်လက်မီးရှို့လျက်ရှိသည်ကို တွေ့ရှိရပါသည်။

စက်တင်ဘာလ ၁၅ ရက်နေ့တွင် မောင်တောမြို့နယ် တောင်းပိုင် ပန်းတောပြင်ကျေးရွာအုပ်စု ရွာသစ်ကို မွန်းလွဲ ၂ နာရီ ၄၅ မိနစ်၌ မြန်မာအစိုးရ လက်နက်ကိုင်တပ်ဖွဲ့များနှင့် အနီးအနားကျေးရွာမှ နတလ ရခိုင်ရွာများမှ ရခိုင်များက ၀င်ရောက်၍ မီးရှို့ခဲ့သည်။

ထို့အပြင် ညနေ ၃ နာရီ ၁၅ မိနစ်၌ ပန်းတောပြင်ကျေးရွာနှင့် ကပ်လျက် ညောင်ချောင်းကျေးရွာကို အဆိုပါ အစိုးရလက်နက်ကိုင်အုပ်စုက မီးရှို့ခဲ့သည်။

ဤကျေးရွာ နှစ်ရွာသည် မောင်တောတောင်ပိုင်းတွင် လုံးဝမီးမရှို့ရသေးသော ကျေးရွာများဖြစ်ကြပြီး အနီးအနားမှ မီးရှို့ခံရသော ကျေးရွာများမှ ဒုက္ခသည်များ လာရောက်ခိုလှုံနေသော ကျေးရွာနှစ်ရွာလည်း ဖြစသည်။ ဒုက္ခသည်များအပြင် ဤကျေးရွာ နှစ်ရွာမှ ရွာသူရွာသားများသည် ထွက်ပြေးခိုလှုံရန် နေရာ မရှိသလောက် ရှားပါးနေသည်ဟု ဒေသခံများက RB News သို့ပြောသည်။

ညနေ ၄ နာရီ ၁၅ မိနစ်အချိန်တွင်လည်း မောင်တော တောင်ပိုင်း ပဒင်းကျေးရွာအုပ်စု ပိုက်သည်ရွာရှိ လက်ကျန်အိမ်များကို မြန်မာလက်နက်ကိုင်အုပ်စုက မီးရှို့ခဲ့သည်။ ဤကျေးရွာကို လွန်ခဲ့သော နှစ်ရက်က မီးရှို့ခဲ့ပါသေးသည်။

မောင်တောမြောက်ပိုင်း ကျားခေါင်းတောင်ကျေးရွာကိုလည်း မွန်းလွဲ တစ်နာရီခွဲအချိန်တွင် မြန်မာလက်နက်ကိုင်အုပ်စုက မီးရှို့ခဲ့သည်။

မောင်တောမြောက်ပိုင်း ရေတွင်းကျွန်းကျေးရွာကိုလည်း မွန်းလွဲ ၂ နာရီခွဲတွင် မြန်မာလက်နက်ကိုင်အုပ်စုက မီးရှို့ခဲ့သည်။

စက်တင်ဘာလ ၁၃ ရက်နေ့နှင့် ၁၄ ရက်နေ့တို့တွင် ပြည်ထဲရေးဝန်ကြီး၊ နယ်ခြားစောင့်ရဲတပ်ဖွဲ့ ကွပ်ကဲရေးမှူး သူရစန်းလွင်၊ စစ်တပ်မှ တပ်ရင်းမှူး၊ ခရိုင်အုပ်ချုပ်ရေးမှူး၊ မြို့နယ်အုပ်ချုပ်ရေးမှူး တို့အဖွဲ့ ဦးဆောင်သော အဖွဲ့သည် မြို့မကညင်တန်း၊ ညောင်ချောင်း၊ ပန်းတောပြင်၊ ကျောက်လှေကား၊ လဘော်ဇား စသည့်ကျေးရွာများသို့ သွားပြီး အိမ်မီးရှို့နေတာတွေကို ရပ်တန့်လိုက်ပြီဟု အာမခံလျက်ပြောဆိုသွားခဲ့သည်။ ငြိမ်းငြိမ်းချမ်းချမ်း နေကြရန်လည်း မှာကြားခဲ့ပြီး အရေအတွက် အလွန်နည်းပါးသော ထောက်ပံ့ရေးပစ္စည်းများကို ပေးအပ်ခဲ့သည်။ သို့သော် ၎င်းတို့အဖွဲ့၏ အာမခံပြောဆိုပြီး နောက်တစ်ရက်တွင် လက်ကျန်ရှိနေသည့် ရိုဟင်ဂျာရွာများကို လိုက်ပြီး မီးရှို့နေခြင်းသည် အပြောတစ်မျိုး အလုပ်တစ်မျိုး ဖြစ်နေသည်။

မောင်တောခရိုင်၏ လူ့အခွင့်အရေးစောင့်ရှောက်လေ့လာရေး အဖွဲ့က မောင်တောခရိုင်တွင် မြန်မာအစိုးရလက်နက်ကိုင်များက ရိုဟင်ဂျာကျေးရွာများကို ရွာလုံးကျွတ်မှသည် မြို့လုံးကျွတ်အထိ မီးရှို့နေခြင်း အနီးကပ်စောင့်ကြည့် မှတ်တမ်းတင်နေပြီး မကြာမီအချိန်အတောအတွင်း၌ စာရင်းဇယား အတိအကျဖြင့် ထုတ်ပြန်မည်ဟု ပြောသည်။

ပြည်ထဲရေး ဝန်ကြီးတို့အဖွဲ့နှင့် မြန်မာသတင်းထောက်များ လိုက်ပါလာခဲ့ပြီး အနည်းငယ် ထောက်ပံ့ပေးမှုကို အများသဖွယ် ရိုက်ယူသွားခဲ့သည်ဟု ဒေသခံများက ပြောပါသည်။

စက်တင်ဘာလ (၁၅) ရက်နေ့တွင် မီးရှို့ခဲ့သော ညောင်ချောင်းနှင့် ပန်းတောပြင်ကျေးရွာများသို့ မီးသတ်ကားနှစ်စီးနှင့် ဟိန္ဒူများ ခေါ်သွား၍ မီးသတ်နေသည့် သဖွယ် ဓာတ်ပုံများရိုက်ယူသွားသည်။

Comment ရေးရန်

Rohingya Exodus