နောက်ဆုံးသတင်း/ဆောင်းပါးများ

ဘူးသီးတောင် လက်ဝဲဒက်ပြင်ရှည်မှ ရိုဟင်ဂျာနေအိမ် (၃) လုံးကို ရခိုင်များက မီးရှို့ဖျက်ဆီး

RB News
24.1.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် လက်ဝဲဒက်ပြင်ရှည် ကျေးရွာအုပ်စုမှ ရိုဟင်ဂျာ နေအိမ် (၃) လုံးကို ရခိုင်အစွန်းရောက် များက မီးရှို့ဖျက်ဆီးခဲ့ကြောင်း သတင်းရရှိပါသည်။

ယနေ့ ဇန်န၀ါရီလ (၂၄) ရက်နေ့ နံနက် ၃ နာရီခန့် အချိန်တွင် ဘူးသီးတောင်မြို့နယ် လက်ဝဲဒက်ပြင်ရှည် ကျေးရွာအုပ်စု ထင်ရှားပြင်ကျေးရွာမှ လူမနေတော့သည့် ရိုဟင်ဂျာ နေအိမ် (၃) လုံးကို ရခိုင်အစွန်းရောက်များက မီးရှို့ဖျက်ဆီးခဲ့သည်ဟု ဒေသခံတစ်ဦးက RB News သို့ပြောပါသည်။

“ပထမ နှစ်လုံးရှို့တယ်။ ဗလီရဲ့ တောင်ဘက်ပိုင်းမှာ ကပ်လျက်ရှိနေတဲ့ နေအိမ်တွေပါ။ နောက်တစ်ခါ အဲဒီ အိမ်တွေနဲ့ လေးလုံးလောက် ခြားနေတဲ့ အိမ်တစ်လုံးကို ထပ်ရှို့တယ်” ဟု အဆိုပါ ဒေသခံက ပြောပါသည်။

ထင်ရှားပြင်ရွာတွင် ရိုဟင်ဂျာ နေအိမ် ၃၀၀ ကျော်ရှိပြီး၊ ၁၀၀ ကျော်မှ မိသားစုများသည် စားဝတ်နေရေး ခက်ခဲမှုနှင့် စစ်တပ်၏ အကြမ်းဖက်မှုရန်တို့ကို ကြောက်ရွံ၍ တဖက် ဘင်္ဂလားဒေ့ရ်ှနိုင်ငံတွင် သွားရောက် ခိုလှုံနေကြောင်း သိရှိရသည်။

ယနေ့ မီးရှို့ခံရခြင်းမှာ ဒုတိယအကြိမ်ဖြစ်ပြီး လွန်ခဲ့သည့် တစ်လခွဲခန့်ကလည်း နှစ်အိမ် မီးရှို့ခံခဲ့ရသည်။ ထိုသို့ မီးရှို့ခံခဲ့ရပြီးနောက် ရွာအတွင်း ကင်းစောင့်များ ထားရန် စီစဉ်ခဲ့သော်လည်း ကျေးရွာအုပ်စု အုပ်ချုပ်ရေးမှူးထံမှ ခွင့်ပြုချက် လက်မှတ်မရသဖြင့် ရပ်ရွာလူကြီးများက နယ်ခြားစောင့်ရဲတပ်ဖွဲ့ စခန်း အမှတ် (၁၃) မှ ခွင့်ပြုချက်ယူ၍ ကင်းစောင့်ခဲ့သည်။ ယခုအခါ အခြေအနေ တည်ငြိမ်အေးချမ်းလာပြီဟု ယူဆ၍ ကင်းစောင့်များ မထားတော့သဖြင့် ယခုကဲ့သို့ မီးရှို့ခံရခြင်း ဖြစ်သည်။

ထင်ရှားပြင်ရွာ၏ အနောက်ဘက်တွင် အင်းပေါက်နှင့် သပြေတော ရခိုင်ရွာ နှစ်ရွာရှိပြီး လမ်းလျှောက် သွားလျှင် ငါးမိနစ်ခန့် ကြာသည့် အကွာအဝေးတွင် ရှိသည်။

ယနေ့ မီးရှို့ခံရသည့် နေအိမ်များ၏ ပိုင်ရှင်များမှာ --

(၁) ဦးအာစ်မာတ်တူလ္လာ (ဘ) ဦးဘာဆူမျာ
(၂) ဒေါ်ဆဖူရာ
(၃) ဦးမိုဟာမတ်အာလောမ် -- တို့ဖြစ်ကြသည်။

ဒေသခံများက မီးလောင်နေသည့် နေအိမ်များ အနီးရှိ ချောင်းမှ ရေစုပ်စက်ဖြင့် ရေစုပ်၍ ပိုက်များဖြင့် အချိန်မှီ ငြိမ်းသတ်ခဲ့သောကြောင့် မီးငြိမ်းသတ်သွားခြင်း ဖြစ်ပြီး၊ ရေစုပ်စက်ဖြင့် ရေစုပ်၍ မငြိမ်းသတ်ပါက အခြားအိမ်များ ကူးနိုင်သည့် အခြေအနေ ရှိခဲ့ကြောင်း သိရှိရပါသည်။

ဇန်န၀ါရီလ (၂၂) ရက်နေ့ ညပိုင်းတွင်လည်း မောင်တောမြို့နယ် မြောက်ပိုင်း တောင်ပြိုလက်ယျာတွင် ရိုဟင်ဂျာများ၏ နေအိမ် (၄) လုံးကို လုံခြုံရေးတပ်ဖွဲ့ဝင်များက မီးရှို့ဖျက်ဆီးခဲ့သည်။





Comment ရေးရန်

Rohingya Exodus