နောက်ဆုံးသတင်း/ဆောင်းပါးများ

မောင်တော မောင်နီရွာမှ စိတ်ကြွဆေးပြားများ ရောင်းဝယ် ဖောက်ကားနေသူများကို မဖမ်းဆီးဘဲ ယင်းအိမ်တွင် လာရောက်ခိုလှုံနေသူများကို ဖမ်းဆီးထား

MYARF
RB News
27.1.2018

မောင်တော ။ ။ ရခိုင်ပြည်နယ်၊ မောင်တောမြို့နယ် စိတ်ကြွဆေးပြားများနှင့် ပတ်သက်၍ ဖမ်းဆီးခံရသူများမှာ စိတ်ကြွဆေးပြားနှင့် ပတ်သက်သူများ မဟုတ်ဘဲ ဖမ်းဆီးရမိသည့် အိမ်တွင် ခိုလှုံနေသူများ ဖြစ်ကြောင်း သတင်းရရှိပါသည်။ 

ဇန်န၀ါရီလ (၂၆) ရက်နေ့ နေ့လည် ၁း၃၀ နာရီ အချိန်တွင် ရခိုင်လူမျိုး တစ်ဦးသည် မှန်လုံကားတစ်စီးဖြင့် WY စိတ်ကြွဆေးပြားများ တင်ဆောင်၍ မောင်နီရွာရှိ ဦးနုရ်ဘော်ရှော်ရ်၏ နေအိမ်သို့ သယ်ဆောင်လာစဉ် ရဲတပ်ဖွဲ့ဝင်များက နောက်ယောင်ခံလိုက်လာခဲ့သည်။ WY စိတ်ကြွဆေးပြားများ တင်ဆောင်လာသူသည် ၎င်း၏ စိတ်ကြွဆေးပြားများကို ဦးနုရ်ဘော်ရှော်ရ်၏ နေအိမ်သို့ ပို့ပြီးသည်နှင့် ရဲတပ်ဖွဲ့ဝင်များ ၀င်ရောက်လာသဖြင့် ကားကို ရပ်ထားသည့် နေရာတွင် ထား၍ ထွက်ပြေးသွားခဲ့သည်။ ပို့ဆောင်သည့် အိမ်မှ အိမ်ရှင် အမျိုးသမီး (ဦးနုရ်ဘော်ရှော်ရ်၏ ဇနီး) လည်း အိမ်နောက်ဖေးမှ ထွက်ပြေးသွားခဲ့သည်။ 

ရဲတပ်ဖွဲ့ဝင်များက WY စိတ်ကြွဆေးပြား ၁၂ သိန်းခွဲကျော် သိမ်းဆည်းရမိသဖြင့် ယင်းအိမ်၌ မြို့သူကြီးရွာတွင် အိမ်မီးရှို့ခံရ၍ လာရောက် ခိုလှုံနေသည့် ထွက်ပြေးသွားသော အိမ်ရှင်အမျိုးသမီး၏ ညီမတော်စပ်သူနှင့် လှဘော်ဇားကျေးရွာမှ ကိုးတန်းကျောင်းသား တစ်ဦးကို ဖမ်းဆီးခေါ်ဆောင်သွားခဲ့ပြီး၊ စိတ်ကြွဆေးပြား သယ်ဆောင်လာသူ၏ ကားကိုလည်း ရဲများကို သိမ်းယူသွားခဲ့ကြောင်း ဒေသခံများက RB News သို့ပြောပါသည်။

ဖမ်းဆီးခံရသူ နှစ်ဦးစလုံးမှာ သိမ်းဆည်းရမိသည့် စိတ်ကြွဆေးပြားများနှင့် မည်သို့မျှ ပတ်သက် ဆက်နွယ်နေခြင်း မဟုတ်ကြောင်း၊ ၎င်းတို့သည် အိုးမဲ့အိမ်မဲ့ ဖြစ်နေသောကြောင့် ယင်းအိမ်တွင် ခိုလှုံနေသူများ ဖြစ်သည်ဟု ဒေသခံများက ဆိုသည်။ 

၎င်းတို့ကို ဖမ်းဆီးပြီးနောက် ရဲတပ်ဖွဲ့ဝင်များက မောင်နီ အနောက်ရွာမှ ဦးဖောဇောလောက်၏ နေအိမ်ကိုလည်း ၀င်ရောက်ရှာဖွေခဲ့သည်။ သို့သော်လည်း ဥပဒေနှင့် မလွတ်ကင်းသည့် ပစ္စည်းတစ်စုံတစ်ရာ မရရှိသဖြင့် အဖမ်းအဆီး မရှိခဲ့ပေ။

ယနေ့ ဇန်န၀ါရီလ (၂၈) ရက်နေ့တွင်လည်း မောင်နီ အလယ်ရွာမှ ဦးဆော်လိမ်၏ နေအိမ်ကို ရဲတပ်ဖွဲ့ဝင်များက ၀င်ရောက် ရှာဖွေခဲ့သည်။ ဥပဒေနှင့် မလွတ်ကင်းသည့် ပစ္စည်းတစ်စုံတစ်ရာ မရရှိခဲ့ဟု ဒေသခံများက ပြောပါသည်။

ထို့နောက် ရဲတပ်ဖွဲ့ဝင်များသည် မောင်နီ မြောက်ရွာမှ ဦးအစ္စမိုင်လ်၏ သားကို လမ်းပေါ်မှ ဖမ်းဆီး၍ ယခင်က အမှုရှိသည်ဟု ပြောဆို၍ ငွေကျပ် သုံးသိန်း ညှစ်ယူခဲ့ကြောင်း မျက်မြင်သက်သေ တစ်ဦးက ပြောပါသည်။ 

ဇန်န၀ါရီလ (၂၅) ရက်နေ့ ညပိုင်းကလည်း လောင်းလှေတစ်စီးဖြင့် WY စိတ်ကြွဆေးပြားများ ဘင်္ဂလားဒေ့ရ်ှနိုင်ငံသို့ ပို့ဆောင်နေသူ (၄) ဦးကို POE စခန်းမှ နယ်ခြားစောင့်ရဲများက ဖမ်းဆီးခဲ့ကြောင်း စုံစမ်းသိရှိရပါသည်။
ယခုမောင်နီရွာမှ စိတ်ကြွဆေးပြားများနှင့် ပတ်သက်၍ အမှန်တကယ် ရောင်းဝယ် ဖောက်ကားနေသူများကို မဖမ်းဆီးဘဲ အိုးမဲ့အိမ်မဲ့ ဖြစ်နေ၍ လာရောက်ခိုလှုံနေသူများကို ဖမ်းဆီးထားသဖြင့် အပြစ်မဲ့များကို ပြန်လွှတ်၍ အမှုသက်ဆိုင်သူများကို ဖမ်းဆီးရန် ဒေသခံများက လိုလားနေကြသည်။



Comment ရေးရန်

Rohingya Exodus